वीरगंज । पर्सा र बारा लगायतका जिल्लामा खाना पकाउने एलपी ग्यासको अभाव कायमै रहेको छ । वीरगंजमा ग्यास लिन उपभोक्ताहरूले घण्टौँसम्म लाइनमा बस्नुपर्ने बाध्यता रहेको बताएका छन् । वीरगंजमा मनोज, बारा, सुपर, नारायणी लगायत विभिन्न कम्पनीका ग्यासको अभाव देखिएको छ ।
यसअघि घरघरमै डिलरमार्फत ग्यास पुर्याइने गरे पनि अहिले उपभोक्ताहरूले डिलर तथा बिक्री केन्द्रमै पुगेर घण्टौँ लाइनमा बसेर सिलिन्डर लिनुपर्ने अवस्था रहेको छ ।
वीरगंजसहित पर्सा जिल्लामा ग्यासको अभाव देखिएपछि कालोबजारी तथा कृत्रिम अभावको आशंकामा स्थानीय प्रशासनले बजार अनुगमनसमेत गर्दै आएको छ । सरकारले ग्यासको आपूर्ति सहज बनाउन विभिन्न प्रयास गरे पनि उपभोक्ताले सहज रूपमा ग्यास पाउने अवस्था भने अझै बन्न सकेको छैन ।
ग्यास विक्रेता संघ पर्साका अध्यक्ष वीरेन्द्र साहका अनुसार कम्पनीबाट बजार तथा डिलरहरूमा नियमित रूपमा ग्यास आपूर्ति भइरहेको भए पनि मागअनुसार आपूर्ति हुन नसक्दा अभाव कायम रहेको हो ।
मुक्तिनाथ सप्लायर्स एण्ड सन्सका सञ्चालकसमेत रहेका शाहले पहिले ६० वटा भरिएका सिलिन्डर आउने गरेकोमा अहिले एकपटकमा ७० वटासम्म सिलिन्डर आउने गरेको बताए । तर, पहिले दुई दिनसम्म बिक्री हुने ग्यास अहिले गाडीबाटै ग्राहकले लैजाने अवस्था रहेको उनको भनाइ छ ।
“पहिलाभन्दा अहिले सप्लाई बढी भए पनि ग्यासको अभाव कायमै छ । ग्राहकहरूले घरमा ग्यास रहेकाे सिलिन्डरसमेत स्टक गरेर राखेका कारण पनि अभाव देखिएको छ,” शाहले भने ।
उनले ग्यासको अभाव कम गर्न एकपटक सिलिन्डर लिइसकेका उपभोक्ताले कम्तीमा १० दिनपछि मात्रै अर्को सिलिन्डर लिन आग्रह गरेका छन् । सबै उपभोक्तालाई ग्यास उपलब्ध गराउन आवश्यकताअनुसार मात्र सिलिन्डर खरिद गर्न र अन्य ग्राहकलाई पनि अवसर दिन उनले आग्रह गरे ।
