Date
सोम, कार्तिक ३०, २०८३
Mon, November 16, 2026
Home Blog Page 523

पटेर्वा सुगौलीमा कृषकहरुलाई कृषि सामाग्री वितरण

0

वीरगंज । पर्साकाे पटेर्वा सुगौली गाउँपालिकाले आइतबार कृषकहरुलाई कृषि सामाग्री वितरण गरेकाे छ । गाँउपालिकाकाे वडा नम्बर ५ निचुटामा तरकारी पकेट विकास कार्यक्रम अन्तर्गत किसानहरुलाई कृषि उपकरण, जैविक मल र विषादी वितरण गरिएको गाउँपालिका कार्यालयले जनाएकाे छ ।

निचुटामा आयाेजित एक कार्यक्रममा गाँउपालिकाका अध्यक्ष दिनेश चाैधरीले किसानलाई सिंचाइका लागि विद्युतीय माेटर १० थान, विषादी छर्कने स्प्रे ट्यांकी ३६ थान, जैविक मल र विषादी वितरण गरेका हुन् ।

तरकारी पकेट विकास कार्यक्रमका लागि गाँउपालिकाले विनियोजन गरेकाे ६ लाख रुपैयाँ बजेटबाट ती सामग्रीहरु खरिद गरि आइतबार वितरण गरिएको गाँउपालिकाकाे कृषि शाखा प्रमुख सिमा चाैधरीले जानकारी दिइन् ।

आ.व २०७८/०७९ मा स्थापना भएको तरकारी बाली पकेट कार्यक्रमकाे निरन्तरता अन्तर्गत आ.व २०७९/०८० पनि श्री सहकारी संस्था निचुटालाई तरकारी पकेट विकास कार्यक्रमलाई निरन्तरता दिदै कृषकहरुलाई कृषि सामाग्री वितरण गरिएकाे जनाइएकाे छ ।

जगरनाथपुरमा नि:शुल्क महिला स्वास्थ्य शिविर सम्पन्न

0

वीरगंज । पर्साकाे जगरनाथपुर गाँउपालिका वडा नं. ३ बिजबनियामा शुक्रबार पाठेघर (आंग) खस्ने, अबष्ट्रेटीक फिस्टुला, पाठेघर क्यान्सर, भी.आई.ए. सम्बन्धि निशुल्क जाँच शिविर सम्पन्न भएकाे छ ।

स्वास्थ्य चाैकी बिजबनियामा भएकाे शिविरकाे उद्घाटन गाउँपालिका अध्यक्ष श्रीकान्त प्रसाद यादवले गरेका थिए । शिविरकाे उद्घाटन गर्दै अध्यक्ष यादवले महिलाहरु प्रजनन् स्वास्थ्य प्रति सजग रहन जरुरी रहेकाे वताए । 

प्रभु हस्पिटल वीरगंजकाे सहकार्यमा भएकाे शिविरमा ४ सय जना भन्दा बढी महिलाहरुले जाँच गराएकाे गाउँपालिकाका स्वास्थ्य संयाेजक प्रभेन्द्र साहले जानकारी दिए । गाउँपालिकाकाे स्वास्थ्य शाखाकाे आयाेजनामा भएकाे शिविरमा सहभागि महिलाहरुलाई आवश्यकता अनुसार औषधी पनि वितरण गरिएको थियाे ।

प्रजनन् रुग्णता स्वास्थ्य सेवा कार्यक्रम अन्तर्गत भएकाे शिविरमा प्रभु हस्पिटलकी वरिष्ठ स्त्रीराेग विशेषज्ञ डाक्टर लक्ष्मी थापा नेतृत्वको चिकित्सक र पाेखरिया अस्पतालका स्वास्थ्यकर्मीहरुकाे टाेलीले महिलाहरुकाे स्वास्थ्य परिक्षण गरेकाे थियाे ।

शिविरमा गाउँपालिकाकी उपाध्यक्ष बबिता सिंह क्षेत्री, वडा नम्बर ३ का वडाध्यक्ष सुवास यादव, स्वास्थ चौकी बिजबनियाका ईन्चार्ज अमोद कुमार साह, स्वास्थ्यकर्मी  अशाेक पटेल, दिलिपराज कार्की लगायतको पनि उपस्थिति रहेकाे थियाे ।

पप्पु कन्स्ट्रक्सनका संस्थापक हरिनारायण रौनियार पक्राउ

0

वीरगञ्ज । पप्पु कन्स्ट्रक्सनका संस्थापक हरिनारायण रौनियारलाई प्रहरीले पक्राउ गरेको छ । प्रहरी वृत्त, बानेश्वरको टोलीले रौनियारलाई पक्राउ गरेको नेपाल प्रहरीका प्रवक्ता कुवेर कडायतले बताए ।

रौनियारविरुद्ध जिल्ला प्रहरी कार्यालय, बाँकेमा ठगीसम्बन्धी कसूरमा किटानी जाहेरी दर्ता थियो । बाँकेका एसपी सन्तोष सिंह राठौरका अनुसार रौनियार काठमाडौंमा बस्ने भएकाले पक्राउ गरिदिन जिल्ला प्रहरी परिसर, काठमाडौंलाई अनुरोध गरिएको थियो ।

रौनियार पर्सा क्षेत्र नम्बर ३ बाट निर्वाचित पूर्वसांसद समेत हुन् । सांसद रहेकै बेला उनीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेपछि निलम्बन भएरै उनको कार्यकाल वितेको थियो ।

उनी संघीय समाजवादी फोरमबाट सांसद निर्वाचित भएका थिए । हाल उनी जनता समाजवादी पार्टी (जसपा) का नेता समेत हुन् ।

सनराईज बैँक बिन्दवासिनीद्वारा विद्यालयलाई राउन्ड टेबलसहित कुर्सी सहयाेग

0

वीरगंज । पर्साकाे बिन्दवासिनी गाउँपालिकामा रहेकाे सनराईज बैँकले एक विद्यालयलाई राउन्ड टेबलसहित कुर्सी सहयाेग गरेकाे छ। बिन्दवासिनी गाउँपालिकाकाे वडा नं. ३ मा रहेकाे श्री रामस्वरूप रामपृत चाैरसिया माध्यमिक बिधालयलाई राउन्ड टेबलसहित १२ वटा कुर्सी सहयाेग गरेकाे हाे ।

विद्यालयमै पुगि बैंकले एक कार्यक्रमका बिच विद्यालयका प्रधानाध्यापक रामचन्द्र महताेलाई साे सामग्री हस्तान्तरण गरिएकाे जनाएकाे छ । सँस्थागत सामाजिक उतरदायित्व कार्यक्रम अन्तर्गत विद्यालयलाई आवश्यकता अनुसारकाे सामग्री सहयाेग गरिएकाे बैंकका मधेश प्रदेश प्रमुख दिपक पडितले बताए ।

सामग्रि बुझ्दै प्रधानाध्यापक महताेले सनराईज बैँकका सम्पुर्ण सदस्यलाई विद्यालय परिवार तथा ब्यक्तिगत तर्फबाट धन्यवाद दिद‌ै विद्यालय तथा बिधार्थीकाे हकहितका लागि अगामी दिनमा पनि सहयाेगकाे अपेक्षा राखे ।

 विद्यालयका सँस्थापक एवम् पुर्व बिधालय ब्यवस्थापक समितिका अध्यक्ष रामचन्द्र चाैरसियाकाे अध्यक्षतामा र सनराईज ब‌ैँक मधेश प्रदेश प्रमुख दिपक पँडितकाे प्रमुख आतिथ्यतामा भएकाे सामग्री हस्तान्तरण कार्यक्रममा बिन्दवासिनी गाउँपालिकाकी उपाध्यक्ष ज्याेति चाैरसिया, शिक्षा शाखा प्रमुख कपिल लामिक्षाने, वडाध्यक्ष जयप्रकाश चाैरसिया, अनाेज चाैरसिया, सनराईज बैँक बिन्दवासिनी शाखाका प्रमुख विश्व प्रताप चाैधुरी लगायतकाे उपस्थिती रहेकाे थियाे । कार्यक्रमकाे सहजिकरण शिक्षक सुकदेव चाैरसियाले गरेका थिए ।

जगरनाथपुर र पाेखरियामा राेपाइँ गरेर धान दिवस मनाइयाे

0

वीरगंज ।  देशैभर जस्तै पर्सामा पनि विभिन्न कार्यक्रम गरी २० औँ राष्ट्रिय धान दिवस मनाइएकाे छ । यो वर्ष ‘जलवायु अनुकूलित कृषकमैत्री प्रविधि, धान उत्पादनमा वृद्धि’ भन्ने नाराका साथ राष्ट्रिय धान दिवस मनाइएकाे हाे ।

दिवसका अवसरमा पर्साकाे जगरनाथपुर गाउँपालिकामा धान रोपाइँ कार्यक्रम सम्पन्न भएकाे छ । जगरनाथपुर गाउँपालिकाकाे कृषि विकास शाखाकाे आयोजनामा गाउँपालिकाकाे वडा नं. ४ हरपुरमा रोपाइँ महोत्सव आयोजना गरि दिवस मनाइएकाे गाउँपालिकाका कर्मचारी दयानन्द साहले जानकारी दिए ।

उक्त कार्यक्रममा सहभागि गाउँपालिका अध्यक्ष श्रीकान्त प्रसाद यादव, उपाध्यक्ष बबिता सिंह क्षेत्री, वडाध्यक्ष सुभाष यादव, प्रभु प्रसाद नुनिया, गाउँपालिकाका कर्मचारी लगायतकाले धान राेपेर दिवस मनाएकाे उनले वताए ।

साे अवसरमा वाेल्दै गाउँपालिका अध्यक्ष यादवले धान हरेक नेपालीको आर्थिक, सामाजिक तथा सांस्कृतिक जीवनसँग गाँसिएको वताए । उनले जन्मेदेखि मृत्युसम्मका कर्ममा तथा वर्षभरि मनाइने विभिन्न चाडपर्वमा समेत धानको प्रयोग अपरिहार्य हुने भएकाले धान हाम्रो खाद्यान्नमात्र नभएर संस्कृतिको धरोहर पनि रहेकाे वताए ।

कार्यक्रममा सहभागि कृषकहरुलाई गाउँपालिका अध्यक्ष यादवले रु ५ हजारका दरले वितरण समेत गर्नु भएकाे स्थानिय मन्जय गिरीले जानकारी दिए ।

यसैगरी पर्साकाे पाेखरिया नगरपालिकामा पनि राष्ट्रिय धान दिवस मनाइएकाे छ । दिवसकाे अवसरमा पोखरिया नगरपालिकाक़ो आयोजनामा धान राेपाई कार्यक्रम सम्पन्न भएकाे हाे ।

पोखरिया नगरपालिका मेयर प्रदुमन प्रसाद चौहान, उप मेयर रूबी ठाकुर, अधिकृत अजय श्रीवास्तव, एमाले पाेखरियाका अध्यक्ष बिंध्याचल ठाकुर, वडाका वडा अध्यक्ष, वडा सदस्य, नगरपालिकाका कर्मचारहरुकाे समुह स्थानियकाे खेत मै पुगि धान राेप्नुकाे साथै धान दिवसकाे शुभकामना अदानप्रदान गरेर दिवस मनाएका हुन् ।

विसं २०६१ मा विश्वका ४३ राष्ट्रले संयुक्त राष्ट्रसङ्घलाई अन्तर्राष्ट्रिय धान वर्ष घोषणा गरेपछि नेपालमा पनि यो दिवसका रूपमा मनाउन सुरु गरिएको हो । असार १५ लाई नेपाली समाजमा दही चिउरा खाने पर्वका रूपमा पनि लिइन्छ । कृषिसहित सबै पेसा–व्यवसायमा लागेका नेपालीले दही चिउरा खाई असार १५ मनाउँछन् । 

सबैठवामा दुई दिने आयुर्वेद स्वास्थ्य शिविर सुरु

0

वीरगंज । पर्साकाे पकहाँ मैनपुर गाउँपालिका वडा नम्बर ५ सबैठवामा बिहिबारदेखि नि:शुल्क २ दिने बिशेषज्ञय आयुर्वेद स्वास्थ्य शिविर सुरु भएकाे छ । 

सात्वीक आययुर्वेद अस्पतालको सहयोग प्रादेशिक आर्युर्वेद तथा बैकल्पिक चिकित्सालय वीरगंज पर्साको आयोजना र पकहाँ मैनपुर गाउँपालिकाको प्रायाेजना शिविर सुरु भएकाे हाे । 

शिविरकाे एक कार्यक्रमकाे बिच पकहाँ मैनपुर गाउँपालिकाका अध्यक्ष सुरेश प्रसाद मेहताले उद्घाटन गरेका हुन् । शिविरकाे उद्घाटन गर्दै गाउँपालिका अध्यक्ष मेहताले आयुर्वेदिक उपचार नै स्वास्थ्यकाे लागि ठिक भएकाे वताए । 

वडाअध्यक्ष बलिराम चौरसियाको अध्यक्षतामा भएकाे शिविर उद्घाटन कार्यक्रमका बिशिष्ठ अतिथी डा. सचित कुमारले पर्सामा ५ वटा आयुर्वेद अस्पतालको शाखा निमार्ण गराउन आफु उत्सुक रहेको बताए ।

गाउँपालिका उपाध्यक्षकी स्वकीय सचिव नसुरुल्लाह मियाँले अंग्रेजी औषधीले शरीरलाई हानी पुर्‍याउने गरे पनि आयुर्वेदले नपुर्‍याउने गरेकाे बताए ।

श्री नेपाल राष्ट्रिय आधारभुत बिधालय सबैठवामा सुरु भएकाे शिविर उद्घाटन समारोहममा प्रमुख प्रशासकिय अधिकृत राज कुश्वाहा, डा. रमेश मिश्र, डा. प्रभाकर मनु, डा. उमेश साह लगायतकाले शुभकामना मन्तब्य राखेका थिए ।

शिविरकाे पहिलाे दिन बिहिबार २ सय ५० महिला र २ सय ३१ जना पुरुषले चेकजाँच गराई औषधी समेत लिएकाे आयाेजकले जनाएकाे छ ।

पकहाँ मैनपुरमा आयआर्जन सम्बन्धी अभिमुखिकरण

0

वीरगंज । पर्साकाे पकहाँ मैनपुर गाउँपालिकामा लैगिंक तथा घरेलु हिंसा न्युनिकरण बारे श्रीमान श्रीमती अन्तरक्रिया, सहकारीका महिला र सुनौलो हजार दिनका आमाहरुलाई आयआर्जन सम्बन्धी २ दिने अभिमुखिकरण कार्यक्रम बिहिबार सम्पन्न भएकाे छ ।

सबैको लागी पोषण सधैको लागी पोषण मुल नाराका साथ संचालित बहुक्षेत्रिय पोषण योजना कार्यक्रम अन्तर्गत पकहाँ मैनपुर गाउँपालिकाकाे वडा नम्बर १ धोरेस्थित रेडक्रस भवनमा भएकाे कार्यक्रम सम्पन्न भएकाे हाे ।

गाउँ कार्यपालिका सदस्य रामबहादुर साह सोनारको अध्यक्षतामा भएकाे समापन समाराेहमा गाउँपालिका अध्यक्ष सुरेश प्रसाद मेहताले आमा र बच्चा दुबैलाई पाेषण जरुरी रहेकाे वताए ।

युनिसेफ नेपालको सहयोग र पकहाँ मैनपुर गाउँपालिकाको आयोजनामा भएकाे अभिमुखिकरण कार्यक्रममा पोषण सहजकर्ता गणेश राम र पोषण संयोजक प्रमुखले प्रशिक्षण दिएकाे स्थानिय सहकारी संस्थाका अध्यक्ष उमेश बैठाले जानकारी दिए ।

कार्यक्रममा सहकारीका महिला र सुनौलो हजारका ४० जनाको सहभागीता रहेको थियाे ।

वीरगंज महानगरद्वारा ज्येष्ठ पत्रकारलाई पेन्सन वितरण गर्न कार्यदल गठन

0

वीरगंज । वीरगंज महानगरपालिकाको आम सञ्चार माध्यम प्रवर्धन तथा नियमन समितिले ज्येष्ठ पत्रकार पेन्सन कोष कार्यविधि तयार गर्न कार्यदल गठन गरेको छ ।

आम सञ्चार ऐन २०७८ तथा बीरगंज महानगरपालिकाको १२ औं नगर सभाले ज्येष्ठ पत्रकारलाई पेन्सन वितरण गर्ने नीति अवलम्बिन गरेसँगै कार्यविधि तयारका लागि समितिका सदस्य रामनारायण कुर्मी, नवराज फुयांल, आविद हुसेन, माधुरी महतो र कानुन अधिकृत ईश्वर बराल रहने गरी ५ सदस्यीय कार्यदल गठन गरेको समितिका संयोजक धुव अधिकारीले जानकारी दिए ।

त्यसैगरी समितिको वैठकले वीरगंज महानगरपालिकाको टेण्डर, विज्ञापन लगायत अन्य सुचना राष्ट्रिय तथा स्थानिय माध्यमहरुबाट प्रकाशन तथा प्रशारण गराउन दर रेटमा विविधता पाईएको हुँदा त्यसलाई एकरुपतामा ल्याउन दर रेट निर्धारण कार्यदल समेत गठन गरेको छ ।  समितिका मनोज पटेल, मुस्कान श्रेष्ठ र अमित अग्रवाल सदस्य रहेको कार्यदलले एक साता भित्र प्रतिवेदन पेश गर्ने निर्णय वैठकले गरेको संयोजक अधिकारीले बताए ।

त्यसैगरी वैठकले लोक कल्याणकारी विज्ञापन वापतको अन्तिम किस्ताको विल लगायत आवश्यक कागजात ५ दिन भित्र सुचना शाखामा पेश गर्न वीरगंजका सम्पूर्ण आम सञ्चार माध्यमलाई आग्रह गरेको छ ।

आम सञ्चार माध्यम प्रवर्धन तथा नियमन समिति वीरगंज महानगरपालिकाका संयोजक ध्रुव अधिकारीको अध्यक्षतामा सम्पन्न वैठकमा नगर प्रमुखका प्रेस सल्लाहकार महेश दास, वीरगंज महानगरपालिकाका प्रशासन प्रमुख राज ताम्राकार, सूचना तथा प्रशारण शाखा प्रमुख शम्भु कुशवाहा लगायतको सहभागिता रहेको थियो ।

मोबाइल प्रयोगले बालबालिकामा एकोहोरो हुने, रिसाउने, झर्किनेजस्ता समस्या

0
काठमाडौँ । स्वास्थ्य तथा जनसङ्ख्या मन्त्रालायले बालबालिकामा मोबाइलको प्रयोगले सर्वाङ्गीण विकासमा असर पार्ने जनाएको छ । 
 
मन्त्रालयका सहप्रवक्ता डा समीरकुमार अधिकारीले मस्तिष्क विकास हुने अधिकतम उमेरमा मोबाइलको लत लागेमा बालबालिकाको सर्वाङ्गीण विकासमै असर पुग्ने बताउनुुहन्छ  । बालबालिकाले मोबाइल फोन चलाउँदा निद्रा ढिलो लाग्ने, निद्रा पातलो हुने र निद्राबाट पटक पटक ब्युँझिने समस्या देखिन सक्नेजस्ता समस्या हुनेमा जोड दिँदै  उहाँले बालबालिकालाई मोबाइल फोनसँग टाढा राख्न अभिभावकलाई अनुरोध गर्नुभएको छ । 
 
यसैगरी बालबालिकाका आमा र बुबा तथा अभिभावकलाई आफ्नो सजिलो र छिटोका लागि बालबालिकालाई मोबाइल देखाएर खानेकुरा नखुवाउनसमेत आग्रह गरिएको छ । 
 
मोबाइल देखाएर बालबालिकालाई खाना खुवाउनाले बालबालिकाले आफूले के कुरा खाइरहेको छु, कस्तो खानेकुरा खाइरहेको छु भनेर थाहा नपाउने हुँदा पोषणसम्बन्धी समस्या र पाचन प्रणालीमा समस्यासमेत देखिन सक्ने मन्त्रालयले जनाएको छ । 
 
मन्त्रालयले खाना खुवाउँदा अभिभावकले बालबालिकासँग कुराकानी गरेर डुलेर, गीत गाएर वा उनीहरूको हाउभाउमा प्रतिक्रिया दिँदै खुवाउन आग्रह गरेको छ । 
 
यसैगरी मोबाइलमा लत लागेका बालबालिकामा एकोहोरो हुने, रिसाउने, झर्किने, रुने, दोहोरो कुरा नगर्नेजस्ता समस्या देखिन सक्ने बताइएको छ । 
 
यस्तै बच्चा ठूलो भएपछि झन् खान नमान्ने वा राम्ररी नचपाई खानेकुरा छिटो निल्ने समस्या बढ्नाका साथै  सुत्नुभन्दा अगाडि मोबाइल हेरेका बालबालिकामा मोबाइल स्क्रिनबाट आउने उज्जालोले निद्रा लाग्ने हार्मोन उत्सर्जनमा समस्या हुने बताइएको छ । रासस

भाटभटेनीका सञ्चालक गुरुङ पक्राउ 

0
वीरगंज । ललिता निवास प्रकरणको अनुसन्धानका लागि भन्दै भाटभटेनी सुपरमार्केटका सञ्चालक मीनबहादुर गुरुङलाई प्रहरीले नियन्त्रणमा लिएको छ । 
 
प्रहरीको केन्द्रीय अनुसन्धान ब्यूरोको टोलीले गुरुङलाई मंगलबार बिहान काठमाडौँबाट पक्राउ गरेको नेपाल प्रहरीका प्रवक्ता प्रहरी नायव महानिरीक्षक कुबेर कडायतले जानकारी दिए । 
 
प्रहरीले त्यस विषयमा विशेष अपरेसन चलाइरहेको जनाएको छ । प्रहरीले उक्त प्रकरणमा संलग्न भएको आशङ्कामा थप केही व्यक्ति पनि खोजी गरिरहेको उनले जानकारी दिए ।
 
ललिता निवास प्रकरणमा यसअघि तीन सय जनालाई प्रतिवादी बनाएर प्रहरीको केन्द्रीय अनुसन्धान ब्यूरोले सरकारी वकिलको कार्यालयमा प्रतिवेदन बुझाएको थियो । तर सरकारी वकिलको कार्यालयले थप अनुसन्धान गर्नुपर्ने जनाउँदै फाइल फिर्ता पठाएको थियो । 
 
उक्त घटनाको सन्दर्भमा अख्तियार दुरुपयोग अनुसन्धान आयोगले छुट्टै अनुसन्धान गरेर विशेष अदालतमा दर्ता गरेको मुद्दा अहिले पनि विचाराधीन छ । सरकारको स्वामित्वमा रहेको बालुवाटारस्थित ललिता निवासको जग्गा विभिन्न व्यक्तिका नाममा नामसारी गरेको आरोपमा प्रहरीले कारबाही अघि बढाएको छ ।