Date
मङ्ल, मंसिर १, २०८३
Tue, November 17, 2026
Home Blog Page 552

वीरगंज चिनी मिल संचालनकाे लागि प्रयास गर्ने उद्याेगमन्त्रीको प्रतिवद्धता

0

वीरगंज । नेपाली कांग्रेस पर्साकाे आयोजना मंगलबार नवनियुक्त उद्याेग, वाणिज्य तथा आपुर्ति मन्त्री रमेश रिजालकाे स्वागत तथा सम्मान कार्यक्रममा सम्पन्न भएकाे छ । वीरगंज नगर सभा गृहमा आयाेजित कार्यक्रममा वाेल्ने वक्ताहरुले मन्त्री रिजाललाई वीरगंज चिनी कारखाना पुन: सञ्चालन गरिदिन आग्रह गरेका हुन् । 

मन्त्री नियुक्त भएपछि पहिलो पटक गृह जिल्ला पर्सा आएका उद्योगमन्त्री रिजाललाई स्वागत तथा सम्मान गर्न आयाेजित कार्यक्रममा बोल्ने वक्ताहरुले लामो समयदेखि बन्द रहेको वीरगंज चिनी कारखाना लगायत यस क्षेत्रका बन्द उद्योगहरु पुन: सञ्चालन गर्न आग्रह गरे । 

पर्सादेखि रौतहटसम्म तीन जिल्लाका किसानको समृद्धिसँग प्रत्यक्ष रुपमा जोडिएको चिनी कारखाना बन्द भएलगत्तै यहाँका कृषकहरुको दु:खका दिन सुरु भएकाले मन्त्री रिजालकै कार्यकालमा चीनी कारखाना पुन: सञ्चालन भए बेरोजगारी लगायत कयौं समयसाको समाधान हुनुका साथै जिल्लावासीको सुखका दिन पनि फिर्ता आउने उनीहरुको तर्क थियो ।

जिल्लावासीको आग्रह सुनेपछि उद्योगमन्त्री रिजालले आफनै कार्यकालमा चिनी कारखाना सञ्चालनका लागि भरमग्दुर प्रयास गर्ने प्रतिबद्धता व्यक्त गरे । पर्सा जिल्लावासीकै आशीर्वाद र साथले आफू चारदशकको राजनीतिक यत्रामा पहिलो पटक मन्त्री बनेकाले जिल्लावासीकै आदेशमा आफू चल्ने उनले बताए ।

मन्त्री रिजालले भने, ‘चिनी मिल चलाउन म तयार छु , यसलाई चलाउनका लागि के के गर्नु पर्छ ? त्यसबारे मन्त्रालयमा विज्ञहरुलाई बोलाएर छलफल गरेर मन्त्रालयले काम अगाडि बढाउँछु ।’

कृषि औजार कारखाना सञ्चालनमा ल्याउनका लागि काम गरिरहेको राष्ट्रिय आविष्कार केन्द्रले अहिलेसम्म सरकारबाट बजेट नपाएको गुनासो सम्बोधनका लागि आफूले पहल थालिसकेको पनि मन्त्री रिजालले जानकारी गराए । उनले भने, ‘केन्द्रका अध्यक्ष महावीर पुनजीलाई मैले मन्त्रालयमै बोलाएर उहाँको गुनासो सुने, लगत्तै आवश्यक बजेट निकासका लागि मैले प्रकृया अगाडि बढाइसकेको छु ।’

कांग्रेस पर्साका सभापति एवम् प्रदेश सभा सदस्य जनार्दन सिंह क्षेत्रको सभापतित्वमा भएको कार्यक्रममा कांग्रेसका केन्द्रिय सदस्य एवम् प्रतिनिधि सभा सदस्य अजय चाैरसिया, प्रदेश सभा सदस्य श्याम पटेल, शंकर चाैधरी, जिल्ला उपसभापति रामनारायण कुर्मी,  जिल्ला सचिवद्वय दिनेश चौधरी, इम्तियाज आलम, सहसचिव नवीन सिंह, जगरनाथपुर गाउँपालिकाका अध्यक्ष श्रीकान्त यादव लगायतले शुभकामना मन्तव्य राखेका थिए ।

कार्यक्रममा मन्त्री रिजाललाई २ सय ५१ केजीको माला लगाएर स्वागत तथा सम्मानित गरिएको थियो ।

बेस्ट मिट मासु पसलले मासुको खरिदमा उपहार दिँदै

0

वीरगंज । पर्साको पावर हाउस चौकमा सञ्चानमा रहेको बेस्ट मिट मासु पसलले नयाँ वर्षको अवसरमा आफ्ना ग्राहकहरुको लागि विशेष अफर ल्याएर अहिले चर्चामा आएको छ । बेस्ट मिट मासु पसलमा मासुको खरिदमा ” हरेक दिन उपहार, हरेक दिन उमङ्ग” योजनाले अहिले उपभोक्ता पनि लाभम्भित भएका छन् ।

सो पसलमा ग्राहकले मासु किन्दा साथमा एउटा कुपन पाउँछन्, सो कुपनको माध्यमले हरेक दिन एक जना भाग्यमानी ग्राहकले आकर्षक उपहार पाउने गरेका छन् । अहिलेसम्म ७ दिनमा ७ जना ग्राहकले उपहार पाइसकेका छन । उपहार पाउनेहरूमा सञ्जित कुमार विन, चाँदनी झा, डा. कमलेश कुमार यादव, पुरुषाेत्म पटेल, सुरेन्द्र पण्डित, विनय प्रसाद दास र समीर बैठा रहेका छ्न ।

उनीहरू अलग-अलग ठाउँका विजेता हुन् । पुरस्कार पाइसकेका उनीहरूले पसलले संचालनमा ल्याएको यो योजनाले ग्राहकहरुको लागि खुशीको कुरा भएको प्रतिक्रिया दिएका छन । उनीहरूले ताजा र स्वच्छ मासुको साथ उपहार पाउने हुनाले यही पसल रोज्ने गरेको बताएका छन ।

बेस्ट मिट मासु पसलका सञ्चालक रामजी प्रसाद पटेलको अनुसार यो अफर वीरगंज पहिलो पटक ल्याईएको र यसलाई हामी निरन्तरता दिदै अझ आफ्ना ग्राहकको लागि थप सुविधाहरु बढाउदै जाने बताए । मासु भन्ने कुरा मानवको स्वास्थ्यसंग जोडिएको हुनाले हामीले आफ्ना ग्राहकको स्वास्थ्यलाई ध्यानमा राखी ताजा र फ्रेश मासु बेच्ने गरेको संचालक पटेलले बताए ।

उनको अनुसार यो पसलमा ग्राहकको स्वास्थसंग कुनै सम्झौता नहुने र एकचोटी आफ्नो पसलमा आएर भिजिट गर्न आम ग्राहकलाई अनुरोध गरे । उनले हामी दिनहुँ आफ्ना ग्राहकसँग सलाह, सुझाव लिएर काम गर्ने गरेको बताए । अहिले सो पसलमा ग्राहकहरुको दिनहु मासु किन्न लाईन लाग्ने गरेको देख्न सकिन्छ। वीरगंजमा यस्तो किसिमको पसलबाट अब यहाँका ग्राहकले ताजा र स्वच्छ मासु खान सक्ने वातावरण बन्दै गएको आकलन गर्न सकिन्छ ।

उपराष्ट्रपतिलाई चलचित्र नृत्य संघको बधाई ज्ञापन

0

वीरगंज । नेपाल चलचित्र नृत्य संघका कलाकारहरुले उपराष्ट्रपति रामसहाय प्रसाद यादवसंग भेटघाट गरेका छन् । मंगलबार उपराष्ट्रपति निवास लैनचौरमा संघका कलाकारहरुले उपराष्ट्रपति यादवलाई संघीय लोकतान्त्रिक गणतन्त्र नेपालको तेस्रो उपराष्ट्रपति निर्वाचित भएकोमा चलचित्र क्षेत्रको तर्फबाट बधाई एवं कार्यकाल सफलताको शुभकामना ज्ञापन गरेको हाे ।

संघले आयोजना गरेको शुभकामना आदान प्रदान तथा सम्मान समारोहमा उपराष्ट्रपति यादवलाई मायाको चिनो अर्पण गरिएको थियो । सो अवसरमा समारोहका प्रमुख अतिथि उपराष्ट्रिपति यादव समक्ष संघले चलचित्र क्षेत्रमा विद्यमान राष्ट्रिय समस्याहरुलाई समाधानका निम्ति सरकारसँग पहल गरिदिन आग्रह गरेको थियो ।

कार्यक्रममा संघका अध्यक्ष जनकबहादुर कार्की, कलाकार संघका अध्यक्ष मोहन निरौला लगायतले शुभकामना मन्तब्य राखेका थिए । कार्यक्रममा चलचित्र क्षेत्रसँग सम्बन्धित विभिन्न कलाकारहरुको उपस्थिति रहेको थियो ।

परिवर्तन नेपाल फाउन्डेसनकाे कार्यालय उदघाटन

0

वीरगंज । समाजिक संस्था परिवर्तन नेपाल फाउन्डेसनले आजदेखि आफ्नाे कार्यालय संचालनमा ल्याएकाे छ । वीरगंजकाे माइस्थान नजिक दुई नम्बर राेडमा संचालनमा आएकाे कार्यालयकाे साेमबार एक कार्यक्रमकाे बिच उदघाटन गरिएकाे हाे ।

कार्यक्रमका प्रमुख अतिथी जिल्ला प्रहरी कार्यालय पर्साका प्रहरी नायब उपरिक्षक निर्मल बुढाथाेकीले कार्यालयकाे उदघाटन गरेका हुन् ।

संस्थका अध्यक्ष रणधिर वर्णवालकाे अध्यक्षतामा भएकाे उदघाटन कार्यक्रममा भारत रक्सौलका इन्सपेक्टर मनोज शर्मा, सब इन्सपेक्टर अनिल शर्मा सहित बिभिन्न संघ/संस्थाका पदाधिकारी तथा प्रतिनिधिहरुकाे उपस्थिति रहेकाे‍ थियो ।

यस अघि संस्थाका पदाधिकारी तथा सदस्यहरुले कार्यालयकाे पुजापाठ गरेका थिए । समाजिक कार्यमा सक्रिय रहेकाे संस्थाकाे काम काज व्यवस्थित गर्न कार्यालय संचालनमा ल्याइएकाे संस्थाका सचिव बिशेष साहले वताए ।

उपेन्द्रकाे पक्षमा माहाेल बनाउन बारा आउँदै गठबन्धनका शिर्ष नेता

0

वीरगंज । आसन्न वैशाख १० गते हुनगइरहेको उपनिर्वाचनलाई लक्षित गर्दै बारा निर्वाचन क्षेत्र नम्बर २ मा पाँच दलीय गठबन्धनका शिर्ष नेताहरुको उपस्थितिमा वृहत चुनावी सभा हुने भएको छ ।

बार-२ मा पाँच दलीय गठबन्धनबाट प्रतिनिधिसभा सदस्य पदका उम्मेदवार बनेका जनता समाजवादी पार्टी नेपाल (जसपा) का अध्यक्ष उपेन्द्र यादवको पक्षमा माहोल बनाउन नेपाली कांग्रेस, नेकपा माओवादी केन्द्र, नेकपा (एकीकृत समाजवादी) र लोकतान्त्रिक समाजवादी पार्टी नेपाल (लोसपा) का शिर्ष नेताहरुको उपस्थितिमा महागढीमाई नगरपालिकास्थित बरियारपुरमा चुनावी सभा हुनलागेको हो ।

चुनावी सभाको मिति वैशाख ७ गते तोकिएको जसपाका प्रचार विभाग प्रमुख पूर्ण बस्नेतले जानकारी दिए । सभा बिहान ११ बजे सुरु हुने जसपाले जनाएको छ ।

चुनावी सभामा नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधवकुमार नेपाल, लोकतान्त्रिक समाजवादी पार्टी नेपालका अध्यक्ष महन्थ ठाकुर लगायत गठबन्धन दलका शीर्ष नेताहरूले सम्बोधन गर्ने कार्यक्रम रहेको छ । 

बारा २ मा चुनावी गणितले के भन्छ ?

0

कलैया । बारा क्षेत्र नं. २ मा उप-निर्वाचन नजिकिए संगै चुनावी सरगर्मी बढ्दै गएकाे छ । बैशाख १० गते हुने चुनाव अब मात्र ५ दिन वाकी रहँदा चुनावी प्रतिस्पर्धामा रहेका उम्मेदवारहरुले आफ्नाे चुनावी गतिविधिलाई समेत तिब्र पारेका छन् । यस क्षेत्रमा जनता समाजवादी पार्टी (जसपा) नेपालका राष्ट्रिय अध्यक्ष उपेन्द्र यादव समेत उम्मेदवार रहेका कारण झन चुनावी नतिजा चासाेकाे बिषय बनेकाे छ ।

यस क्षेत्रकाे चुनावी प्रतिस्पर्धामा जसपाका अध्यक्ष एवम् पूर्व उप प्रधानमन्त्री उपेन्द्र यादव सहित जनमत पार्टीका उम्मेदवार शिवचन्द्र कुशवाहा, नेकपा एमालेका उम्मेदवार पुरुषाेत्म पाैडेल, राष्ट्रिय स्वतन्त्र पार्टीका उम्मेदवार रमेश खरेल, आम जनता पार्टीका उम्मेदवार अरुण ज्ञवाली लगायत ३६ जना छन् । तर स्थानिय जानकारका अनुसार मुख्य प्रतिस्पर्धी यही पांच उम्मेदवार हुन् ।

जसपाका अध्यक्ष यादव पांच दलिय सत्ता गठबन्धनका उम्मेदवार हुन् । जुन गठनबन्धनमा जसपासहित नेपाली कांग्रेस, नेकपा माओवादी केन्द्र, नेकपा एकीकृत समाजवादी र लाेकतान्त्रिक समाजवादी पार्टी छन् । अरु दलका उम्मेदवार एकलै एकलै चुनावी प्रतिस्पर्धामा छन् ।

गत संघीय निर्वाचनमा जनमत पार्टीका उम्मेदवार शिवचन्द्र कुशवाहालाई ३ सय ४५ मत ले पराजित गर्दै जसपाका उम्मेदवार रामसहाय यादव विजयी भएका थिए । जुन अहिले उपराष्ट्रपति बनेपछि उप चुनाव हुन लागेकाे हाे । 

जसपा र एमालेका साझा उम्मेदवार बनेका जसपा नेता रामसहाय यादवले १३ हजार ८ सय २२ मत पाएर जित हासिल गरेका थिए । कांग्रेस–माओवादी गठबन्धनबाट उठेका माओवादीका शिवचन्द्र कुशवाहाले १३ हजार ४ सय ६८ मत पाए । जसपाबाटै बागी उठेका रामकिशोर प्रसाद यादवले ११ हजार ४३ मत पाएका थिए । जसपाका वागी बनेका रामकिशाेर अहिले उपेन्द्र यादवकाे साथमा छन् ।

मंसिरको चुनावमा यस क्षेत्रबाट राष्ट्रिय स्वतन्त्र पार्टीको उम्मेदवार नै थिएनन् । स्वतन्त्र भने धेरैजना उठेका थिए, तीमध्ये अरूण ज्ञवालीले ७ हजार ६ सय ९८ मत ल्याएका थिए । यहाँ जनमत पार्टीले २७ सय २५ र नागरिक उन्मुक्ति पार्टीले ११ सय ११ मत पाएका थिए ।

अर्कोतर्फ यस क्षेत्र अन्तर्गत पर्ने ५ स्थानीय तहमा जसपा र कांग्रेस २/२ वटामा विजयी भएका छन् भने एउटामा नेकपा एमाले विजयी भएकाे छ । ४४ वडा मध्ये १५ वडामा जसपाले एक्लै जितेको छ भने नेपाली कांग्रेसले १३ वटा वडाध्यक्ष जितेको छ । माओवादीले जितेका दुई र एकीकृत समाजवादी तथा लोकतान्त्रिक समाजवादीले जितेका एक/एक वडासमेत जोड्दा सत्ता गठबन्धनका भागमा ३४ वडा पर्दछन् । एमालेले १० वटा वडा जितेको छ ।

करैयामाई गाउँपालिका, देवताल गाउँपालिकामा जसपाका उम्मेदवार विजयी भएका छन् भने महागढीमाई नगरपालिका, सुवर्ण गाउँपालिकामा नेपाली काँग्रेसका उम्मेदवार विजयी भएका छन् । यसैगरि पचरौता नगरपालिकामा नेकपा एमालेका उम्मेदवार विजयी भएका छन् । 

नेकपा एमालेबाट महागढीमाई नगरपापिलकाको मेयरमा निर्वाचन लडेका नेता राजाबाबु साह समेत जसपामै सक्रिय छन् । उनी स्थानिय निर्वाचनमा महागढीमाई नगरपालिकाको मेयरमा दोश्रो स्थान प्राप्त गरेका थिए । प्रदेश सभा सदस्यमा स्वतन्त्रबाट चुनाव जितेका उनका बुवा शारदाशंकर प्रसाद साह यसअघि नै जसपामा प्रवेश गरि सकेछन् । उम्मेदवार यादवको घरदैलो अभियानमा प्रदेश सभा सदस्य शरदाशंकर साह र राजाबाबु साहको सक्रिय सहभागी रहेको देखिन्छ ।

जनमत पार्टीले माओवादी केन्द्रका नेता शिवचन्द्र कुशवाहालाई चुनावअघि भित्र्याएर उम्मेदवार बनाएको छ । जनमतबाट उम्मेदवार कुशवाहा भए पनि मतदाताको दैलोमा मत माग्न सिके बढी सक्रिय छन् । जसपाको बलियो संगठनको जगमा चुनाव लडेका यादवसँग नेपाली कांग्रेस, लोसपा, माओवादी केन्द्र र एकीकृत समाजवादीको समर्थन छ । घरदैलोमा यादवसँग समर्थक दलका स्थानीय नेता र जनप्रतिनिधि सँगसँगै हुन्छन् ।

एमालेले जितेका वडा र पालिकामा पनि कांग्रेस-जसपाको गठबन्धन बन्दा एमालेको मत कम हुने देखिन्छ । कारण, बारा-२ मा जसपा र कांग्रेस नै पहिलो र दोस्रो शक्ति हुन् । यसलाई वडा तहको शक्ति सन्तुलनले पुष्टि गर्छ ।

जस्तो-क्षेत्र नम्बर २ मा पर्ने कोल्हबी नगरपालिकाको वडा नम्बर ८ मा २७ सय मतदाता छन् । यहाँ एमालेले वडाध्यक्ष जितेको छ, तर दोस्रो र तेस्रो रहेका कांग्रेस र जसपाको मत जोड्दा एमाले कमजोर हुन जान्छ । एमालेले पालिका प्रमुख जितेको पचरौता नगरपालिकामा पनि जसपा र कांग्रेसको गठबन्धन हुँदा एमाले स्वतः अल्प मतमा पर्छ ।

यस निर्वाचन क्षेत्रमा पर्ने करैयामाई गाउँपालिका र देवताल गाउँपालिका प्रमुख जसपाले जितेको छ । ३३ हजार मतदाता रहेको महागढीमाई नगरपालिको मेयर कांग्रेसले जितेको छ, जहाँ जसपाको मत दोस्रो स्थानमा छ । जसपाले प्रमुख जितेको देवताल गाउँपालिकाका कुल ७ वडामध्ये कांग्रेस र जसपाले ३–३ वटा जितेका छन् भने लोसपाले एउटा जितेको छ । एमाले, जनमत कसैले पनि यहाँ जितेका छैनन् ।

करैयामाई गाउँपालिकाका कुल ८ वडामध्ये सत्ता गठबन्धनले ६ र एमालेले २ वडा जितेका छन् । जनमतले एउटै जितेको छैन । पचरौता नगरपालिकामा एमाले र जसपाले ४–४ वडा जितेका छन् भने लोसपाले एउटा जितेको छ । यहाँ पनि कांग्रेस–जसपा गठबन्धनको भोट एउटा ठाउँमा हुँदा एमाले स्वतः कमजोर हुन्छ ।

मंसिरमा यस निर्वाचन क्षेत्रभरिबाट करिब २७ सय मत ल्याएको जनमत पार्टीले ४४ मध्ये एउटा पनि वडा जितेको छैन । स्थानीय तहमा उसका उम्मेदवार प्रतिस्पर्धामै आएको देखिँदैन । माओवादीको मत कुशवाहाभन्दा बढी आम जनता पार्टीका अध्यक्ष प्रभु साहले आफ्ना उम्मेदवार अरूण ज्ञवालीतर्फ ट्रान्सफर गराउन सक्ने सम्भावना बढी छ ।

सिके राउत उम्मेदवारी दर्तादेखि नै बारामै बसेर उपेन्द्र यादवलाई हराउने रणनीति बुनिरहेका छन् । राउतले गढीमाई मन्दिरछेउमा कार्यालय स्थापना गरेका छन् । राउतलाई अहिलेसम्मको गणितले भने पटक्कै साथ दिएको छैन । उनी आफ्ना उम्मेदवारको पक्षमा मत माग्नुभन्दा पनि यादवबारे भ्रम फिँजाउन सक्रिय रहेको कोल्हबीका राकेश यादवले बताए । यस क्षेत्रको गणितले जनमत पार्टीको अवस्था एमालेको भन्दा कमजोर देखाउँछ ।

करिब ३० प्रतिशत यादव जातिको बसोबास रहेको यो क्षेत्र भारतीय सीमासँग जोडिएको छ । विकासका पूर्वाधार खासै नबनेको र कृषिमा निर्भर रहेको यस क्षेत्रमा करिब दुईतिहाई मधेशी समुदायको बसोबास छ ।

जसपाको बलियो संगठनात्मक पकड रहेको यस क्षेत्रमा कांग्रेस र माओवादीले समेत साथ दिँदा उपेन्द्र बलियो देखिन्छन् । तर सिके राउतले सप्तरीबाट आएर उठेको प्रचार भइरहेकाले यादवमाथि पनि जित निकाल्नु चुनौतीपूर्ण भने पक्कै छ ।

कुल २ लाख ३ हजार जनसंख्या रहेको बारा २ मा १ लाख ५ हजार २ सय ४८ जना मतदाता छन् । यादवपछि क्रमशः मुस्लिम, वैश्य, दलित समुदायका मतदाता रहेका छन् । पहाडे समुदायको प्रभाव कमै छ ।

०६४ साल पहिला यादव समुदायले प्रतिनिधित्व गरेको यो क्षेत्रमा २०६४ सालमा माओवादीबाट शिवचन्द्र कुश्वाहाले प्रतिनिधित्व गरेका थिए । त्यसपछि २०७० मा भएको संविधानसभा निर्वाचनमा कांग्रेसका रामअयोध्या यादवले प्रतिनिधित्व गरे । त्यसपछि २०७४ र २०७९ सालमा भएको प्रतिनिधिसभाको निर्वाचनमा रामसहाय प्रसाद यादव निर्वाचित भए ।

जगरनाथपुरमा वडा कार्यालय, बर्थिङ सेन्टर र प्रयाेगशालाकाे मन्त्री रिजालद्वारा उदघाटन

0

वीरगंज । पर्साकाे जगरनाथपुर गाउँपालिका वडा नं. ३ विजवनियामा नवनिर्मित वडा कार्याल भवन, बर्थिङ सेन्टर र जन स्वास्वास्थ्य प्रयाेगशालाकाे नेपाल सरकारका उद्योग, वाणिज्य तथा आपूर्ति मन्त्री रमेश रिजालले उदघाटन गरेका छन् ।

मन्त्री रिजालले एक कार्यक्रमकाे बिच नै वडा कार्यालय, बर्थिङ सेन्टर र प्रयाेगशालाकाे उदघाटन गरेका हुन् । गाउँपालिका कार्यालयले निर्माण सम्पन्न गरेकाे तीनै याेजनाकाे कार्यक्रमका प्रमुख अतिथी समेत रहेका मन्त्री रिजालले उद्घाटन गरेका हुन् ।

उद्घाटन समाराेहलाई सम्बाेधन गर्दै मन्त्री रिजालले गाउँपालिकाकाे शिक्षा र स्वास्थ्यकाे क्षेत्रमा सुधार जरुरी रहेकाे वताए । उनले त्यसकाे लागि नेपाल सरकारकाे तर्फबाट हुने सहयाेग गराउने प्रतिवद्धता समेत जनाए । 

गाउँपालिका अध्यक्ष श्रीकान्त प्रसाद यादवले वडा कार्यालय संचालनमा अब सहज  हुनुकाे साथै बर्थिङ सेन्टर र प्रयाेगशालाबाट स्थानियले सहजै सेवा पाउने वताए । उनले आफ्नाे कार्यकालमा शिक्षा र स्वास्थ्यकाे अवस्था सुधार गरेर छाडने वताए । 

उद्घाटन कार्यक्रममा नेपाली कांग्रेस पर्साका सभापति एवं प्रदेश सभा सदस्य जनार्दन सिंह क्षेत्री, प्रदेश सभा सदस्य शंकर चौधरी, कांग्रेस मधेश प्रदेशका महामन्त्री बृहस्पति कृष्ण श्रेष्ठ, महाअधिबेशन प्रतिनिधिहरु वशिष्ठ नारायण कुर्मी, सहरुम राउत गदि, रामदेव चौहान, कांग्रेस पर्साका प्रवक्ता रमेश पान्डे, जिल्ला सह सचीव नवीन सिंह, कोषाध्यक्ष प्रेम थापा, क्षेत्रीय सचीव बालिस्टर अहमद, मन्त्री रिजालका स्वाकिय सचिव राकेश यादव, प्रमुख प्रशासकिय अधिकृत कृष्ण नन्द राय, वडाध्यक्ष सुभाष यादव लगायतका उपस्थिति रहेको थियो । कार्यक्रमकाे संचालन गाउँपालिकाका स्वास्थ्य संयाेजक प्रभेन्द्र साहले गरेका थिए ।

जगरनाथपुरमा प्रथम अध्यक्ष कप क्रिकेट टुर्नामेन्ट सुरु, मन्त्री रिजालद्वारा उदघाटन

0

वीरगंज । पर्साकाे जगरनाथपुर गाउँपालिकामा प्रथम अध्यक्ष कप क्रिकेट टुर्नामेन्ट सुरु भएकाे छ । जगरनाथपुर गाउँपालिकाकाे आयाेजनामा सुरु भएकाे टुर्नामेन्टकाे नेपाल सरकारका उद्याेग वाणिज्य तथा आपुर्ति मन्त्री रमेश रिजालले उद्घाटन गरेका हुन् ।

मदुवाहा क्रिकेट मैदानमा सुरु भएकाे टुर्नामेन्टकाे उदघाटन गर्दै मन्त्री रिजालले खेलाडीहरुलाई अनुशासित भएर खेल्न आग्रह गरे । उनले खेलाडी देशकाे गहना भएकाे वताउँदै खेलाडी जहिले पनि अनुशासित हुनु पर्ने वताए । 

गाउँपालिका अध्यक्ष श्रीकान्त प्रसाद यादवकाे अध्यक्षतामा भएकाे उदघाटन कार्यक्रममा नेपाली कांग्रेस पर्साका सभापति एवम् प्रदेश सभा सदस्य जनार्दन सिंह क्षेत्री, कांग्रेस मधेश प्रदेशका महामन्त्री बृहस्पती कृष्ण श्रेष्ठ, नेपाली कांग्रेस पर्साका सह सचिव नविन सिंह, जगरनाथपुर गाउँपालिकाकी उपाध्यक्ष बबिता सिंह, मन्त्री रिजालका स्वकिय सचिव राकेश यादव, प्रमुख प्रशासकिय अधिकृत कृष्णनन्दन राय, वडाध्यक्ष सुभाष साह लगायतकाे सहभागिता रहेकाे थियाे ।  

आइतबार भएकाे उदघाटन खेलमा जगरनाथपुर गाउँपालिकाकाे वडा नं. ५ मसिहानी विजयी भएकाे छ । जगरनाथपुर गाउँपालिकाकाे वडा नं. २  जानकीटाेलालाई हराउँदै वडा नं. ५ विजयी भएकाे आयाेजकले जनाएकाे छ ।

१४ ओभरकाे खेलमा टच हारेर ब्याटिङ गरेकाे वडा नं. २ जानकीटाेलाले १३ ओभर मै पुरै विकेटकाे नाेक्सानीमा १३४ रन बनाएकाे थियाे । त्यसपछि जवाफी ब्याटिङमा उत्रेकाे वडा नं. ५ मसिहानीले १० ओभर मै २ बलमा ४ विकेटकाे नाेक्सानीमा लक्ष्य पुरा गर्दै जित हाँसिल गरेकाे थियाे ।

उद्योगमन्त्री रिजाललाई गृह गाउँमा भव्य स्वागत तथा सम्मान

0

वीरगंज । नवनियुक्त उद्योग वाणिज्य तथा आपूर्ति मन्त्री रमेश रिजाललाई गृह गाउँ पर्साकाे जगरनाथपुर गाउँपालिका वडा न‌ं. ५ मसिहानी, धर्मपुरमा भव्य स्वागत तथा सम्मान गरिएकाे छ ।

मन्त्री भएपछि पहिलो पटक आफ्नो गृह गाउँ धर्मपुर पुगेका रिजाललाई एक कार्यक्रमकाे बिच भव्य स्वागत तथा सम्मान गरिएकाे हाे । नेपाली कांग्रेस पर्सा क्षेत्र नं. ४ काे क्षेत्रिय समितिले आयाेजना गरेकाे कार्यक्रममा नवनियुक्त मन्त्री रिजालाई ५१ किलाेकाे फुलकाे मालाले स्वागत तथा सम्मान गरिएकाे थियाे । 

स्वागत तथा सम्मान कार्यक्रमलाई सम्बाेधन गर्दै मन्त्री रिजालले आफु जनताको सेवक रहेको तथा हरदम जनताको सेवामा समर्पित रहने प्रतिबद्धता जनाए । मन्त्री रिजालले हरबखत आफुलाई मार्गदर्शन गर्न एव सचेत गराउन समेत जिल्लाबसीलाई आग्रह गरेकाे उनकाे स्वकिय सचिव राकेश यादवले वताए ।

क्षेत्रिय सभापति एवम् जगरनाथपुर गाउँपालिकाका अध्यक्ष श्रीकान्त प्रसाद यादवकाे अध्यक्षतामा भएकाे स्वागत तथा सम्मान कार्यक्रममा कांग्रेस पर्साका सभापति एवम् प्रदेश सभा सदस्य जनार्दन सिंह क्षेत्री, प्रदेश सभा सदस्य शंकर चाैधरी, कांग्रेस मधेश प्रदेशका महामन्त्री बृहस्पती श्रेष्ठ, जिल्ला उपसभापति रामनारायण कुर्मी, कांग्रेस पर्साका सचिव एवम् वीरगंज महानगरपालिकाका उपमेयर इम्तियाज आलम, कांग्रेस पर्साका सहसचिव नवीन सिंह लगायतकाे सहभागिता रहेकाे थियाे भने कार्यक्रमकाे संचालन क्षेत्रिय सचिव बलिष्टर अहमदले गरेका थिए ।

यस अघि पनि मन्त्री रिजाललाई बाराको सिमरा विमान स्थलमा भव्य स्वागत गरिएको थियाे । मन्त्री भएपछि पहिलो पटक आफ्नो गृह जिल्ला पर्सा आउने क्रममा आइतबार सिमरा विमानस्थलमा नेपाली कांग्रेसका नेता कार्यकर्ताहरुले मन्त्री रिजाललाई भव्य स्वागत गरेका थिए । त्यसपछि उनी पार्टी कार्यालय हुँदै गृह गाउँ पुगेका थिए ।

आफु उम्मेदवार हुँ, भन्दै सिके राउत फर्जी गर्दै छन् : उपेन्द्र यादव

0

कलैया । बारा क्षेत्र २ बाट प्रतिनिधी सभा सदस्यका पाँच दलिय गठनबन्धनका उम्मेदवार उपेन्द्र यादवले विकास र समृद्धीका लागि आफूलाई साथ दिन आग्रह गरेका छन् । चुनावी प्रचारका क्रममा उनले यहाँका आधारभूत समस्याहरु बारे आफू जानकार भइसकेको बताउँदै जीते लगत्तै समाधानका लागि पहल गर्ने बताए ।

आईतबार महागढीमाई नगरपालिकाको मलहनी, दहियार, बगडमपुर लगायतका क्षेत्रमा चुनावी प्रचार तथा जनता दर्शनका क्रममा स‌चारकर्मीसंग कुराकानी गर्दै उनले यस्तो बताएका हुन् । उनले शिक्षा, स्वास्थ्य, आवास, सडक, यातायात, कृषि लगायतका आधारभूत विषयहरुमा योजना निर्माण गरि कार्यान्वयन गर्नु आफ्नो प्राथमिकतामा रहने स्पष्ट पारेका छन् ।

यहाँका स्थानियहरु, राष्ट्रियभन्दा पनि स्थानिय मुद्दाको सम्बोधन चाहन्छन् । गठबन्धनले ती मुद्दाहरुको सम्बोधन गर्छ भन्ने विषयको आधार के ? भन्ने संचारकर्मीहरुकाे प्रश्नमा यादवले संघ र प्रदेश सरकारमा जसपा सामेल रहेको बताउँदै जीते लगत्तै दुवै तहको सरकारसँगको समन्वयमा यहाँका समस्याहरुको समाधानका लागि लागि पर्ने जिकिर गरे । “यहाँको विकास गठबन्धनबाट मात्र सम्भव छ, अरुले गर्ने भए गरिसक्थे” उनले भने ।

उनले यस क्षेत्रमा आफ्नो विकल्प नभएको बताए । चुनावी अभियानमा आफूभन्दा पनि बढी उत्साहित यहाँका जनताकाे रहेको यादवले बताए । चुनावी प्रचारका क्रममा गाउँ–गाउँ पुग्दा त्यहाँका जनताबाट प्राप्त साथ र समर्थनले आफू भित्र झनै उर्जा थपिदिएको उनको प्रतिक्रिया छ । “यहाँका स्थानियहरु म भन्दा बढी उत्साहित हुनुहुन्छ, उहाँहरु स्वयम् मेरो लागि आफ्नो टोल छिमेकमा मत माग्दै हुनुहुन्छ, म असाध्यै हर्षित छु” उनले भने ।

स्थानियहरुबाट प्राप्त सदासयताले आफूलाई झनै बढी जिम्मेवार बनाएको उनको तर्क छ ।

यता, यादवले सिके राउतलाई फर्जी नेताको संज्ञा दिएका छन् । आफ्नो उम्मेदवारलाई जिताउन गाउँ–गाउँमा राउतले आफू नै उम्मेदवार भएको भन्दै यस्तो अनैतिक क्रियाकलाप गर्ने नेता फर्जी बाहेक अरु हुनै नसक्ने बताए । यस्ता फर्जी नेताहरुबाट सचेत रहनका लागि यादवले आग्रह समेत गरे ।