वीरगन्ज । जिल्ला प्रहरी कार्यालय पर्सामा हालै सरुवा भई आएका प्रहरी उपरीक्षक (एसपी) पवन भट्टराईले जिल्लामा शान्ति सुरक्षा कायम गर्दै अपराध नियन्त्रण र सीमा क्षेत्रमा हुने तस्करी नियन्त्रणलाई आफ्नो प्रमुख प्राथमिकतामा राखेको बताएका छन्।

शुक्रबार जिल्ला प्रहरी कार्यालय पर्साको सभाहलमा स्थानीय सञ्चारकर्मीसँग आयोजित परिचयात्मक तथा अन्तरक्रिया कार्यक्रममा बोल्दै एसपी भट्टराईले प्रहरी सेवालाई थप जनमैत्री, विश्वसनीय, पारदर्शी र जवाफदेही बनाउने प्रतिबद्धता व्यक्त गरे। उनले नागरिकलाई सहज र प्रभावकारी सेवा प्रदान गर्दै शान्ति सुरक्षा, अमनचयन, सामाजिक सद्भाव तथा विधिको शासन कायम गर्न प्रहरी प्रशासन सक्रिय रहने बताए।

सीमा क्षेत्रमा हुने तस्करीसहितका गैरकानुनी तथा आपराधिक गतिविधि नियन्त्रणमा विशेष ध्यान दिइने उल्लेख गर्दै एसपी भट्टराईले अपराधरहित समाज निर्माणका लागि प्रहरीको एक्लो प्रयास पर्याप्त नहुने बताए। उनले अपराध नियन्त्रण तथा सामाजिक सुरक्षा मजबुत बनाउन सञ्चारकर्मी, स्थानीय नागरिक र समाजका सबै पक्षसँग निरन्तर सहकार्य र समन्वय आवश्यक रहेको धारणा व्यक्त गरे।

प्रहरीप्रति नागरिकको विश्वास अझ मजबुत बनाउन सूचना आदानप्रदान र नागरिकसँगको सहकार्यलाई प्रभावकारी बनाउने बताउँदै उनले प्रहरी संगठनलाई नागरिकप्रति उत्तरदायी र जवाफदेही बनाउँदै कानुन कार्यान्वयनमा निष्पक्षता कायम गर्ने प्रतिबद्धता जनाए।

अन्तरक्रियामा सहभागी सञ्चारकर्मीहरूले प्रहरी प्रशासनको कामकारबाही थप पारदर्शी, प्रभावकारी र जनउत्तरदायी हुनुपर्नेमा जोड दिएका थिए। उनीहरूले हिंसामा परेका तथा न्यायको खोजीमा प्रहरीसमक्ष आउने पीडितलाई थप पीडा दिने नभई संवेदनशील र मानवीय व्यवहार गर्न आग्रह गरे।

सञ्चारकर्मीहरूले विगतमा सूचना सङ्कलन तथा समाचार सम्प्रेषणका क्रममा पत्रकारहरूलाई प्रहरी प्रशासनबाट अनावश्यक दुःख दिने तथा असहज परिस्थिति सिर्जना हुने गरेको गुनासोसमेत गरेका थिए। आगामी दिनमा त्यस्ता गतिविधि दोहोरिन नदिन तथा प्रहरी र सञ्चारकर्मीबीच सहकार्य र विश्वासको वातावरण बनाउन उनीहरूले आग्रह गरे।

कार्यक्रममा प्रहरी र सञ्चारकर्मीबीचको समन्वयलाई थप बलियो बनाउने, सूचनाको सहज आदानप्रदान गर्ने तथा नागरिकका समस्या र गुनासोलाई प्रभावकारी रूपमा सम्बोधन गर्ने विषयमा समेत छलफल भएको थियो।

अन्तरक्रिया कार्यक्रममा प्रहरी नायब उपरीक्षकद्वय चक्रबहादुर मल्ल र राजु कार्की, नेपाल पत्रकार महासंघका केन्द्रीय लेखा समिति संयोजक केसी लामिछाने, मधेश प्रदेश अध्यक्ष श्याम बन्जारा, सचिव दीपक गौतम, पर्सा अध्यक्ष ओमप्रकाश खनाल, पूर्वकेन्द्रीय सचिव दीपेन्द्र चौहानलगायत प्रहरी अधिकृत तथा सञ्चारकर्मीहरूको सहभागिता रहेको थियो ।

वीरगंज । कवाडी करको नाममा अवैध असुली गरेको आरोपमा पर्सा प्रहरीले थप एक जनालाई पक्राउ गरी मुद्दा चलाएकाे छ ।

जिल्ला प्रहरी कार्यालय पर्साले वीरगंज महानगरपालिका–२२ जगरनाथपुरस्थित ढाटबाट सोमबार राति स्थानीय ३५ वर्षीय अशोक प्रसाद यादवलाई नियन्त्रणमा लिएको हो । पक्राउ परेका यादवलाई अभद्र व्यवहारसम्बन्धी मुद्दामा म्याद थप गरी अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए ।

प्रवक्ता मल्लका अनुसार यसअघि पनि प्रहरीले जगरनाथपुरस्थित सोही ढाटबाट एक जनालाई पक्राउ गरी मुद्दा चलाएको थियो ।

प्रहरीले दुई जनालाई पक्राउ गरी अनुसन्धान अघि बढाए पनि कवाडी करको नाममा हुँदै आएको भनिएको अवैध असुली पूर्णरूपमा रोक्न नसकेको स्थानीयले बताएका छन् । स्थानीयका अनुसार जगरनाथपुर चोकस्थित सडक किनारमै त्रिपालको छाप्रो बनाएर केही युवाहरूले कवाडी करको नाममा सवारीसाधनबाट रकम असुल्दै आएका छन् ।

जिल्ला प्रहरी कार्यालयले कारबाही थालेपछि पनि रातिको समयमा बिना रसिद रकम असुल्ने गरिएको स्थानीय प्रत्यक्षदर्शी तथा सवारी चालकहरूले बताएका छन्। उनीहरूले यसलाई करभन्दा पनि जबर्जस्ती असुलीका रूपमा लिएको बताएका छन् ।

गत आर्थिक वर्षमा वीरगंज महानगरपालिकाले कवाडी करको ठेक्का अमित ठेक्का पट्टलाई दिएको थियो । सम्झौताअनुसार पुरानो फलाम, प्लास्टिक, कागज, टायर–ट्युब लगायतका निश्चित कवाडी सामग्रीमा मात्र कर असुल्न पाउने व्यवस्था थियो । महानगरपालिकाका राजस्व शाखा प्रमुख मनोज कर्णका अनुसार नयाँ आर्थिक वर्षको साउन महिनाका लागि पनि पुरानै सम्झौताअनुसार उक्त ठेक्काको म्याद थप गरिएको थियो ।

तर सम्झौताविपरीत आईसीपीबाट निस्कने मालवाहक भारतिय सवारीसाधनबाट समेत रकम असुली भइरहेको स्थानीयको आरोप छ । राजमार्गमा यसरी कर असुल्न नपाइने व्यवस्था हुँदाहुँदै महानगरपालिकाको नाममा अवैध असुली भइरहेको उनीहरूको भनाइ छ ।

स्थानीयले उक्त अवैध असुलीमा वीरगंजका केही प्रभावशाली व्यक्तिहरू तथा इलाका प्रहरी कार्यालय सुगौलीको समेत मिलेमतो रहेको आरोप लगाएका छन् । यसका साथै वीरगंज महानगरपालिकाकाे जनप्रतिनिधि र केही कर्मचारीकाे समेत मिलाेमताे रहेकाे छ ।