Date
सोम, कार्तिक ३०, २०८३
Mon, November 16, 2026
Home Blog Page 529

रक्तदाता दिवसकाे अवसरमा सम्मान कार्यक्रम सम्पन्न

0

वीरगंज । विश्व रक्तदाता दिवसकाे अवसरमा पर्सामा विभिन्न कार्यक्रम सम्पन्न भएकाे छ । दिवसकाे अवसरमा ब्लड डोनर्स एशोसिएशन पर्साकाे आयाेजनामा बुधबार सम्मान कार्यक्रम सम्पन्न भएकाे छ ।

कार्यक्रमका प्रमुख अतिथि नगर प्रमुख राजेशमान सिंहले शरीरको रगत त्यत्तिकै खेर जाने भएकोले रक्तदान गर्न आग्रह गरे । उनले रक्तदान गर्नेहरुको स्वास्थ्य अवस्था सुदृढ हुने र आफुले पनि रक्तदान गर्दै आएको
बताए । उनले स्वस्थ अवस्थाका १८ वर्षमाथि र ६० वर्ष मुनिका सबैलाई रक्तदान गर्न आग्रह गरे ।

ब्लोदान पर्साका अध्यक्ष शत्रुघ्न नेपालको अध्यक्षतामा भएको कार्यक्रममा सामुदायिक सेवा केन्द्र छपकैयाका अध्यक्ष ग्यासुद्दीन ठकुराई, रेडियो वीरगंजका अध्यक्ष ध्रुव साह, नेगेटिभ रक्त समूहका निशान्त लामिछाने लगायतले मन्तव्य व्यक्त गरेका थिए ।

कार्यक्रममा २०७९ वैशाखदेखि चैतसम्म सय पिन्ट रक्तदान गर्ने २३ वटा संस्था, सोही अवधिमा दुई पटक वा सोभन्दा बढी रक्तदान गर्ने सङ्घ/संस्था, आकस्मिक रक्तदान गर्ने २९ जना रक्तदाता, २३ जना दुर्लभ रक्तदाता,
प्रत्येक तीन/तीन महीनामा रक्तदान गर्ने पाँचजना स्वयंसेवी रक्तदाता र रक्तदान कार्यक्रममा जूस सहयोग गर्ने डाबर नेपाल, आर्थिक तथा भौतिक सहयोग गर्ने सञ्जु साह, रामबाबू सिंहलगायतलाई सम्मान समेत गरिएको थियो ।

वीरगंजस्थित राणीसति अतिथि सदनमा भएकाे कार्यक्रममा ब्लोदानका सदस्य शिवजी गुप्ताले स्वागत र सचिव अरविन्द सिंहले सहजीकरण गरेका थिए ।

रक्तदान उत्प्रेणा कार्यक्रम सम्पन्न

यसैबीच नेपाल रेडक्रस सोसाइटी पर्सा शाखाले उपशाखाहरुको सहकार्यमा बहुदरमाई नगरपालिकाको  दुई स्थानमा विश्व रक्तदाता दिवसको अवसरमा रक्तदान उत्प्रेरणा कार्यक्रम सम्पन्न गरेको छ ।

नेरेसो भौराटारका अध्यक्ष काशी साह र गम्हरिया शाखाका अध्यक्ष मौलाद्दीन मियाँको अध्यक्षतामा भएको उत्प्रेरणा कार्यक्रममा नेरेसो पर्साका सभापति वीरेन्द्रराज कँडेल, रक्तसञ्चार केन्द्र वीरगंजका प्राविधिक प्रमुख सौरभराज पाण्डे र नेरेसो उपशाखा रेशमकोठीका लालबाबू सिंहले रक्तदान सम्बन्धी सहभागीहरुलाई तालीममार्फत सचेत गराएका थिए ।

रक्तदान कार्यक्रम सम्पन्न        

यसैगरी दिवसको अवसरमा पर्सा र बारामा तीनवटा संस्थाले रक्तदान कार्यक्रम सम्पन्न गरेका छन् । नेरेसो पर्सा शाखाले रक्तसञ्चार केन्द्र वीरगंजमा रक्तदान गरेको केन्द्रका प्राविधिक प्रमुख पाण्डेले बताए ।

नारायणी वयोधा मेडिसिटी अस्पतालले आयोजना गरेको रक्तदान कार्यक्रममा सात जना महिलासहित ४१ जनाले रक्तदान गरेको प्राविधिक धीरेन्द्र झाले बताए ।

बाराको छातापिपरामा सौरभ फूड कन्सर्नले आयोजना गरेको रक्तदान कार्यक्रममा २९ जनाले रक्तदान गरेका
थिए ।

रक्तदातालाई धन्यावाद दिन मनाइने दिवस

हरेक वर्षको जुन १४ अर्थात असार ३१ का दिन विश्वभरका देशले विश्व रक्तदाता दिवस मनाउने गर्छन् । यस दिवसमा सुरक्षित रगत र रगत उत्पादनको आवश्यकताबारेमा सचेतना जगाउन र रक्तदान गर्न प्रेरित गर्दै आइएको छ । रक्तदातालाई धन्यावाद दिने दिनका रूपमा पनि मनाउने गरिन्छ ।

यस वर्ष ‘नियमितरूपमा रगत तथा प्लाज्मा दान गरौँ, जीवन बचाउने कार्यमा हातेमालो गरौँ’ भन्ने नाराका साथ विश्व रक्तदाता दिवस मनाइएकाे हाे । नाराले जीवनपर्यन्त रगत आवश्यक पर्ने बिरामीलाई रगत र प्लाज्मा दान गरेर सहयोग गर्न हरेक व्यक्तिले खेल्ने भूमिकाको महत्वलाई दर्शाएको छ ।

यसले नियमितरूपमा रगत र प्लाज्माको दानमार्फत दिगो र सुरक्षित आपूर्तिको महत्वबारेसमेत चर्चा गरेको छ ।

रक्तदाता दिवसमा पर्सामा रक्तदान गर्न उत्प्रेरणा जगाइदै

0

 वीरगंज । विश्व रक्तदाता दिवस पर्सामा पनि विभिन्न सचेतनामूलक कार्यक्रम गरी मनाइएकाे छ । हरेक वर्षको जुन १४ का दिन विश्वभरका देशले विश्व रक्तदाता दिवस मनाउने गर्छन् । यस दिवसमा सुरक्षित रगत र रगत उत्पादनको आवश्यकताबारेमा सचेतना जगाउन र रक्तदान गर्न प्रेरित गर्दै आइएको छ । रक्तदातालाई धन्यावाद दिने दिनका रूपमा पनि मनाउने गरिन्छ ।

यस वर्ष ‘नियमितरूपमा रगत तथा प्लाज्मा दान गरौँ, जीवन बचाउने कार्यमा हातेमालो गरौँ’ भन्ने नाराका साथ विश्व रक्तदाता दिवस मनाइँदै छ । नाराले जीवनपर्यन्त रगत आवश्यक पर्ने बिरामीलाई रगत र प्लाज्मा दान गरेर सहयोग गर्न हरेक व्यक्तिले खेल्ने भूमिकाको महत्वलाई दर्शाएको छ । यसले नियमितरूपमा रगत र प्लाज्माको दानमार्फत दिगो र सुरक्षित आपूर्तिको महत्वबारेसमेत चर्चा गरेको छ । यही अवसरमा देशभर जस्तै पर्सामा पनि रक्तदान उत्प्रेरणा कार्यक्रम सम्पन्न भएकाे छ । 

नेपाल रेडक्रस साेसाइटी पर्सा शाखाकाे आयाेजनामा बहुदरमाई नगरपालिकाकाे भौराटार र गम्हरीयामा रक्तदान उत्प्रेरणा कार्यक्रम सम्पन्न भएकाे हाे । कार्यक्रममा रेडक्रस पर्साका सभापति बिरेन्द्र राज कडेल, रक्त संचार केन्द्र वीरगंजका प्रमुख सराैभ राज पाण्डे लगायतकाले रक्तदानकाे महत्व बारे प्रकाश पारेका थिए ।

यस दिवसका अवसरमा रक्तदानसम्बन्धी जनचेतना फैलाउने, दातालाई प्रोत्साहन गर्ने र रक्तदानको कार्यक्रम आयोजना गर्ने गरिएकाे छ ।

यस दिनलाई मानव रगतको समूह पत्ता लगाउने वैज्ञानिक डा कार्ल ल्याण्डस्टाइनरको जन्मदिन जुन १४ को अवसर पारेर हरेक वर्ष विश्व रक्तदाता दिवस मनाइन्छ । पहिलो विश्व रक्तदाता दिवस सन् २००४ मा मनाइएको थियो भने सन् २००५ मा ५८औँ विश्व स्वास्थ्यसभाद्वारा वार्षिक विश्वव्यापी कार्यक्रमको रूपमा नामकरण गरिएको थियो ।

महासचिव एलनकाे वीरगंजमा स्वागत तथा सम्मान

0

वीरगंज । समाजवादी प्रेस संगठन नेपालका नवनिर्वाचित महासचिव रामकुमार एलनकाे मंगलबार वीरगंजमा स्वागत तथा सम्मान गरिएकाे छ । समाजवादी प्रेस संगठनकाे केन्द्रिय महासचिवमा निर्वाचित भएपछि पहिलाे पटक वीरगंज आएका मधेशलदृष्टिका सम्पादक एलनलाई स्वागत तथा सम्मान गरिएकाे हाे ।

समाजवादी प्रेस संगठन पर्साले एक अनाैपचारिक कार्यक्रमकाे बिच महासचिव एलनलाई गम्छा र अबिरकाे टिका लगाएर स्वागत तथा सम्मान गरेकाे समाजवादी प्रेस संगठन पर्साका सह सचिव विनाेद पटेलले वताए ।

साे कार्यक्रममा मधेशदृष्टिका अध्यक्ष ध्रुव साह, समाजवादी प्रेस संगठन नेपालका सचिव बृजलाल पासवान, केन्द्रिय सदस्य एवम् पर्सा अध्यक्ष मनाेज पटेल, उपाध्यक्ष शम्भु कुमार सुमन, काेषाध्यक्ष हरिशंकर शर्मा, दलित पत्रकार संघ पर्साका अध्यक्ष श्याम पासवान लगायतले महासचिव एलनलाई गम्छा र अविरकाे टिका लगाएर स्वागत तथा सम्मान गरेका थिए ।

साेही अवसरमा मंगलबार नै चाइना भ्रमणकाे लागि प्रस्थान गर्न लागेका महासचिव एलनलाई सफल यात्राकाे शुभकामनासहित बिदाई समेत गरिएकाे थियाे ।  

एलन समाजवादी प्रेस संगठन नेपालकाे महासचिवमा शनिबार नै विजयी भएका थिए । संगठनकाे प्रथम महाधिवेशन अन्तर्गत शनिबार भएकाे निर्वाचनमा उनी एक सय ३९ मतले ल्याएर विजयी भएका थिए । उनका प्रतिस्पर्धी हृदय भुसालले एक सय ३० मत प्राप्त गरेका थिए ।

महानगरले शिक्षा क्षेत्रमा सुधार गरेको छ : मेयर सिंह

0

वीरगंज । वीरगंज महानगरपालिकाका मेयर राजेशमान सिंहले बालबालिकाहरुको भविष्यका लागि शिक्षा र समाजिक क्षेत्रमा सुधारको थालनी गरेको बताएका छन् ।

वीरगंज महानगरपालिकाको सहयोगमा सामुदायिक रेडियो नारायणी एफ.एम.१०३.८ मेगाहर्जले आयोजना गरेको ‘बालबालिकासँग मेयर’ कार्यक्रममा बोल्दै मेयर सिंहले आफूले वीरगंजकाे विकासका लागि शैक्षिक उपलब्धि भन्दा पनि दीर्घकालिन सोचका साथ काम गर्न खोजेको बताए ।

विगतका दिनमा सहीलाई सही र गलतलाई गलत भन्न नसकेकै कारणले वीरगंज विकासमा पछि परेको बताउँदै अहिलेका पुस्ताले सही कुरा गर्न कसैसँग डराउनुपर्ने आवश्यकता नरहेको बताए । उनले समाजमा भएको गलत क्रियाकलापहरुको खुलेर बोल्न र प्रतिवाद गरेर समाज परिवर्तनका लागि अगाडि आउने वातावरण बनाउनुपर्नेमा जोड दिए ।

बालश्रम, बालमैत्री शासनको विषयमा महानगरपालिकाले लिएको नीतिको बारेमा सहभागी बालबालिकाहरुले गरेको प्रश्नको जवाफ दिदै उनले बोलीमा भन्दा पनि व्यवहारमा देखिने काम गर्ने प्रतिबद्धता व्यक्त गरे ।

विगतमा खुला दिसामुक्त क्षेत्र घोषणा गरिएको, बालमैत्री वडा घोषणा गरिएको भए पनि अहिले फेरी उस्तै अवस्था देखिएकोले त्यसलाई दीर्घकालिन रुपमा समाधान गर्न र सडक बालबालिकाहरुको लागि शिक्षा, स्वास्थ्य र भविष्यको विषयमा पनि महानगरपालिकाले जिम्मेवारीपूर्ण ढंगबाट काम गर्ने उनकाे भनाई थियाे।

नारायणी एफ.एम.का कार्यक्रम संयोजक शिवनाथ यादवले सहजीकरण गरेको कार्यक्रममा वीरगंजका विभिन्न विद्यालय र कलेजका विद्यार्थीहरुको सहभागिता रहेको थियो ।

टिबडेवालद्वारा २६ धुर जग्गा महानगरलाई दान

0

वीरगंज । वीरगंज महानगरपालिकाकाे वडा नम्वर ८ का प्रेम कुमार टिबडेवालले २६ धुर जग्गा महानगरलाई हस्तान्तरण गरेका छन् । वीरगंज पब्लिक कलेज अगाडी रहेको मन्दिरसहितको जग्गा टिबडेवालले महानरलाई रजिष्ट्रेसन पास गरेर हस्तान्तरण गरेका हुन् ।

जिल्ला मालपोत कार्यालय पर्सामा मंगलबार रजिष्ट्रेसन पास गरेर टिबडेवालले महानगरलाई लालपुर्जा हस्तान्तरण गरेकाे वीरगंज महानगरपालिकाले जनाएकाे छ । मालपोतमा लाग्ने लाभकरसमेत आफैंले तिरेर टिबटेवालले अहिलेको बजार मूल्य अनुसार करिब ५ करोड भन्दा बढी मूल्यको जग्गा महानगरलाई दान गरेकाे महानगरका मेयरकाे सचिवालयले जनाएकाे छ ।

जग्गा हस्तान्तरण गर्दै टिबडेवालले खुला स्थान नरहेको स्थानमा नागरिकलाई सहज होस भनेर सार्वजनिक प्रयोगका लागि आफूहरुले महानगरको नाममा जग्गा उपलब्ध गराएको बताए । विगतमा सार्वजनिक हितका लागि नै मन्दिर बनाएर उक्त जग्गा प्रयोग भइरहेको र आउने दिनमा झनै व्यवस्थित गर्दै महानगरले पार्क बनाइदियोस भन्ने आफूहरुको धारणा रहेको पनि उनले वताए ।

‘हामीले त यो जग्गा पब्लिक प्रयोगकै लागि राख्ने भनेर पहिलेदेखि मन्दिर बनाएर छाडेका थियौँ,’ उनले भने, ‘त्यसलाई अझै व्यवस्थित बनोस भनेर अहिले महानगरलाई हस्तान्तरण गरेका हौँ ।’

महानगरको नाममा रजिष्ट्रेसन गरिएको जग्गा धनि पुर्जा ग्रहण गर्दै महानगरपालिकाका मेयर राजेशमान सिंहले सार्वजनिक हितका लागि जग्गा उपलब्ध गराउने जग्गा दाता टिबडेवाललाई दोसल्ला ओढाएर सम्मान गरेका थिए ।

कतिपय व्यक्ति सार्वजनिक जग्गा अतिक्रमण गरेर प्रयोग गर्न उद्धत भइरहेको अवस्थामा टिवडेवालले करोडौँ पर्ने जग्गा सार्वजनिक प्रयोगका लागि महानगरलाई दिनु सह्रानीय कार्य रहेको भन्दै सबैका लागि उदाहरणीय बन्नु भएको पनि बताए ।

वडा नम्वर ८ का वडाध्यक्ष रितेश कुमार गुप्ताको सक्रियतामा मंगलबार जग्गा दाता टिबडेवालले जग्गा नामसारी गरेर महानगरको नाममा रजिष्ट्रेसन गरेर हस्तान्तरण गरेका हुन् ।

पर्साका पालिकाहरूको झण्डै ७ अर्ब बेरूजु

0

जितेन्द्र यादव /
पोखरिया । पर्साका पालिकाहरूको बेरूज रकम झण्डै ७ अर्ब पुगेको पाइएको छ । महालेखा नियन्त्रक कार्यालयले सार्वजनिक गरेको २०७९ सालको वार्षिक लेखापरीक्षण प्रतिवेदन अनुसार पर्सामा एक महानगरपालिका, तीन नगरपालिका र दश गाउँपालिका गरि १४ वटा स्थानीय तहको हालसम्मको अद्यावधिक बेरूजु रकम रू. ६ अर्व ९६ करोड ४७ लाख २८ हजार पुगेको हाे ।

चार नगरपालिकाहरू मध्ये वीरगंज महानगरपालिकाको सबैभन्दा बढी अद्यावधिक बेरूजु रू.३ अर्व ३४ करोड ६३ लाख २ हजार र पर्सागढी नगरपालिकाको सबैभन्दा कम अद्यावधिक बेरूजु रू.२७ करोड ८ लाख ७२ हजार पुगेको प्रतिवेदनबाट देखिएको छ ।

त्यसैगरी १० वटा गाउँपालिकाहरू मध्ये सबैभन्दा बढी अद्यावधिक बेरूजु जगरनाथपुर गाउँपालिकाको रू. ५५ करोड ४ लाख २० हजार र सबै भन्दा कम पकाहाँ मैनपुर गाउँपालिकाको बेरूजु रू. १३ करोड ५५ लाख ७५ हजार रहेको छ ।

पर्साका पालिकाहरूमा आर्थिक वर्ष २०७८/०७९ को लेखापरीक्षणबाट असूल गर्नुपर्ने रकम रू. ३८ करोड १८ लाख ३६ हजार, प्रमाण कागजात पेश गर्नुपर्ने रू.५३ करोड ३४ लाख ९१ हजार, नियमित गर्नुपर्ने रू. २९ करोड ७५ लाख ५१ हजार, पेश्की रू.१५ कराेड ४५ लाख ८७ हजार गरि रू.१ अर्ब ३४ करोड ३३ लाख ८८ हजार बेरूज रहेको पाइएको छ ।

गत वर्षसम्मको बेरूजु रू.५ अर्ब ६३ करोड १२ लाख ५८ हजार रहेकोमा हालसम्मको बेरूजु रू. ६ अर्ब ९६ करोड ४७ लाख २८ हजार रहेको छ । प्रतिवेदन अनुसार अधिकांश पालिकाहरू असूल गर्नुपर्ने रकम फर्छयौट गर्न पहल गरेको देखिदैन ।

वीरगंज महानगरपालिका
महालेखा परीक्षक कार्यालयले सार्वजनिक गरेको २०७९ सालको वार्षिक प्रतिवेदन अनुसार आ.व. २०७८/०७९ को लेखापरीक्षणबाट वीरगंज महानगरपालिकाकाे रू. ६७ करोड ७८ लाख १० हजार बेरूजु रहेको देखिएको छ । महानगरपालिकाको बाँकी बेरूजु असूल गर्नुपर्ने रू. २४ करोड ९ लाख ७० हजार, प्रमाण कागजात पेश गर्नुपर्ने रू. २२ करोड ५३ लाख ५८ हजार, नियमित गर्नुपर्ने रू.१२ करोड ३८ लाख ५४ हजार, पेश्की रू. ८ करोड ७६ लाख २८ हजार रहेको छ । महानगरपालिकाको गत वर्षसम्मको बेरूजु रू. २ अर्ब ६६ करोड ८४ लाख ९२ हजार रहेकोमा हालसम्मको अद्यावधिक बेरूजु रकम रू. ३ अर्व ३४ करोड ६३ लाख २ हजार रहेको छ ।

बहुदरमाई नगरपालिका
लेखापरीक्षणबाट बहुदरमाई नगरपालिकाको रू.५ करोड ३५ लाख ३ हजार बेरूज रहेको देखिएको छ । बाँकी बेरूजु असूल गर्नुपर्ने रू. ६७ लाख ७७ हजार, प्रमाण कागजात पेश गर्नुपर्ने रू. २ करोड ७६ लाख ४० हजार, नियमित गर्नुपर्ने रू.१ करोड ९० लाख ८६ हजार र पेश्की शुन्य रहेको छ । पालिकाको गत वर्षसम्मको बाँकी बेरूजु रू. २६ करोड १२ लाख ४ हजार रहेकोमा हालसम्मको अद्यावधिक बेरूजु रू.३१ करोड ४७ लाख ७ हजार रहेको छ ।

पर्सागढी नगरपालिका
आर्थिक वर्ष २०७८/०७९ को वार्षिक लेखापरीक्षणबाट पर्सागढी नगरपालिकाको रू. ४ करोड ६२ लाख ३८ हजार बेरूजु देखिएको छ । बाँकी असूल गर्नुपर्ने रू. १ करोड ३४ लाख २४ हजार, प्रमाण कागजात पेश गर्नुपर्ने रू. २ करोड ६९ लाख ८० हजार, नियमित गर्नुपर्ने रू. ६ लाख २५ हजार र पेश्की रू. ५२ लाख ८ हजार रहेको छ । नगरपालिकाकाे गत वर्षसम्मको बेरूजु रू.२२ करोड ४६ लाख ३४ हजार रहेकोमा हालसम्मको अद्यावधिक बेरूजु रू.२७ करोड ८ लाख ७२ हजार रहेको छ ।

पोखरीया नगरपालिका
आर्थिक वर्ष २०७८/०७९ को लेखापरीक्षणबाट पाेखरिया नगरपालिकाकाे बेरूजु रू.८ करोड ५६ लाख ३३ हजार, असूल गर्नुपर्ने रू. ६४ लाख ६५ हजार, प्रमाण कागजात पेश गर्नुपर्ने रू.३करोड ५३ लाख ६ हजार, नियमित गर्नुपर्ने रू. १ करोड ९६लाख ८९ हजार, पेश्की रू. २ करोड ४१ लाख ७३ हजार रहेको छ । नगरपालिकाकाे गतवर्षसम्मको बाँकी बेरूजु रू. ३१ करोड ७८ लाख ९८ हजार रहेकोमा हालसम्मको अद्यावधिक बेरूजु रू.४० करोड ३५ लाख ३१ हजार रहेको छ ।

छिपहरमाई गाउँपालिका
आर्थिक वर्ष २०७८/०७९ को लेखापरीक्षणबाट छिपहरमाई गाउँपालिकाकाे रू.२ करोड ६४ लाख ७७ हजार बेरूजु देखिएको छ । असूल गर्नुपर्ने रू. ६३ लाख १२ हजार, प्रमाण कागजात पेश गर्नुपर्ने रू. ४५ लाख ३३ हजार, नियमित गर्नुपर्ने रू. १ करोड ५६ लाख ३२ हजार रहेको छ । गाउँपालिकाको गत वर्षसम्मको रू.२२ करोड ८९ लाख ९९ हजार बेरूजु बाँकी रहेकोमा सम्मपरीक्षणबाट रू २ लाख ५ हजार फर्छ्यौट भई हालसम्मको अद्यावधिक बेरूजु रू.२५ करोड ५२ लाख ७१ हजार रहेको छ ।

सखुवा प्रसाैनी गाउँपालिका
सखुवा प्रसाैनी गाउँपालिकाको आ.व. २०७८/०७९ को लेखापरीक्षण बाट असूल गर्नुपर्ने रू. ८४ लाख ८१ हजार , प्रमाण कागजात पेश गर्नुपर्ने रू.१ करोड ९७ लाख ७० हजार , नियमित गर्नुपर्ने रू.१ करोड ४९ लाख २४ हजार , पेश्की रू. ६७ लाख ५५ हजार गरी बेरूजु रू.४ करोड ८१ लाख ३० हजार रहेको छ । गत वर्षसम्मको बेरूजु रू.२७ करोड ८२ लाख ३२ हजार रहेकोमा हालसम्मको अद्यावधिक बेरूजु रू.३२ करोड ६३ लाख ६२ हजार रहेको छ ।

धोबिनी गाउँपालिका
आर्थिक वर्ष २०७८/०७९ को लेखापरीक्षणबाट धाेबिनी गाउँपालिकाे असूल गर्नुपर्ने रू.१ करोड १ लाख ९५ हजार, कागजात पेश गर्नुपर्ने रू. १० लाख ९८ हजार, नियमित गर्नुपर्ने रू. १ करोड ६७ लाख ९८ हजार, पेश्की रू.२८ लाख ४२ हजार गरी बेरूजु रू. ३ करोड ९ लाख ३३ हजार रहेको छ । गत वर्षसम्मको बेरूजु रू. २० करोड ३२ लाख ६० हजार रहेकोमा हालसम्मको अद्यावधिक बेरूजु रू. २३ करोड ४१ लाख ९३ हजार रहेको छ ।

कालिकामाई गाउँपालिका
कालिकामाई गाउँपालिकाको आव २०७८/०७९ को लेखापरीक्षणबाट असूल गर्नुपर्ने रू. ७२ लाख ९५ हजार , कागजात पेश गर्नुपर्ने रू.२ करोड ८० लाख ३० हजार, नियमित गर्नुपर्ने रू.३८ लाख ५९ हजार पेश्की रू. ४५ लाख ९ हजार गरी बेरूजु रू.५ करोड १३ लाख २८ हजार रहेको छ । गत वर्षसम्मको बेरूजु रू. १२ करोड १६ लाख २९ रहेकोमा हालसम्मको अद्यावधिक बेरूजु रू.१६ करोड ५३ लाख २२ हजार रहेको छ ।

ठोरी गाउँपालिका
ठाेरी गाउँपालिकाको आव २०७८/०७९ को लेखापरीक्षण बाट असूल गर्नुपर्ने रू. ३७ लाख ९८ हजार, प्रमाण कागजात पेश गर्नुपर्ने रू. १ करोड ५२ लाख ३७ हजार, नियमित गर्नुपर्ने रू. ५८ लाख ६४ हजार, पेश्की रू. २४ लाख ५० हजार गरी बेरूजु रू.२ करोड ७३ लाख ४९ हजार रहेको छ । गत वर्षसम्मको बेरूजु रू.२२ करोड ११ लाख ७९ रहेकोमा अद्यावधिक बेरूजु रू. २४ करोड ८५ लाख २८ हजार रहेको छ ।

जीराभवानी गाउँपालिका
आव २०७८/०७९ को लेखापरीक्षणबाट जिराभवानी गाउँपालिकाकाे असूल गर्नुपर्ने रू. ६० लाख ९० हजार, प्रमाण कागजात पेश गर्नुपर्ने रू. २ करोड ७४ लाख ७३ हजार, नियमित गर्नुपर्ने रू. १ करोड ५७ लाख ४१ हजार, पेश्की रू. १७ लाख ३१ हजार गरी बेरूजु रू.५ करोड १० लाख ३५ हजार रहेको छ । गत वर्षसम्मको बेरूजु रू. २६ करोड ८९ लाख ५८ हजार रहेकोमा अद्यावधिक बेरूजु रू. ३१ करोड ९९ लाख ९३ हजार रहेको छ ।

बिन्दबासनी गाउँपालिका
बिन्दवासिनी गाउँपालिकाकाे आव २०७८/०७९ को लेखापरीक्षणबाट असूल गर्नु पर्ने रू. ५० लाख ३८ हजार, प्रमाण कागजात पेश गर्नुपर्ने रू. ७७ लाख ६७ हजार, नियमित गर्नुपर्ने रू.४१ लाख ९३ हजार, पेश्की रू. १ लाख ५० हजार गरी बेरूजु रू.१ करोड ७१ लाख ४८ हजार रहेको छ । गत वर्षसम्मको बाँकी बेरूजु रू. १९ करोड ३६ लाख ५९ हजार रहेकोमा अद्यावधिक बेरूजु रू. २० करोड ८७ लाख २७ हजार रहेको छ ।

पकहाँ मैनपुर गाउँपालिका
पकहाँ मैनपुर गाउँपालिकाको आव २०७८/०७९ को लेखापरीक्षणबाट असूल गर्नुपर्ने रू.५४ लाख ७५ हजार, प्रमाण कागजात पेश गर्नुपर्ने रू. १ करोड २२ लाख ३८ हजार, नियमित गर्नुपर्ने रू.८० लाख १४ हजार, पेश्की रू १९ लाख ५० हजार गरि बेरूजु रू.२ करोड ७६ लाख ७७ हजार रहेको छ । गत वर्षसम्मको बेरूजु रू.१० करोड ७८ लाख ९८ हजार रहेकोमा हालसम्मको अद्यावधिक बेरूजु रू. १३ करोड ५५ लाख ७५ हजार रहेको छ ।

पटेर्वा सुगौली गाउँपालिका
पटेर्वा सुगाैली गाउँपालिकाकाे आव २०७८/०७९ को लेखापरीक्षणबाट बाँकी असूल गर्नुपर्ने रू.५४ लाख २३ हजार, प्रमाण कागजात पेश गर्नुपर्ने रू. १ करोड १२ लाख ५९ हजार, नियमित गर्नुपर्ने रू.२ करोड ७५ लाख ७४ हजार, पेश्की रू.७३ लाख ८३ हजार गरी बेरूजु ५ करोड १७ लाख २४ हजार रहेको छ । गत वर्षसम्मको बेरूजु रू. १३ करोड ३१ लाख ९१ हजार रहेकोमा अद्यावधिक बेरूजु रू. १८ करोड ४९ लाख १५ हजार रहेको छ ।

जगरनाथपुर गाउँपालिका
जगरनाथपुर गाउँपालिकाको आव २०७८/०७९ को वार्षिक लेखापरीक्षण बाट रू. १४ करोड ८४ लाख ३ हजार बेरूजु देखिएको छ । गाउँपालिकाको बाँकी असूल गर्नुपर्ने रू.२ करोड ६० लाख ९५ हजार, प्रमाण कागजात पेश गर्नुपर्ने रू.९ करोड ८ लाख २ हजार, नियमित गर्नुपर्ने रू.२ करोड १६ लाख ९८ हजार र पेश्की बाँकी रू.९८ लाख ८ हजार रहेको छ । गाउँपालिकाको गत वर्षसम्मको बाँकी बेरूजु रू.४० करोड २० लाख १७ हजार रहेकोमा अद्यावधिक बेरूजु रू.५५ करोड ४ लाख २० हजार रहेको छ ।

पालिकाहरूको बेरूजु रकम फर्छ्यौट गर्ने गराउने जिम्मेवारी पालिका प्रमुख प्रशासकीय अधिकृतहरूको रहेको भएपनि अधिकृतहरूले पालिकाका बेरूजु फर्छ्यौट गर्न गराउन पहल गरेको देखिदैन ।

भोलेन्टियरको कार्यक्रममा ३० जनाद्वारा रक्तदान

0

वीरगंज । भोलेन्टियर समूह वीरगंजकाे आयोजनामा सोमबार  आकस्मिक रक्तदान कार्यक्रम सम्पन्न भएको छ । वीरगंजस्थित मधूशाला फेमिली रेस्टुराँमा भएको कार्यक्रममा ३० जनाले रक्तदान गरेका हुन् ।

वीरगञ्जस्थित रक्तसञ्चार केन्द्रमा केही समूहका रगतको आभाव सृजना भएपछि भोलेन्टियर समूहले आयोजना गरेको आकस्मिक रक्तदान कार्यक्रममा ६ महिलासहित ३० जनाले रक्तदान गरेको समूहका संयोजक राजन श्रीवास्तवले जानकारी दिए ।

कार्यक्रममका प्रमुख अतिथि वीरगञ्ज महानगरपालिकाका मेयर राजेशमान सिंहले रक्तदान महादान भएको जिकिर गर्दै उमेर र योग्य सबैले रक्तदान गर्नुपर्ने बताए । रक्तसञ्चार केन्द्र वीरगञ्जले पर्सा मात्र नभइ छिमेकी जिल्लासहित भारतसमेतका विरामीलाई रगत उपलब्ध गराइरहेको उल्लेख गर्दै मेयर सिंहले केन्द्रको भण्डारण क्षमता बढाउनु पर्ने बताए । उनले यसका लागि महानगर समन्वय गर्न तयार गरेको बताए ।

आकस्मिक रक्तदान कार्यक्रम आयोजना गरेकोमा भोलेन्टियर समूहका सदस्यहरुलाई धन्यवाद दिँदै अन्य सङ्घसंस्थाहरुले पनि समूहबाट सिक्नुपर्ने बताए ।

त्यस्तै कार्यक्रमका विशिष्ट अतिथि ब्लड डोनर्स एसोसीएसन पर्साका अध्यक्ष एवम् वरिष्ठ सञ्चारकर्मी सत्रुधन नेपाल जेठ ३१ गते विश्व रक्तदाता दिवसको अवसरमा संस्थाले आयोजना गर्ने विभिन्न कार्यक्रममा सहभागिता जनाउन आग्रह गरे । उनले दिवसको अवसरमा २०७९ वैशाखदेखि चैतसम्म सय पिन्टभन्दा बढी रक्तदान गर्ने सङ्घसंस्था, वर्षमा दुई वा सोभन्दा बढी पटक रक्तदान कार्यक्रम गर्ने सङ्घसंस्था, वर्षमा चारपटक रक्तदान गर्ने व्यक्ति, आकस्मिक रक्तदाता, आकस्मिक दुर्लभ रक्तदाता, रक्तदान कार्यक्रमका सहयोगीहरूलाई समेत सम्मान गर्ने कार्यक्रम रहेको जानकारी दिए ।

समूहका संयोजक राजन श्रीवास्तवको सभापतित्वमा भएको कार्यक्रममा वीरगञ्ज महानगरपालिका वडा नम्बर ६ का वडाध्यक्ष प्रदीप चौरसिया, मेयर सिंहका प्रेस सल्लाहकार महेश दास, ब्लड डोनर्स एसोसीएसनका सचिव अरविन्द सिंह, अभिभावक सङ्घ पर्साका अध्यक्ष सन्दीप साह, वीरगञ्ज युवा समाजका संस्थापक अध्यक्ष कमल चौगाई, युवा अभियन्ता रवी यादव, भोलेन्टियर समूहका श्याम सर्राफ, किसु सर्राफ, बिक्की सर्राफ, सौर्या सर्राफ, राधेश्याम गुप्ता, कमलेश कुशवाह, दिनेश कुशवाह, रामविनय गुप्ता लगायतको उपस्थिति रहेको थियो ।

रक्तदान कार्यक्रम सञ्चालन गर्न रक्तसञ्चार केन्द्र वीरगञ्जका प्रमुख सौरभ राज पाण्डेसहितको टोलीले प्राविधिक सहयोग गरेको थियो ।

अगामी बर्षकाे याेजना छनाैटकाे लागि स्थलगत निरिक्षण

0

वीरगंज । पर्साको पकहाँ मैनपुर गाउँपालिकाको असार १० गते हुने गाउँ परिषदका लागी योजना संकल्न गर्न र विभिन्न याेजनाकाे अनुगमनका लागी पालिका स्तरिय अनुगमन समिती सक्रिय भएको छ ।

गाउँपालिका अध्यक्ष सुरेश मेहता, प्रमुख प्रशासकिय अधिकृत राज कुश्वाहा, प्रशासन प्रमुख हरिमोहन महतो, लेखापाल निरन्जन प्रसाद पटेल सहभागि रहेको अनुगमन समितिले विभिन्न याेजना अनुगमन गर्नुकाे साथै आर्थिक बर्ष २०८०।०८१ काे योजना छनौटका लागि साेमबार स्थलग निरिक्षण गरेकाे हाे ।

श्री नेपाल राष्ट्रिय प्राथमिक विद्यालय मैनपुरकाे अनगुगमनकाे क्रममा गाउँपालिका अध्यक्ष मेहताले विद्यालयकाे लागि अगामी बर्षकाे योजनामा पालिका स्तरि बजेटबाट बिनियोजन गरिने वताए ।

उनले अगामी बर्षकाे याेजनामा शिक्षालाई बिशेष प्राथमिकता दिइने पनि वताए ।

असार १० गते भित्र नै परिषद गर्नकाे लागि पालिका स्तरिय अनुगमन समितीले योजना छनौटका लागी काम तिब्र पारेको छ । अगामी हप्ता सम्म सबै विद्यालयकाे अनुगमन गरी योजना छनौट गरिने अनुगमन समितिले जनाएकाे छ ।

पकहाँ मैनपुरमा लैङ्गिक समानता सम्बन्धि अन्तरक्रिया

0

वीरगंज । पर्साकाे पकहाँ मैनपुर गाउँपालिकामा दुई दिने लैङ्गिक समानता तथा समाजिक समावेशिकरण मुलप्रवाहिकरण रणनितीक योजना छलफल तथा अन्तरक्रिया कार्यक्रम सुरु भएकाे छ ।

प्रदेश अनुशन्धान तथा प्रशिक्षण केन्द्र नेपालको सहयोग र कम्युनिटी डेभलपमेन्ट एन्ड काउन्सेलिङ्ग सेन्टर प्रा.लि. वीरगंजकाे आयोजनामा सुरु भएकाे कार्यक्रमकाे उद्घाटन पकहा मैनपुर गाउँपालिकाका अध्यक्ष सुरेशश मेहताले गरेका थिए ।

गाउँ कार्यपालिका कार्यालयकाे सभाहलमा भएकाे कार्यक्रममा कम्युनिटी डेभलपमेन्ट एन्ड काउन्सेलिङ्ग सेन्टर वीरगंजका रामप्रबेश साहले प्रशिक्षण दिइरहेका छन् । पहिलाे दिन कार्यक्रमका सहभागि जनप्रतिनिधी तथा कर्मचारीहरु ४ वटा समुहमा विभाजन भई पालिकाको सवल पक्ष, दुर्लभ पक्ष, समस्या र चुनौतीको बारेमा प्रस्तुती गरेका थिए  ।

कार्यक्रममा उपाध्यक्ष सर्फुन नेसाको संयोजकत्वमा लैङ्गिक सामनता तथा समाजिक समावेशीकरण मुल प्रभावहिकरण रणनिती सम्बन्धी  ७ सदस्यी समिती समेत गठन गरिएको थियाे ।

जुन समितिमा कार्यपालिका सदस्य मध्ये लालपरी देवी, रामावती देवी, वडाध्यक्ष ढेडी यादव, समाजिक संस्थाबाट उमेश बैठा, कर्मचारीबाट सुनिता देवी बर्णवाल, सुधान्सु शेखर रहेका छन् ।

कार्यक्रममा गाउँपालिकाका प्रमुख प्रशासकिय अधिकृत राज कुश्वाहासहित जनप्रतिनि र कर्मचारीहरुकाे सहभागिता रहेकाे छ ।

नगवामा खानेपानी ट्याङ्कीको शिलान्यास

0

वीरगंज । नेपाल खानेपानी संस्थानले वीरगंजमा निर्माण गर्न लागेको साढे ४ लाख लिटर क्षमताको पानी ट्याङ्की (डीप बोरिङ) को आज एक कार्यक्रमकाबीच शिलान्यास गरिएको छ ।

जनता समाजवादी पार्टी नेपाल (जसपा) का प्रमुख सचेतक प्रदिप यादव र वीरगञ्ज महानगरपालिकाका मेयर राजेशमान सिंहले संयुक्त रुपमा शनिबार खानेपानी पानी ट्याङ्की (डीप बोरिङ) को शिलन्यास गरेका हुन् ।

वीरगञ्ज महानगरपालिका वडा नम्बर १६ स्थित नगवामा निर्माण हुनलागेको पानी ट्याङ्कीले वडा नम्बर १५ र १६ का लगभग ४५ हजार घरधुरी लाभान्वित हुने बताइएको छ ।

खानेपानी टंकीको शिलान्यास गर्दै पर्सा निर्वाचन क्षेत्र नम्बर १ का प्रतिनिधिसभा सदस्य समेत रहेका प्रदीप यादव पानी ट्याङ्की निर्माणले वडावासीले भोगिरहेको खानेपानीको समस्या समाधान हुने विश्वास व्यक्त गरे । पछिल्लो समय जलवायु परिवर्तन र बढ्दै गएको तापक्रमका कारण जमिनमुनीको पानीको तह घट्दै जाँदा चापाकलमा समेत पानी आउन छोडेपछि वर्तमान मागलाई सम्बोधन गर्न पानी ट्याङ्की निर्माणको काम सुरु गरिएको उनले बताए ।

‘अहिलेको माग र भविष्यमा हुनसक्ने सम्भावित मागलाई समेत पूर्ति गर्ने दीर्घकालिन उद्देश्यका साथ पानी ट्याङ्की निर्माण गरिँदै छ,’ उनले भने ।

अहिले महत्व नबुझे एकदिन एकएक थोपा पानीका लागि छट्पटाउनु पर्ने अवस्था आउन सक्ने बताउँदै पूर्व वन तथा वातावरणमन्त्री समेत रहेका यादवले भने, ‘हामीले पानीको महत्व बुझिरहेका छैनौँ, जति मन लग्यो त्यती पानी खर्च गर्छौं । तर, पानी सिमित छ भन्ने कुरा बुझ्न जरुरी छ, हामीले अनावश्यक पानी बर्बाद गर्नुहुँदैन ।’

जलवायू परिवर्तन र विभिन्न कारणले जमिनमुनि रहेको पानीको सतह तल झर्दै गइरहेको उल्लेख गर्दै उनले थपे, ‘रुख रोप्ने र घरघरमै वाटर रिचार्जको उपाय अपनाउन थाल्न हामीले ढिलाइ गर्नुहुँदैन ।’

वीरगञ्ज महानगरपालिकाका मेयर राजेशमान सिंहले तराई-मधेशका क्षेत्रहरुमा देखिएको पानीको समस्या गम्भीर भएको बताए । पानी उपयोगमा सचेत हुनुपर्ने सुझाव दिँदै उनले भने, ‘हामीलाई अनावश्यक ढङ्गले पानी खर्चिने बानी छ, यो गलत हो । पानीको महत्व हामीले नबुझे एकदिन हाकाहारको सामना गर्नुपर्छ ।’ आवश्यकता भन्दाबढी पानी खर्च गर्ने बनी त्याग्न उनले आग्रह गरे ।

मेयर सिंहले पानीको समस्या समाधानका लागि नेपाल खानेपानी संस्थानसँग मिलेर महानगरका विभिन्न वडामा ४ हजार धारा निःशुल्क रुपमा जडान गर्न लागिएको जानकारी गराए । वीरगञ्जमा देखिएको खानेपानीको समस्यालाई समाधान गर्न थप रुख रोप्नुपर्ने आवश्यकता औल्याउँदै उनले थपे, ‘हामीले हरियालीको महत्व पनि बुझेका छैनौँ । जेमा पनि कंक्रीट मन पराउँछौँ । यो गलत हो, आफ्नो घर, आँगन, मूलद्वार अगाडि रुख रोपौँ । रुख रोप्दा पनि धेरै हदसम्म पानी आभावको समास्या समाधान हुन्छ ।’ वीरगञ्जलाई हराभारा बनाउन महानगरले हरेक सम्भव प्रयास गरिरहेको उनले बताए ।

एक फरक प्रसङ्गमा बोल्दै उनले सङ्घ र प्रदेश सरकारबाट वीरगञ्ज हेपिएको टिप्पणी गरे । देशकै प्रमुख व्यापारिक केन्द्र भएतापनि वीरगञ्जले सरकारबाट पर्याप्त बजेट नपाएको गुनासो गर्दै उनले आगामी बजेट र नीति तथा कार्यक्रम मार्फत विशेष बजेटको व्यवस्था गर्न माग गरे ।

सङ्घ सरकारको बजेटबाट नेपाल खाने पानी संस्थानले निर्माण गर्न लागेको वीरगञ्ज जलापूर्ति परियोजनाको कूल लागत ५३ करोड ३२ लाख २४ हजार २२० रुपैयाँ ५८ पैसा रहेको छ । परियोजना दुई वर्षमा सम्पन्न हुने लक्ष्य लिइएको छ ।