Date
सोम, कार्तिक ३०, २०८३
Mon, November 16, 2026
Home Blog Page 522

वीरगंज महानगरद्वारा पत्रकार ध्रुव साह सम्मानित

0

वीरगंज । वीरगंज महानगरपालिकाले १३ औं नगर सभाबाट सम्मानित पत्रकार ध्रुव साहसहित ४ जनालाई शनिबार एक कार्यक्रमकाे बिच सम्मान गरेकाे छ ।

महानगरपालिकाले मधेशदृष्टि, रेडियाे वीरगंज र टिभि वीरगंजका कार्यकारी अध्यक्ष समेत रहेका पत्रकार साहलाई महानगरपालिकाकाे गतिविधिहरु सकृयतापुर्वक आम जनतामा संचार गरी महानगरपालिका र नागरिक बिचकाे सम्पर्क सुदृढ पार्दै पारदर्शितामा महत्वपूर्ण याेगदान पुर्याएकाेमा सम्मान गरिएकाे जनाएकाे छ ।

यसैगरी महानगरकाे सरसफाईमा याेगदान पुर्याएका ग्रिन सिटी आदर्शनगरका अध्यक्ष जय प्रकाश खेतान, जग्गा दाता प्रेम कुमार टिवडेवाल र उज्जयालाे वीरगंज अभियानमा याेगदान पुर्याएका महानगरपालिकाका कर्मचारी इ. राजिव उपाध्यायलाई पनि महानगरपालिकाले सम्मान गरेकाे हाे । 

महानगरपालिकाका प्रमुख प्रशासकिय अधिकृत लक्ष्मी पाैडेलकाे अध्यक्षतामा भएकाे कार्यक्रममा सम्मानित हुने चारै जनालाई महानगरपालिकाका मेयर राजेशमान सिंह, उप मेयर इम्तियाज आलमले दाेस्ला ओढाएर सम्मान पत्रले सम्मान गरेका थिए ।

महासंघकाे स्टार्टअप एण्ड इनोभेसन समितिको आमन्त्रित सदस्यमा अग्रवाल मनोनीत

0

वीरगंज । नेपाल उद्योग वाणिज्य महासङ्घको स्टार्टअप एण्ड इनोभेसन समितिको आमन्त्रित सदस्यमा युवा उद्यमी अनुपकुमार अग्रवाल मनोनीत भएका छन् ।

शुक्रवार काठमाडौँमा सम्पन्न एक समारोहका बिच महासङ्घका अध्यक्ष चन्द्रप्रसाद ढकालले अग्रवाललाई जुना माथेमाको सभापतित्वमा रहेको समितिको आमन्त्रित सदस्यमा मनोनीत गरेका हुन् । 

अग्रवालले समितिको आमन्त्रित सदस्यमा मनोनीत गर्दै महासङ्घका अध्यक्ष ढकालले समितिका सदस्यहरूले समिति मार्फत यस क्षेत्रमा क्रियाशील रूपमा काम गर्दै महासङ्घलाई समेत सशक्त रूपमा अगाडि बढाउन योगदान पुर्‍याउने विश्वास व्यक्त गरे । 

अग्रवाल नेपाल उद्योग वाणिज्य महासङ्घ मधेश प्रदेशअन्तर्गत गठित स्टार्टअप एण्ड इनोभेसन समितिका संयोजक हुन् भने वीरगञ्ज उद्योग वाणिज्य सङ्घका सदस्य र नेपाली युवा उद्यमी मञ्च वीरगञ्जका पूर्व अध्यक्ष पनि हुन् । सेनिटरी वेयर र विभिन्न कस्मेटिक बस्तुको आयात गर्ने व्यवसायमा संलग्न अग्रवाल वीरगञ्जलाई आफ्नो कम थलो बनाएर विभिन्न सामाजिक संस्थामा पनि आबद्ध छन् । 

समिति मार्फत नेपालमा स्टार्टअप सुरु गरेका उद्यमी व्यवसायीहरूका वास्तविक समस्या तथा चुनौतीहरूका विषयमा छलफल गरी सरकारका तर्फबाट गर्नुपर्ने सहयोगका विषयमा सुझाव पेस गर्ने, नवीन सोचमा आधारित रहेर उद्यम गर्न चाहने स्टार्टअपहरूको व्यावसायिक सफलताका लागि सुरुवाती पुँजी (लगानी) जुटाई दिन पहल र सहयोग गर्ने जस्ता कामहरूलाई प्राथमिकता दिने अग्रवालको एजेण्डा छ ।

‘संसारभर स्टार्टअपहरूले राम्रो गरिरहेको बेला नेपालमा त्यस्तो भइरहेको छैन । थोरै रहेका स्टार्टहरू पनि काठमाडौँ, पोखरा जस्ता ठूला सहरमा मात्रै केन्द्रित छन्,’ अग्रवालले भने, ‘अब देशका अन्य सहर र ठाउँमा पनि स्टार्टअप खोल्न प्रोत्साहन गर्ने मेरो मुख्य अजेण्डा रहनेछ । त्यसको लागि प्रदेशदेखि सङ्घीय तहसम्म रहेका सरकारी र गैर सरकारी निकायसँग पहल र सामान्य गर्नेछु ।’

सखुवा प्रसौनीमा सार्वजनिक सुनुवाई कार्यक्रम सम्पन्न

0

वीरगंज । पर्साकाे सखुवा प्रसौनी गाउँपालिकाले सार्वजनिक सुनुवाई कार्यक्रम गरेकाे छ । कम्युनिटी डेभलपमेन्ट एण्ड काउनसेलिङ्ग सेन्टर प्रा.लि. वीरगंजकाे संयाेजनमा सखुवा प्रसौनी गाउँपालिकाले सार्वजनिक सुनुवाई कार्यक्रम गरेकाे हो ।

कार्यक्रमलाई सम्बाेधन गर्दै गाउँपालिका अध्यक्ष यसवन्त यादवले इन्धन खर्चमा कुनै पनि अनियमितता नभएको वताए । उनले भने “सखुवा प्रसौनीको कुल भुभाग मध्ये करिब ८० प्रतिशत भुभाग गण्डक नहरको उतरतर्फ रहेकोले उक्त क्षेत्रका अधिकांश कृषकहरु नदीको पानिलाई कुलो/पैनी मार्फत गरिने सिँचाईमा आश्रित छन् । सिँचाईलाई उच्च प्राथमिकतामा राख्दै किसानहरुको लागी नि:शुल्क नहर, कुलो/पैनि सफाईको व्यवस्था गाउँपालिकाले गरेको छ र उक्त कार्यको लागी नि:शुल्क रुपमा गाउँपालिकाको जेसिबी प्रयोग गरिदै आएको छ । जसकारण कृषिमा सिञ्चित क्षेत्र बढ्दै गएको र किसानहरुले तीन बालिसम्म लगाउने गरेका छन् । निशुल्क रुपमा जेसिबी चलाउदा पक्कै पनि इन्धन खपत भएको हुन्छ । इन्धनको शुल्क कुनै पनि कृषकबाट लिने नगरिएकोले गाउँपालिकाको इन्धन खर्च बढ्नु स्वभाविक नै हो ।”

त्यसैगरी गाउँपलिकाले २०७९ साल असार महिनादेखि दुई वटै एम्बुलेन्स नि:शुल्क रुपमा सञ्चालन गर्दै आएको उनले वताए । नि:शुल्क एम्बुलेन्स सेवा सञ्चालन गर्ने नेपालकै पहिलो पालिका रुपमा सखुवा प्रसौनी गाउँपालिका रहेको उनले दाबी समेत गरे । पछि काठमाडौं महानगरपालिकाले पनि निशुल्क एम्बुलेन्स सेवा शुरु गरेको अध्यक्ष यादवकाे भनाई थियाे ।

उनले भने “नि:शुल्क रुपमा गाउँपालिका अन्तर्गतका सबै किसिमको बिरामीहरुलाई देशभरी नै एम्बुलेन्स सेवा उपलब्ध गराउँदा इन्धनको खपत अवश्य नै बढ्छ । तर चालु आर्थिक बर्षमा भएको इन्धन खर्चमा भ्रष्टाचार नै गरेको भनी प्रचार गर्नु गलत हाे ।”

गाउँपालिका अध्यक्ष यादवले इन्धन खर्चलाई थप व्यवस्थित गर्दै सखुवा प्रसौनी गाउँपालिकाले जिल्ला मै PAMS बाट इन्धन अभिलेख राख्ने प्रथम स्थानिय तह भएकाे वताए । जिल्ला कै गाउँपालिकाहरु मध्ये सबै भन्दा बढी सवारी साधन भएको गाउँपालिका पनि सखुवा प्रसौनी नै भएकाे वताउँदै उनले सवारी साधन बढी हुँदा साथै नि:शुल्क सेवा उपलब्ध गराउँदा इन्धन खर्च बढ्नु कुनै नौलो कुरा नभएको तथा सोही खर्चलाई नेपाल सरकारको आधिकारिक PAMS प्रणालीको प्रयोग गरी व्यवस्थित बनाउदै लगिएको उनले वताए ।

सखुवा प्रसौनी गाउँपालिका अन्तर्गत आधारभुत अस्पताल सञ्चालन गर्ने योजना कार्यालयको रहेको अध्यक्ष यालवे वताए । गाउँपालिकाको योजना अनुरुप आधारभुत अस्पताल संचालनमा आएमा पर्सा जिल्लाका गाउँपालिकाहरु मध्ये प्रथम गाउँपालिका सखुवा प्रसौनी नै हुने उनकाे भनाई थियाे ।

अध्यक्ष यादवले कर्मचारी भर्नामा पनि कुनै किसिमकाे अनियमितता नभएकाे वताए । कर्मचारी भर्ना हचुवाको तालमा नभई सखुवा प्रसौनी गाउँपालिका करारमा प्राविधिक तथा अप्राविधिक कर्मचारी व्यवस्थापन गर्ने सम्बन्धि कार्यविधि, २०७९ तथा नेपाल सरकारको प्रचलित कानुनको आधारमा गरिएको र कर्मचारी भर्ना पूर्ण रुपमा स्वच्छ र निष्पक्ष रुपमा भएको गाउँपालिकाका प्रमुख प्रशासकीय अधिकृत देवनाथ साहले बताए ।

त्यसै गरी गाउँ कार्यपालिकाबाट संगठन तथा व्यवस्थापन सर्वेक्षण (O&M Survey) पास गरी कर्मचारी व्यवस्थापन गर्नेमा सखुवा प्रसौनी गाउँपालिका पर्सा जिल्लाकै पहिलो गाउँपालिका बनेकाे उनले वताए । गाउँपालिकाले O&M को आधारमा नै कर्मचारी भर्ना गर्ने गाउँपालिकाको योजना रहेको भनी प्रमुख प्रशासकिय अधिकृत साहले स्पष्ट पारे ।

उनले भने “पर्सा जिल्लाका गाउँपालिकाहरु मध्ये क्षेत्रफल र जनसंख्याको हिसाबले सखुवा प्रसौनी गाउँपालिका सबैभन्दा ठुलो गाउँपालिका हो, तथापि सावर्जनिक सेवा प्रवाहको ठुलो चाँप हुँदाहुँदै पनि अन्य पालिकाको तुलनामा थोरै कर्मचारीले सेवा प्रवाह भईरहेको र कर्मचारि व्यवस्थापनमा कुनै किसिमको कमि कमजोरी भएकाे छैन् ।”

जिल्लाका गाउँपालिकाहरु मध्ये सबै भन्दा बढी सवारी साधन भएको गाउँपालिका सखुवा प्रसौनी नै हो । जसमध्ये अधिकांश सवारी साधन पुरानै कार्यकालमा खरिद भएका तथा केही साविकको जिल्ला विकास समितिबाट हस्तान्तरण भई आएकाे उनले जानकारी गराए ।

उनले थपे “पुराना सवारी साधनको संख्या अत्याधिक भएको तथा संख्या पनि धेरै भएकोले मर्मत खर्च बढेको छ । साथै एम्बुलेन्स, जेसिबी तथा अन्य सवारीहरु नि:शुल्क रुपमा सञ्चालन भएरहेकोले अत्याधिक प्रयोग हुनु तथा सोका कारण मर्मत खर्च पनी बढ्नु स्वभाविक नै हो ।”

साथै गाउँपालिका अध्यक्षले चढ्ने स्कोरपियो गाडीमा केही महिना अगाडी भएको तोडफोडको कारण पनि उक्त समयमा मर्मत खर्च बढेको भनी गाउँपालिका अध्यक्ष यादवले सार्वजिनक सुनुवाईकै क्रममा थप स्पष्ट पारे ।

सूचना प्रकाशनमा मितव्ययिता अपनाईएको गाउँपालिकाे अधिकृत साहकाे भनाई थियाे । उनले जहिले पनि सस्तो र कम लागतमा बढि भन्दा बढि काम गर्ने सरकारले नीति अनुरूप गाउँपालिकाले सस्तोमा सुचना छाप्ने पत्रिकालाई बढि सुचना छाप्न दिएकाे वताए । 

मितव्ययिताको सिद्धान्त अनुसार कार्यालयलाई सस्तो पर्ने समान स्तरको सेवामा सस्तोलाई नै प्राथमिकता दिनु पर्ने भएकोले कम खर्च लाग्ने पत्रिकालाई सूचना दिनु कुनै किसिमले अनियमित कार्य नभएको गाउँपालिकाको प्रतिक्रिया रहेकाे छ ।

श्री दीप नारायण आदर्श नमूना माध्यमिक विद्यालय औराहा पचगावाँको प्राङ्गणमा भएकाे कार्यक्रममा स्थानिय जनप्रतिनिधि, कर्मचारी, बुद्धिजिवि, समाजसेवी, पत्रकार लगायत स्थानिय आम जनताको उपस्थिति रहेकाे थियाे । काउनसेलिङ्ग सेन्टर प्रा.लि. का निर्देशक रामाकान्त पटेलले स्वागत मन्तव्य राखेकाे कार्यक्रमकाे संचालन पत्रकार निरज पिठाकाेटे मगरले गरेका थिए ।

सिम्रौनगढका तत्कालीन निमित्त प्रप्रअसहित ७ जना विरुद्ध भ्रष्टाचार मुद्दा दायर

0

वीरगंज । बाराकाे सिम्रौनगढ नगरपालिकाका तत्कालीन निमित्त प्रमुख प्रशासकीय अधिकृत, लेखा अधिकृत, इन्जिनियर र उपभोक्ता समितिका अध्यक्षसहित ७ जना उपर गैरकानूनी लाभ तथा हानी पुर्‍याई भ्रष्टाचार गरेको सम्बन्धी आरोप-पत्र दायर भएकाे छ ।

अख्तियार दुरुपयाेग अनुसन्धान आयाेगले नगरपालिकाका तत्कालिन निमित्त प्रमुख प्रशासकीय अधिकृत वीरेन्द्र प्रसाद साह कानु, लेखा अधिकृत सर्मेन्द्र प्रसाद चौधरी, इन्जिनियर सुरेश कुमार यादव, सव-इन्जिनियर उपेन्द्र कुशवाहा, रानीवास खेल मैदान निर्माण उपभोक्ता समितिका अध्यक्ष सोनालाल प्रसाद यादव, सचिव नन्द किशोर साह कानु र कोषाध्यक्ष गीता कुमारी साह विरुद्ध आराेप पत्र दायर गरेकाे हाे । 

सिम्रौनगढ नगरपालिकाले मधेश प्रदेश सरकारको अनुदानबाट आ.व. २०७७/०७८  मा संचालित योजनाहरुमा रकम निकासा गरी योजना संचालन एवं सम्पन्न नै नगराई रकम हिनामिना गरेको भन्ने समेतको संसदीय अनुगमन विशेष समिति मधेश प्रदेशको प्रतिवेदन उजुरीका सम्बन्धमा अनुसन्धान हुँदा दाेषी देखिएकाेले आराेप पत्र दायर गरिएकाे अख्तियारले जनाएकाे छ ।  

सिम्रौनगढ नगरपालिका, वडा नं. २ स्थित रानीवास खेल मैदान निर्माण कार्यमा भए गरेको कार्यभन्दा बढी तथा साइटमा नगरे/नगराएको परिमाणको कार्य भएको भनी नापी किताबमा चढाई, झुट्टा बिल भरपाई र गलत कार्यसम्पन्न प्रतिवेदन तयार गरी भए गरेको भन्दा बढी मूल्याङ्कन गरी गराई रु. एक लाख ५ सय ६८ रुपैया ७५ पैसा बढी रकम भुक्तानी दिने कार्य गरीएकाे अख्तियारकाे अनुसन्धानबाट खुलेकाे छ ।

भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) वमोजिम कसुर गरेको देखिन आएकोले तत्कालिन निमित प्रमुख प्रशासकिय अधिकृत कानु, लेखा अधिकृत चौधरी, इन्जिनियर यादव र सब इन्जिनियर कुशवाहालाई बढी भुक्तानी दिएको एक लाख ५ सय ६८ रुपैयाँ ७५ पैसा बिगो रकम कायम गरी भ्रष्टाचार निवारण ऐन अनुसार जरिवाना गरी बिगो रकम असुल उपर माग गरिएकाे छ ।

साथै प्रतिवादीहरु यादव र कुशवाहाले उक्त संग्रहालय भवन निर्माण कार्यको गलत नापी किताब र कार्य सम्पन्न प्रतिवेदन तयार गरी गलत प्रतिवेदन दिने कार्य गरी भ्रष्टाचार निवारण ऐन, २०५९ को दफा १९ को उपदफा (२) बमोजिम गलत प्रतिवेदन दिने कसुर गरेको देखिन आएकोले सोही ऐनको दफा १९ को उपदफा (२) वमोजिम कैद र जरिवाना हुन मागदाबी गरिएकाे छ ।

सिम्रौनगढ नगरपालिका, वडा नं. २ स्थित रानीवास खेल मैदान निर्माण उपभोक्ता समितिका अध्यक्ष यादव, सचिव कानु र कोषाध्यक्ष साहले नगरपालिकासँग भएको सम्झौताबमोजिमको शर्त पालना नगरी, लागत अनुमान बमोजिम गर्नुपर्ने सबै कामहरु नगरी कार्य सम्पन्न भएको भनी नभए नगरेको कार्यसमेत भए गरेको भनी भए गरेको भन्दा बढी मूल्याङ्कन गरी गराई रु. एक लाख ५ सय ६८ रुपैयाँ ७५ पैसाको बिल नगरपालिकाको कार्यालयमा पेश गरेकाे अख्तियारद्वारा जारी प्रेस विज्ञप्तीमा उल्लेख छ ।

बढी भुक्तानी लिई भ्रष्टाचार निवारण ऐन, २०५९ को दफा ८ को उपदफा (४) वमोजिम कसुर गरेको देखिन आएकोले निजहरु सोनालाल प्रसाद यादव, नन्द किशोर साह कानु र गीता कुमारी साहलाई एक लाख ५ सय ६८ रुपैयाँ ७५ पैसा बिगो कायम गरी भ्रष्टाचार निवारण ऐन वमोजिम सजाय हुन मागदाबी लिई विशेष अदालत, काठमाडौंमा मंगलबार आरोपपत्र दायर गरिएको अख्तियारका प्रवक्ता भाेला दहालले जानकारी दिए ।

बैभव वीरगंज बनाउने अभियान रोकिदैन : मेयर सिंह

0

वीरगंज । वीरगंज महानगरपालिकाका मेयर राजेशमान सिंहले बैभव वीरगंज बनाउने अभियान कुनै हालतमा नरोकिने र कसैसँग सम्झौता नहुने वताएका छन् ।

वीरगंज महानगरपालिकाको आयोजना तथा व्रिलियन्ट युवा क्लवको संयोजनमा बुधबार वीरगंजको वडा नम्बर ५ मा आयोजित सार्वजनिक सुनुवाई कार्यक्रममा नगरवासीहरुले उठाएको प्रश्नको जवाफ दिदै आफूले गलत नगर्ने र गलत भई हाले त्यसको खुलेर विरोध गर्न नगरवासीलाई आग्रह गरे ।

उनले नगरवासीहरुले समस्या उठाउने मात्र होईन, त्यसको समाधान पनि खोज्नु पर्ने कुरामा जोड दिदै वीरगंजमा पानीको रिचार्ज नहुँदा गर्मी याममा पिउने पानीको समेत समस्या देखा परेको बताए ।

उनले वीरगंजलाई नमुना शहरको रुपमा विकास गर्न नगरवासीको साथ र सहयोग आफूलाई अपरिहार्य रहेको बताउँदै नगरको सरसफाई, शिक्षा स्वास्थ्य क्षेत्रमा देखिएका विसंगतिहरुको अन्त्य गर्ने अभियानमा महानगर जुटेको वताए ।

मेयर सिंहले वीरगंजका धार्मिक तथा ऐतिहासिक क्षेत्रहरुको सौन्दर्यकरण सँगै वीरगंजमा धार्मिक पर्यटन प्रवर्धनका लागि समेत महानगरपालिकाले काम गरि रहेको बताए ।

कार्यक्रममा महानगरपालिकाका प्रमुख प्रशासकिय अधिकृत लक्ष्मी पौडेलले महानगरले प्रधान गर्ने सेवा र सुविधालाई एकिकृत रुपमा नगरवासी विच पुर्याउन ८० करोडको लागतमा ११ तल्ले कार्यालय भवन निर्माणका लागि डिपिआर समेत बनि सकेको र श्रोतको व्यवस्थापन हुन नसक्दा कार्यालय निर्माणमा समस्या भएको बताए ।

उनले कार्यालयमा कर्मचारीहरुको दरवन्दी कम हुँदा काम गर्न समस्या भएको बताउँदै महानगरपालिकामा समेत विगतमा विचौलियाहरुले सेवाग्राहीलाई दुःख दिने गरेकोमा अहिले त्यस्ता गतिविधि पूर्ण रुपमा हटेको दावी गरे ।

कार्यक्रममा वीरगंज महानगरपालिका वडा नम्बर ५ का अध्यक्ष प्रदिप चौरसियाले नगरवासीको गुनासो अनुसारको काम भएको दावी गर्दै सबैको सोचमा परिवर्तन हुनु पर्ने कुरामा जोड दिए ।

कार्यक्रममा मानव अधिकारकर्मी तथा संचारकर्मी कृष्ण खनालले वीरगंजको सरसफाई राम्रो भएको र पहिचान समेत फेरिएको बताउँदै विद्युत, नालाको व्यवस्थापनमा ध्यान दिनु पर्ने कुरामा जोड दिए ।

कार्यक्रममा गुनासो लिएर आएका आमा समूह तथा विभिन्न महिला समूहहरुले ५०औं बर्ष देखि आफूहरुले जनप्रतिनिधिहरुलाई भोट दिदै आएको भए पनि कुनै काम हुन नसकेको अवस्थामा अहिलेका मेयर तथा वडा अध्यक्षहरुले राम्रो काम गरेको भन्दै प्रशंसा गरेका थिए ।

रेडियो वीरगंज, टिभी वीरगंज, मधेश दृष्टि दैनिकका कार्यकारी अध्यक्ष ध्रुव साहले सहजिकरण गरेकाे कार्यक्रममा सेवाग्राही तथा नगरवासीलाई सोधिएको प्रश्नको जवाफ सहितको प्रतिवेदन पत्रकार ध्रुव अधिकारीले प्रस्तुत गरेका थिए ।

वीरगंज ५ स्थित देव पार्टी प्यालेसमा भएकाे कार्यक्रममा स्वागत मन्तव्य व्रिलियन्ट युवा क्लवका छठु साहले गरेका थिए ।

स्वास्थ्यकर्मी जनमत संघ पर्सा गठन, अध्यक्षमा सिंह

0

वीरगंज । अन्तर्राष्ट्रिय चिकित्सक दिवस पारेर जनमत पार्टीले अफ्नो भातृसंगठन, स्वास्थ्यकर्मी जनमत संघ पर्साकाे घोषणा गरेको छ । जनमत पार्टीका केन्द्रीय सदस्य डा. अजय यादवको विशेष उपस्थितिमा भएकाे मंगलबार एक कार्यक्रमका बिच तत्काल ४१ सदस्यीय स्वास्थ्यकर्मी संघ पर्सा गठन गरिएको हाे ।

कार्यक्रमलाई सम्बाेधन गर्दै केन्द्रिय सदस्य डा. यादवले स्वास्थ्य सेवा जनताको मौलिक अधिकार भएकाेले यसमा कुनै किसिमको बेतिथि सहन नहुने वताए । उनले भने “जनतालाई मार्ने काम कुनै पनि स्वास्थ्य संस्थाबाट, खासगरी सरकारी स्वास्थ्य संस्थाबाट हुनुहुँदैन, भएको खण्डमा स्वास्थ्यकर्मी जनमत संघले कडा भन्दा कडा कारवाही गर्न पनि पछि हटनु हुँदैन ।”

कार्यक्रमका प्रमुख अतिथी समेत रहेका डा. यादवले भ्रष्टाचारमा जनमत पार्टीको शून्य सहनशीलताको बारेमा वताउँदै जनकपुरमा भ्रष्टाचारीलाई गरेको कारवाही नबिर्सन पनि भन्दै जनताको विरोधमा जाने जो सुकैलाई पनि कारवाहीको दायरा ल्याउने चेतावनी समेत दिए ।

जनमत पार्टी, पर्साका संयोजक ओमप्रकाश सर्राफले नारायणी अस्पतालमा भइरहेकाे अनियमितता र भ्रष्टाचार विरुद्ध स्वास्थ्यकर्मी संघले सशक्त कदम चाल्न आग्रह गरे । 

जनमत पार्टीका पर्सा जिल्ला इन्चार्ज माधव सिंहको अध्यक्षतामा भएको कार्यक्रमलाई जनमत पार्टी पर्सा सल्लाहकार समितिका नेतागण प्रह्लाद गिरी, शशी कपूर मियाँ, सिपु तिवारी, युवा नेता मुकेश द्विवेदी, कन्हैया झा, राजु गिरीले आ आफ्नो मन्तव्य राख्दै संघलाई समर्थनको साथै सुभेच्छा दिए ।

नव गठित स्वास्थ्यकर्मीको अध्यक्षमा नन्दन कुमार सिंह, उपाध्यक्ष सिकिन्द्र राय, सचीव बिजय प्रताप सिह, सह- सचीव मधुसूदन चौरसिया, कोषाध्यक्ष बिजय कुमार यादव लगायत रहेका छन ।

आम जनताको स्वास्थ / उपचार सेवालाई सहयोग र सहजीकरण गर्न जनहितको लागी चाडै हेल्पलाइन नम्बर जारी गरिने भेलाले निर्णय गरेको वताइएकाे छ ।

पोखरियामा विपद् व्यवस्थापन सम्बन्धी अभिमुखीकरण

0

वीरगंज । पर्साको पोखरिया नगरपालिकामा विपद् व्यवस्थापन तथा प्रतिकार्य सम्बन्धी अभिमुखीकरण कार्यक्रम सम्पन्न भएको छ । नगरपालिकाकाे आयाेजनामा पालिकास्तरीय एक दिने अभिमुखीकरण कार्यक्रम साेमबार सम्पन्न भएको हो ।

अभिमुखीकरण कार्यक्रममा बोल्दै नगरपालिकाका प्रमुख प्रशासकीय अधिकृत देवेन्द्र सापकोटाले विपद् एक्कासी आउने भएकाले समयमै सचेत भएर बस्नुपर्ने बताए । उनले भने, ‘विपद्को कुनै समय हुदैन, एकासी आउन सक्छ, सबै जनसमुदाय हरुलाई समयमै सचेत गराउनु जरुरी छ ।’

प्रशासकीय अधिकृत सापकोटाले पालिका स्तरीय विपद ब्यवस्थापन समितिलाई सक्रिय बनाउनु पर्नेमा जोड दिए । विपद ब्यवस्थापन तथा प्रतिकार्यमा आफ्नो पनि सहयोग रहने उनले बताए ।

पालिकाका स्वास्थ्य शाखा प्रमुख कौशलेन्द्र मिश्रले कुनै बेला विपद जतिबेला पनि आउनसक्ने भन्दै पालिका स्तरिय विपद् व्यवस्थापन तथा प्रतिकार्य समितिलाई पूर्ण जागरुप र सक्रिय बनाउन अभिमुखिकरण कार्यक्रम राखिएको बताए ।

स्वास्थ्य सह संयोजक शिवकुमार पटेलले विपदको समयमा हुने क्षती र विपदबाट बचने उपायबारे प्रोजेक्टरको माध्यमबाट जानकारी गराए । स्वास्थ्य सह–संयोजक पटेलले भने, ‘कुनै समय विपपदमा समयमै उद्धार नहुँदा अकालमा मृत्यु हुन सक्ने अवस्था हुन्छ । यदि समयमा उद्धार गर्न सके बचाउन सकिन्छ । उद्धारकार्यलाई प्रभावकारी बनाउन जरुरी छ ।’

स्वास्थ्य शाखा प्रमुख कौशलेन्द्र मिश्रको अध्यक्षतामा भएको कार्यक्रममा अधिकृत अजय श्रीवास्तव, नेपाल रेडक्रस सोसाइटी पोखरिया शाखा सभापति भगवान कुर्मी, युवा समाज पोखरियाका अध्यक्ष भगवान दास तत्वा, विपद व्यवस्थापन शाखा प्रमुख राजेश्वर कुर्मी लगायतले धारणा राखेका थिए । कार्यक्रममा स्वास्थ्यकर्मी, कर्मचारी, संघसंस्था, सञ्चारकर्मी लगायतको सहभागिता रहेको थियो ।

अवैध उत्खनन राेक्न समन्वय समितिकाे भूमिका हुनुपर्छ : सांसद यादव

0

वीरगंज । पर्सा क्षेत्र नम्बर १ का प्रतिनिधि सभा सदस्य सांसद प्रदीप यादवले जिल्ला समन्वय समितिकाे कार्यक्षेत्रकाे दायरालाई फराकिलाे बनाउनुपर्नेमा वताएका छन् ।

जिल्ला समन्वय समिति पर्साकाे चाैथाे जिल्ला सभालाई सम्बाेधन गर्दै जिल्ला समन्वय समिति पर्साकाे पछिल्लो कार्यकाल समग्रमा प्रभावकारी भएकाे बताए । जिसस पर्साका प्रमुख निरन्जन साह साेनारले सबै स्थानीय तहसँग समन्वयकारी भूमिका निर्वाह गरेकाे जसपाका प्रमुख सचेतकसमेत रहेका यादवकाे भनाई छ ।

समन्वय समितिलाई अधिकार नदिएकाे गुनासाेप्रति ध्यानाकर्षण भएकाे बताउँदै सांसद यादवले अधिकार सम्पन्न बनाउन पहल गर्ने प्रतिबद्धता व्यक्त गरे ।

पूर्व वन तथा वातावरण मन्त्री समेत रहेका यादवले अवैध रूपमा हुने उत्खननलाई राेक्नका लागि समन्वय समितिकाे भूमिका प्रभावकारी हुनुपर्नेमा जाेड दिए । उनले भने, “समन्वय समितिले वातावरण संरक्षणका कामलाई पनि ध्यान दिन आवश्यक छ । पछिल्लाे समय बढ्दै गएकाे जलवायु प्रदुषणकाे जाेखिमलाई कम गर्नका लागि पनि समन्वय समितकाे अहम भूमिका हुन्छ ।”

उद्योगलाई वातावरणमैत्री बनाउनका लागि अनुगमनलाई तिव्रता दिन सुझाव पनि उनले दिए । जिल्ला समन्वय समिति पर्साका प्रमुख निरन्जन साह साेनारकाे अध्यक्षतामा भएकाे कार्यक्रममा पर्सा क्षेत्र नम्बर ३ का प्रतिनिधि सभा सदस्य राजकुमार गुप्ता, वीरगंज महानगरपालिकाका प्रमुख राजेशमान सिंह लगायतकाे पनि उपस्थिति रहेकाे सांसद यादवका स्वकिय सचिव निखिल वर्णवालले जानकारी दिए ।

वीरगंज १५ मा अतिक्रमण गरेर बनाइएको संरचना हटाइयो

0

वीरगंज । वीरगंज महानगरपालिका वडा नम्वर १५ मा सडक अतिक्रमण गरि बनेका भौतिक संरचना हटाइएको छ । प्रतितमा चोक भित्रतर्फको ट्रान्सफरमर चोकदेखि ध्रुब यादवको घरसम्म निर्माणाधिन सडकको दायाँबायाँ परेका घर टहरा महानगरको टोलीले आइतबार डोजर लगाएर हटाएको हो ।

सडकको दायाँ बायाँ परेका ७ वटा पक्कि भवन तथा टहरा हटाएको महानगरका प्रहरी प्रमुख हरि भुषालले जानकारी दिनुभयो । सडक निर्माण भइरहेको र सडकमा परेका संरचना हटाउन पटक पटक अनुरोध गर्दा पनि अटेर गरेपछि महानगरको टोली पुगेर संरचना हटाएको हो ।

स्थानीयलाई संरचना हटाएर सडक निर्माण सहयोग गर्न पटक पटक अनुरोध गर्दा पनि अटेर गरेपछि महानगरको टोली बोलाएर अतिक्रमित संरचना हटाइएको वडा नम्वर १५ का वडा अध्यक्ष रमेश यादवले बताए ।

‘स्थानीयलाई पटक पटक अतिक्रमण गरेर संरचना हटाउन म आफैले अनुरोध गरे,’ उनले भने, ‘अटेर गरेपछि सडक निर्माणलाई अघि बढाउन महानगरको टोली बोलाएर अवरोध हटाउने लगाएको हुँ ।’ महानगरले अहिले सार्वजनिक तथा ऐलानी जग्गा खोजी तथा अतिक्रमित जग्गा मुक्त गराउने अभियान नै चलाइरहेको छ ।

मधेस प्रदेशमा रासायनिक मलको अभाव नहुने

0

वीरगंज । बर्सेनि धानखेतीको समयमा रासायनिक मलको अभाव झेल्दै आएका मधेस प्रदेशका किसानलाई यस वर्ष मलको समस्या नहुने जनाएको छ । कृषि सामग्री कम्पनी लिमिटेड मधेस प्रदेश प्रादेशिक कार्यालय वीरगंज पर्साले यस वर्ष असार महिनासम्म चाहिने जति मल गोदाममा रहेको र अन्य मल आउने क्रममा रहेकाले यस वर्ष धानखेतीको समयमा रासायनिक मल अभाव नहुने जनाएको छ । कृषि सामग्री कम्पनी प्रादेशिक कार्यालय वीरगन्ज पर्साका प्रमुख चन्द्रप्रसाद चम्लागाईँका अनुसार हाल युरिया छ हजार मेट्रिक टन र डिएपी तीन हजार मेट्रिक टन मल गोदाममा छ ।

गोदाममा मौज्दात रहेको मल असारसम्मका लागि पुग्ने र साउनको पहिलो साता थप मल आउने भएकाले यस वर्ष धानखेतीको समयमा मल अभाव नहुने प्रमुख चम्लागाईँको भनाइ छ । कृषि सामग्री कम्पनी प्रादेशिक कार्यालय वीरगन्ज पर्सामा चालु आव २०७९/८० को १० महिनामा एक लाख ७० मेट्रिक टन रासायनिक मल प्राप्त भएको छ । चालु आव २०७९/८० को साउनदेखि वैशाखसम्ममा एक लाख मेट्रिक टन युरिया र ७० हजार मेट्रिक टन डिएपी मल प्राप्त भएको प्रमुख चम्लागाईँले जानकारी दिए । यसबाहेक थप २०-२० हजार युरिया र डिएपी खरिदका लागि बोलपत्र स्वीकृत गर्ने प्रक्रियामा रहेको र सो बोलपत्र स्वीकृत भएर मल आए पनि मलको माग अत्यधिक रहेकाले त्यो २०८० असारसम्म मात्र धान्न सकिने प्रमुख चम्लागाईँले बताए ।

‘अहिलेसम्म युरिया र डिएपी गरी एक लाख ७० हजार मेट्रिक टन मल आइसक्यो, ५० हजार मेट्रिक टन मल आउने क्रममा छ र ४० हजार मेट्रिक टन मल बोलपत्र स्वीकृत प्रक्रियामा छ’, प्रमुख चम्लागाईँले भने, ‘हामीकहाँ आइसकेको, आउने क्रममा रहेको र बोलपत्र खरिद प्रक्रियामा रहेको मल सबै आयो भने पनि त्यो साउनसम्म धान्न सक्ने देखिन्छ ।’ थप मलका लागि प्रक्रिया सुरु भइसकेकाले धानखेतीको समयमा मल अभाव नहोला कि भन्ने हाम्रो अनुमान छ’, प्रमुख चम्लागाईँले भने । ‘धानखेतीको मुख्य सिजन असार, साउन र भदौमा रासायनिक मलको माग अत्यधिक हुन्छ, त्यो बेलासम्म अहिले प्राप्त भएको वा आउन लागेको मल पर्याप्त नभए पनि यस वर्ष साह्रै अभावचाहिँ नहोला ।’ त्यसैले धानखेतीको समयमा चाहिने थप मल खरिदका लागि अहिले नै प्रक्रिया सुरु गर्नुपर्छ’, उनले भने ।

जिटुजीमार्फत खरिद भएको रासायनिक मल प्राप्त भएलगत्तै जिल्ला जिल्लामा मल पठाउन थालिएको कृषि सामग्री कम्पनी लिमिटेड प्रादेशिक कार्यालय वीरगञ्ज पर्साले जनाएको छ । रासायनिक मल अभाव हुन नदिन मल प्राप्त भएलगत्तैबाट मलखाद्य बाँडफाँट भएअनुसार जिल्ला(जिल्लामा मल पठाउँदै आएको प्रमुख चम्लागाईँले बताए । मुलुकभर करिब सात लाख मेट्रिक टन रासायनिक मलको आवश्यकता रहे पनि हाल मागको करिब ५० प्रतिशत पनि आपूर्ति हुन नसक्दा बर्सेनि मलको हाहाकार हुने गरेको उनले बताए । मागबमोजिम आपूर्ति नभए पनि अघिल्लो आव २०७८/७९ को तुलनामा चालु आव २०७९/८० मा बढी मल आएको जनाएको छ ।

अघिल्लो आव २०७८/७९ मा युरिया ६० मेट्रिक टन र डिएपी ४० मेट्रिक टन मल आएको थियो । उहाँका अनुसार मधेस प्रदेश सरकारको भूमि व्यवस्था कृषि तथा सहकारी मन्त्रालयले मधेस प्रदेशमा वर्षभरिका लागि चार लाख ६३ हजार मल चाहिने भन्दै पत्र पठाएको छ । ‘यसरी हेर्दा अहिले आइरहेको मल मधेस प्रदेशकै लागि पनि अपुग हुने देखिन्छ’, प्रमुख चम्लागाईँले भने, ‘यस्तो स्थितिमा कसरी मल पुर्याउन सकिन्छ, सम्भव नै देखिँदैन ।’ त्यसैले बर्सेनि मल अभाव हुनु स्वभाविक नै हो, उनको कथन छ ।

सो कार्यालयमार्फत मधेस प्रदेशको आठवटै जिल्ला, बागमती प्रदेशका १० जिल्ला र गण्डकी प्रदेशको तनहुँ, लमजुङ, गोरखा, कास्की, पर्वतलगायतका जिल्लामा रासायनिक मल पठाउँदै आएको छ । बर्सेनि डिएपी र युरिया मल आपूर्ति कम भएपछि किसानलाई मलखाद्यको समस्या हुने गरेको नेपाल कृषक महासङ्घ मधेस प्रदेशका अध्यक्ष मुक्ति यादवले बताए । मागअनुसार मलको आपूर्ति नहुदाँ बर्सेनि किसान मलका लागि डिलर चहार्ने गरे पनि सहजरूपमा पाउने अवस्था नरहेको उनको भनाइ छ । रासस