Date
सोम, कार्तिक ३०, २०८३
Mon, November 16, 2026
Home Blog Page 504

वैदेशिक रोजगारीबाट फर्केका संदिप बने एक सफल युवा उद्यमी

0

आनन्द पटेल /
परवानीपुर । ‘वर्षौं देखिको सपना थियो कि एक दिन आफ्नै गाउँमा आफ्नो व्यवसाय होस्, आफ्नै देशमा केहि गर्न सकूँ, आफ्नै परिवारसँगै बसेर खुशीको दिन होस् या दु:खको दिन बाँच्न सकूँ र आज यो सपना पुरा हुँदा निकै खुशी लागेको छ ।‘ यो सुन्दर सपनालाई देख्नेर देखेको सपनालाई पुरा गर्ने आँट बाराको प्रसौनी गाउँपालीका वडा नं १ प्रसौनी टोल बस्ने २७ वर्षिया यूवा संदिप साह तेलीले गरेका हुन् । संदिप आजकल आफ्नो नयाँ व्य्वासयाले चर्चामा छन् । उनले आफ्नै टोलमा नयाँ उद्योग ‘साह बेकरी उद्योग’ संचालन गरेर आफ्नो टोल मात्र नभई जिल्लामै चर्चामा आएका छन् ।

यति कम उमेरमा नै आफ्नै ठाउँमा व्यवस्थित रुपमा बेकरी उद्योग खोल्नु र त्यसलाई चलाउनु आफैमा एउटा ठूलो साहस भएको स्थानीय सुनिल साह तेली बताउछन् । संदिपको यो साहसले यहाँका यूवाहरुमा आशा फैलाएको छ । उनी धेरैको लागि अहिले प्रसौनीमा एउटा सुन्दर प्रेरणा बनेका छन् । अझ तिनीहरुका लागि जो यो देशमा केहि गर्न सकिंदैन, देशमा केहि गर्ने माहोल नै छैन भनेर निराश छन् ।

उनको यो उद्योगमा बेकरी सम्बन्धि सबै प्रकारका बेकरी आईटमहरु उत्पादन हुन्छ जस्तै पाउरोटी, केक, बर्फी, सेल आदि । उनी यो व्यवसायले निकै खुःशी छन् । किनकी यसले उनको वर्षौ देखिको आफ्नो गाउँठाउँमै केहि गर्ने सपना जो साकार बनाएको छ । उनको यो सपना साकार गर्न उनी मात्र होइन उनको परिवारको पनि ठूलो सहयोग छ । उनको यो व्यवसायले उनको मात्र होइन उनको परिवारकै सपना पुरा भएको छ । संदिपको यो व्यवसायले अहिले प्रसौनी टोलमा युवा उद्यमीको रुपमा एउटा नयाँ विकासको आधार पाएको छ ।

प्रसौनी गाउँपालीका वडा नं १ प्रसौनी बजार बस्ने स्थानीय राजेन्द्र साह तेलीको तीन जना छोरा मध्ये जेठो छोरा संदिप १८ वर्षको उमेरमा वि.सं. २०७१ साल जेष्ठ महिनामा वैदेशिक रोजगारीको सिलसिलामा मलेसिया पुगे । मलेसिया स्थित गाडेनिया बेक्रीज कम्पनीमा  सुरुमा उनले बेकरी उत्पादन हुने प्रोडक्सन कम्पनीमा काम पाए । काम पाईसकेपछि उनले दायाँबायाँ केही नसोची आफ्नो काममा ध्यान दिँदै लगनशीलताका साथ काम गर्न थाले । उनले एक दिन पनि आफ्नो डिउटीमा लापरवाही गरेनन् र उनको त्यहि कडा मिहिनेत र लगनशीलतालाई देखेर कम्पनीले करिब नौ महिना काम गरिसकेपछि उनलाई सेक्सन ईनर्चाजको जीम्मेवारी दियो । त्यसपछि उनले सात वर्षसम्म पछाडि र्फकेर हेरेनन् । तीन सालको लागि वैदेशिक रोजगारीमा गएका उनी पैसा र आफ्नो परिवारको सुखद भविष्यका लागि त्यही कम्पनीमा समय अवधी थप गरेर ७ वर्षसम्म काम गरे । ‘गएको केहि समयमै प्रगति भएको भए पनि वैदेशिक यात्रा मेरो लागि त्यति सजिलो भएन ।‘ उनी आफ्नो वैदेशिक यात्रा सम्झदै टोलाउछन्  ।  उनी भन्छन् ‘यो सात वर्षमा मेरो जीवनमा धेरै उतार चढावहरु आए । यो सात वर्ष धेरै दु:खमा बित्यो ।‘

आर्थिक अवस्था कमजोर भएको परिवारमा जन्मिएका उनी परिवारको जेठो छोरा भएकोले प्राय: सबै जिम्मेवारी उनमा थियो । उनी सानै उमेरदेखि पढाईमा निकै रुची राख्थे । उनी स्कुलमा राम्रो अंक ल्याउने विद्यार्थीमा पर्दथे । उनको पढाईलाई देखेर छिमकीहरु पनि उनको तारिफ गर्दथे । ठूलो भएर एकदिन सरकारी जागिर खाने संदिपको सानै देखिको सपना थियो । उनले पढाईमा राम्रो गर्न थालेपछि स्कुलका शिक्षक, शिक्षिका लगायत टोलका ठुलाबडाबाट माया र स्नेह पाउने गर्दथे । तर समयको खेल कसलाई थाहा हुन्छ र ! पढदै जाँदा जब उनी कक्षा दश अर्थात् एसएलसी परिक्षा दिन तयार हुँदै थिए, त्यही समयमा उनको घरमा ठूलो समस्या आईपर्यो । त्यतिबेला घरमा बुबा मात्र एउटा कमाउने थिए जसको कारण परिवारको दैनिक आवश्यकता पुरा गर्न धेरै समस्या हुन्थ्यो । दैनिक ज्यालादारीमा काम गर्ने उनका बुबालाई छोराहरुलाई पढाउन गाह्रो हुन थाल्यो ।

बुबाको व्यथालाई बुझेर संदिपले अब पढाई छाडेर बरु विदेश नै गएर पैसा कमाउनु पो पर्छ कि भनेर सोच्न थाले । पढेर सरकारी जागिर खाने रहर हुँदा हुँदै पनि उनले अन्त्यमा अरु केहि विकल्प नदेखेपछि विदेश जाने र्निणय गरे । उनको यो निर्णयलाई बुबाले पनि टार्न सकेनन् । त्यसपछि राम्रो पढाईलाई छाडेर उनी वैदेशिक रोजगारीको यात्रामा जुटे । त्यसपछि सबै भन्दा पहिला बुबाको सहयोगमा उनले जील्ला प्रशासन कार्यालयमा गएर आफ्नो नेपाली नागरिकता बनाए । त्यसपछि उनी राम्रो कामको खोजीमा म्यानपावर कम्पनीहरु धाउन थाले । त्यतीबेला गाउँबाट अरु यूवाहरु पनि वैदेशिक रोजगारीमा जाने तयारीमा थिए । छोरालाई कुन काममा पठाउने भन्ने चिन्ता बुबालाई धेरै थियो । बुबा पनि उनको लागि राम्रो काम खोज्न एजेन्ट र म्यानपावरहरु धाउन थाले । लामो प्रयासपछि काठमाण्डौको एउटा म्यानपावरमा उनलाई विदेश जाने अवसर पायो । त्यहाँ कुराकानी गरिसकेपछि उनले विदेश जाने प्रक्रियालाई अगाडि बढाए । उनी भन्छन् ‘सुनेको थिएँ सीप बिनाको मान्छेको केहि काम छैन ।  साँच्चै रहेछ ! काम गर्ने कुनै सीप नभएपछि काम पाउन त्यती सजीलो रहेनछ । त्यसमाथि विरानो ठाउँ, विराना मान्छे ।‘ त्यसमाथि विदेश जाने तरखर गरिरहँदा उनी भरखर कक्षा दशमा अध्यननरत थिए । एसएलसी परिक्षा दिन तयारीमा जुटेका उनको मलेसियाबाट विदेशमा काम गर्नका लागि भिसा आयो । त्यति कलिलो उमेर त्यसमाथि घर छोडेर कतै नगएको अनि केहि काम गरेको, सीप सिकेको अनुभव पनि नभएको एउटा १८ वर्षको केटो सपना र डर दुवै बोकेर विदेशी रहँदाको त्यो क्षण सम्झिदा संदिप अझै पनि भावुक हुन्छन् । उनी भन्छन् ‘त्यो क्षण सम्झिदा मलाई अझैपनि लागिरहन्छ देशले युवाहरुको सीप र रोजगारीलाई प्राथमिकतामा राख्न सके १७-१८ वर्षको उर्जाहरुलाई देशमै प्रयोग गर्न अथवा लौ विदेशमै काम सिक्न पठाउने हो भने पनि सीप सिकाएर पठाउन पाए कस्तो गज्जब हुन्थ्यो होला ।‘

आफ्नो र परिवारको सुन्दर भविष्यको लागि वैदेशिक रोजगारीमा जाने निर्णय त गरियो तर पनि पढाई प्रतिको उनको मोह त्याग्न उनलाई निकै सकस पर्यो भन्छन् उनी ‘भिसा आईसकेपछि म्यानपावर कम्पनीले अफिसमा आएर सम्पर्क गर्न भने । यस्तो अवस्थामा मलाई धेरै समस्या भयो । किनकी हरेक बिधार्थीलाई शिक्षा हासिल गर्ने ठूलो चाहना र सपना हुन्छ । म्यानपावरको फोन आईसकेपछि  बुबासँग काठमाण्डौ पुगें । त्यहाँ पुगीसकेपछि म्यानपावर कम्पनीले भिसा र काम गर्न जाने कम्पनीको बारेमा जानकारी दिएपछि अन्य प्रक्रियाहरु अगाडि बढ्यो । म अझै सम्झन्छु मेरो अगाडि एसएलसी परिक्षा दिने ठूलो अवसर थियो, कम्तीमा आईरन गेट पार गरेर बाहिर जाउँला सोचेको थिएँ तर ठिक त्यही समयमा मलेसियाबाट भिसा आईदियो । घरको अवस्था र भाईहरुको भविष्यका लागि केही नसोची आफ्नो पढ्ने सपनालाई त्यागेर बाध्य भएर बिदेश जाने र्निणय गर्नु पर्यो ।’ संदिपले आफ्नो दुःखेसो पोखे ।

‘पढ्न पाउनु हरेकको अधिकार हो र राम्रो काम गर्न पाउनु पनि हरेकको अधिकार हो तर आफ्नो पढाईको स्तरको जागिर खोज्न पाएन । यो मेरो जीवनको सबै भन्दा पीडादायी क्षण थियो’ संदिपले भने । त्यो बेला गाउँमा यदि कुनै विधार्थीले कक्षा दशको परिक्षा पास गर्थ्यो भने उसले गाउँमा धेरै मान सम्मान पाउथ्यो । समाजमा उसको घरप्रति हेर्ने मानिसहरुको दृष्टीकोण नै फरक हुन्थ्यो । तर संदिपले अन्तिम घडीमा आएर यो मान सम्मानको अनुभव गर्नपाएन जुन कुराले अझैपनि संदिपलाई मनमा कहिँकतै पिरोली रहन्छ । उनलाई मात्र कहाँ हो र ! पढ्ने र खेल्ने उमेरमा छोरालाई विदेश काम गर्न पठाउँदा बुबा गजेन्द्रको मनले पनि कहाँ मानेको थियो र तर घरको अवस्था अप्ठ्यारो भएपछि उनले छोरालाई रोक्न सकेनन् र मनलाई रुवाएर भएपनि छोरालाई ब्याजमा दुई लाख रुपैयाँ ऋण लिएर विदेश पठाए । गजेन्द्र त्यो दिन सम्झेर भन्छन् ‘सायद मजस्तो कति बुबाहरुले आफ्नो घरको अवस्था सुधार्न आफ्ना छोराहरुको रहरलाई मार्नु पर्यो होला । सम्झिदा सार्है नमजा लाग्छ अझैपनि तर सायद त्यो निर्णय नलिँदो हो त अहिले हामी जहाँ छौं त्यहाँ आईपुग्न गाह्रो हुन्थ्यो होला । नत्र हामी जस्तो केहि नहुनेसँग उद्योग गर्ने कल्पना समेत पनि हुँदैन थियो होला ।‘

’आफनो संन्तानलाई पढ्ने उमेरमा विदेशमा काम गर्न जाउ भन्ने चाहना कुन अभिभावकको हुन्छ र? तर घरको आर्थिक अवस्था कमजोर भईसकेपछि र बाँकी दुई जना छोराहरुको भविष्यको बारेमा सोचेर नै छोराले विदेश जाने हट गरेपछी आफू बाध्य भएर विदेश पठाएको ‘ बुबा गजेन्द्र साह तेलीको दुःखेसो छ । मलेसिया स्थित गाडेनिया बेक्रीज कम्पनीमा संदिप नौ महिनासम्म काम गरिसकेपछि उनलाई कम्पनीले ईन्चार्जको जीम्मेवारी दियो । ईन्चार्जको जीम्मेवारी पाईसकेपछि संदिपले बेकरी समबन्धी कामलाई राम्रोसँग जान्ने र सिक्ने मौका पाए । यहि दौरान नै उनले मनमनै आफ्नो गाउँमा बेकरी उधोग खोल्ने निर्णय गरिसकेका थिए । त्यसको लागि उनलाई पुँजी र सीप दुवैको आवश्यकता पर्थ्यो । त्यो उर्जाले पनि संदिपले लगातार सात वर्षसम्म त्यही कम्पनीमा कडा मिहिनेतका काम गरे, काम सिके । सयाद परिश्रमी भएर होला विदेशमा रहँदा पनि उनलाई कम्पनीबाट मान सम्मान पाएको थियो । यस्तै उनीसँग काम गर्ने साथीहरु पनि मिलनसार र सहयोगी थिए । कामको बीचमा उनले समय-समयमा घर आउनका लागि छुट्टी पनि पाउने गरेको थियो । तर संदिपको मनमा अर्कै सपनाले बास बसिसकेको थियो । उनले छुट्टीलाई वास्ता नगरी लगातार काम गरिरहे ।  संदिप कम्पनीमा सुरुमा आठ घण्टा काम गर्थे तर पछि गएर ओभर टाईमको रुपमा पनि उनले कामलाई अगाडि बढाए । यसबाट उनले पैसा बचत गरेर घरमा पठाउन थाले । बिस्तारै -बिस्तारै घरको अवस्था बदलिदै गयो । बुबाले ब्याज सहित ऋण लिएको पैसा पनि र्फिता गरे । यसरी छोराले सात वर्षसम्म पैसा कमाएर घरमा पठाउन थाल्यो । जुन सपना बुनेर उनी आफ्नो पढाई छोडेर विदेशिएका थिए ती सपनाहरु बिस्तारै पुरा हुँदै थिए जसले उनलाई अर्को सपना बुन्न झन् हौस्याई रहेको थियो । फलस्वरूप घरको अवस्था पनि राम्रो हुँदै गयो । संदिपका दुईजना भाइको पढाईमा पनि कमी भएन । बुबाले घरलाई राम्रोसँग चलाएर आफ्नो कमाईको बचत र छोराले कमाएर पठाएको पैसाको बचत गर्न थाले । अन्ततः संदिप सात वर्षपछि वि.सं. २०७८ असोज महिनामा मलेसियाबाट घर र्फके । सात वर्षपछि संदिप आफ्नो गाउँ र्फकेर आउँदा परिवारमा खुःसीको माहोल छायो ।

लामो संघर्ष पछि छोरा घर सकुशल फर्केर आउँदा आमा, बुबा सहित पुरै परिवार खुशी थिए । मिहिनेत गर्न बाणी परिसकेका संदिप घरमा केही दिन आराम गरिसकेपछि आरामले बस्न सकेनन् । अनि उनले आफ्नो बुबासंग नयाँ व्यवसाय खोल्नका लागि प्रस्ताव गरे । उनी भन्छन् ‘सुरुमा मलाई बुबाले आफ्नै गाउँठाउँमा व्यवसाय सुरु गर्ने कुरा मन पराउँछ कि पराउँदिनन् भन्ने ठूलो चिन्ता थियो । किनकि हाम्रोमा प्राय: परिवारले विदेशबाट फर्केकालाई फेरि विदेशनै जान प्रोत्साहन गर्ने गर्छन् नि तर मेरो प्रस्ताव सुनेर बुबा खुःसी हुनुभयो । त्यसपछि घरसल्लाह सुरु भयो । लामो छलपछि आफ्नै टोल प्रसौनीमा बेकरी उधोग खोल्ने निर्णय गरियो ।‘

उधोग खोल्ने प्रक्रियामा लागिसकेपछि संदिप त्यसको कागजी र कानुनी प्रक्रिया बुझ्नमा लागे । उनी विदेशबाट घर फर्केर आईसकेपछि देशमा राजनीतिक परिर्वतनले तीन तहको सरकार गठन भईसकेको थियो । उनी बेकरी उधोग संचालन गर्नका लागि बैंकमा ऋण लिन पुगे तर कारोनाका कारण देशको स्थिति राम्रो छैन भनेर कुनै पनि बैंकहरु लगानी गर्न मानेन । यसबाट संदिप अलि दुःखीत र निराश भए तर हरेश भने खाएनन् । मनमा आशा थियो सबै कुरा राम्रो हुन्छ भन्ने । ‘उधोग संचालनको लागि बैंक, स्थानीय सरकार, विभिन्न सरकारी निकाय लगायतमा गएँ तर कहिँकतैबाट आफ्नै गाउँठाउँमा व्यवसाय गर्छु, आफ्नो सिप यहिँ लगाउछु भन्दा ऋण पाँइन । यत्रो वर्षसम्म सरकारलाई रेमिटयान्स हामीले तिर्यौं तर यही सरकारले बिदेशबाट र्फकेर आउने म जस्तो यूवाहरुलाई आफ्नै देशमा आफूले सिकेको सिपबाट केही गर्छौं भन्ने योजनालाई साथ र सहयोग नगरिदिँदा सार्है  दुःखी भएँ’ उनले भने । उनले धेरै प्रयास गरे तर कहिँकतैबाट पनि ऋण नपाउँदा अब आफ्नो सपना पूरा हुँदैन जस्तो लाग्यो तर बुबाको साथ र सहयोगले उनले एउटा आशाको किरण देखे । ‘बुबाले मलाई तिमी पैसाको चिन्ता नगर म तिम्रो लागि पैसाको व्यवस्था गरिदिन्छु भनेपछि अब जसरी भएपनि आफ्नो उद्योग संचालन गर्ने र्निणयमा आफू पुगेको’ संदिपले भने । उनले विदेशबाट कमाएर पठाएको पैसाको बचत र उनका बुबाले बचत गरेर राखेको पैसा दुवै मिलाएर उनको बुबाले उद्योग संचालन गर्नका लागी संदिपलाई शुरुमा २० लाख रुपैयाँ दिए । ‘पुगेन भने पछि अझ पैसाको व्यवस्था गर्दै जाउँला, तिमी आफ्नो काम अगाडि बढाउ’ भन्ने बुबाको प्रेरणादायी वाक्यले उनको सपना साकार बनाउन ठूलो उर्जाको काम गर्यो । त्यसपछि उनी उद्योग संचालको प्रक्रियामा लागे ।

तर पैसा हातमा भएर पनि संदिपको उद्योग संचालनमा आउन एक वर्ष लाग्यो । उनले भने ‘ उद्योग दर्ता गर्नका लागि वडा कार्यालयमा महिनौ दौडधुप गर्नुपर्यो’ त्यसपछि घरेलु तथा सानो उद्योगमा पनि लामो प्रयास गर्नुपर्यो । कहिले कर्मचारी नै कार्यालयमा नहुने, कहिले कागजपत्र नै ठिक नहुने । अन्ततः यी सब प्रक्रिया पुर्याउदा पुर्याउदै एक वर्ष लाग्यो । एक वर्षपछि वि.स. २०७९ साल माघ महिनामा फेरि दश लाख रुपैयाँ थपेर तीस लाखको लागतमा साह बेकरी उद्योग संचालनमा आयो । कारखाना संचालनमा आईसकेपछि त्यसमा बेकरी सम्बन्धि हरेक आईटमहरु उत्पादन हुन थाल्यो र अहिले पनि नियमित रुपमा उत्पादन गर्ने काम भईरहेको छ । त्यती मात्र होइन अहिले प्रसौनी टोलमा यो उद्योगले ठूलो चर्चा पाएको छ ।

संदिपका बुबा गजेन्द्र साह तेलीले खुशी हुँदै भने ‘छोराले आफूले नसोचेको काम आज पुरा गरिदिएको छ । मेरा लागि जिन्दगीमा सब भन्दा खुशीको क्षण यही हो ।‘

संदिपले संचालन गरेको साह बेकरी उद्योगमा अहिले १२ जना कामदारहरु काम गरिहेका छन् । ५ जना कारखानाको प्रोडक्सन र बाँकी ७ जना उत्पादन भएको सामग्री बजारमा बिक्री गर्नको लागि सेल्स म्यानहरु छन् । यसरी उनको उद्योगमा १२ जनाले काम पाएका छन् । ‘कुनै दिन आफ्नो छोरा विदेशमा गएर अरुको कम्पनीमा काम गर्दथ्यो र आज छोराको कारखानामा १२ जनाले काम गरिरहेका छन् , साँच्चीकै यो मेरो परिवारको लागि सोँच्न नसक्ने ठूलो उपलब्धि हो’ बुबा गजेन्द्र भन्छन् । कारखाना संचालन गरेको ७ महिना भन्दा बढि भईसकेको छ । संदिपले दिएको जानकारी अनुसार उनको कारखानामा मासिक रुपमा १० देखि १२ लाख रुपैयाँ खर्च हुने गरेको छ र सबै खर्च निकालेर मासिक रुपमा संदिपले आफ्नो कारखानाबाट दुई लाख रुपैयाँ आम्दानी गरिहेका छन् ।

अहिले कारखानाको अफ सिजन चलिरहेको हुनाले उत्पादन अलि कम भएको तर जाडोको सिजन आईसकेपछि उत्पादन बढाउने र बजारमा बिक्री बढेपछि आम्दानी पनि अझ बढेर जाने संदिप भन्छन् । अफिसमा काम गर्ने २ जना मिस्त्रीहरु बाहिरबाट आएका कारण उनीहरुको लागि खाने, बस्ने व्यवस्था समेत सन्दीपले मिलाईदिएका छन् । ‘हामी २ जना सुरुदेखि नै यो कारखानामा काम गर्दै आएका छौं, ७ महिना बितिसक्यो समयमै पारिश्रमिक र खानबस्ने राम्रो व्यवस्था छ’ कारखानामा काम गर्ने मिस्त्री मनोज कुमार र राकेश साह भन्छन् । बाँकी कामदारहरु भने स्थानीय नै छन् । कारखानामा काम गर्ने मिस्त्रीहरुलाई १५ देखी २५ हजारसम्म पारिश्रमीक दिन्छन् संदिप । उनको कारखानामा उत्पादन गरेको सामग्रीहरु प्रसौनी बजार, कलैया, फेटा, गण्डक, बिरगंज, परवानीपुर, स्थानीय होटल, खुद्रा पसल लगायतका ठाउँहरुमा बिक्रीका लागि जाने गरेको र हरेक ठाउँबाट राम्रो प्रतिक्रिया आउने गरेको छ । जाडो महिनामा उत्पादन बढिसकेपछि अरु जील्लामा पनि सामग्री पठाउने तयारी रहेको र त्यसका लागि गाडीको व्यवस्थापन गर्ने संदिपको योजना छ । यसरी गाउँमै बेकरी उद्योग संचालनमा आईसकेपछि स्थानीयहरुले ताजा खानेकुरा पाउनुका साथै रोजगारी पनि पाएका छन् । उनको व्यवसायले धेरैको गुजारा चलेपनि उनले भने यो व्यवसाय संचालन गर्नका लागि निकै संघर्ष गर्नुपर्यो । उनी भन्छन् ‘बाहिरबाट सिप सिकेर आएका म जस्ता हजारौँ यूवाहरु आफ्नै देशमा केही गरौँ भन्ने सोँच लिएर घर फर्कन्छन् तर देशको राजनीतिक अवस्था र सरकारको लाचारीपनको कारण हजारौँ यूवाहरु सिप भएर पनि केही गर्न सकेका छैनन् । यो ठूलो दु:खको कुरा हो ।‘

तसर्थ सरकारले विदेशबाट सीप सिकेर आफ्नै देशमा केही व्यवसाय गर्न चाहने युवाहरुलाई सहुलियत रुपमा ऋणको व्यवस्था गर्न र काम गर्ने वातावरण मिलाउन संदिपले तिन तहकै सरकारसँग अनुरोध गरे । हुन त सरकारले विदेशबाट सिप सिकेर आएका युवाहरुको लागि व्यवसाय गर्ने बिषयहरु बजेटमै व्यवस्था मिलाएको हुन्छ । तर यो बजेटमै सिमित भएका कारण धेरै युवाहरु फेरि विदेश फर्किने क्रम बढिरहेकै छ । त्यसैले, सरकारले घोषणा गरेका वाचाहरु समयमा पुरा गर्ने हो भने विदेश जाने ययुवाहरुको संख्यामा पक्कै कमी आउने स्थानीय सुनील साह तेलीको भनाई छ । लामो संघर्षपछि संदिपले आफ्नै गाउँठाउँमा एउटा नयाँ सुरुवात गरेकोले अरु यूवाहरु पनि संदिप जस्तै सानो भए पनि आफ्नै व्यवसाय संचालन गर्ने योजनामा रहेको यूवा प्रदिप साहको भनाई छ । अहिले नेपालमा विदेश जाने युवाहरुको संख्या दिनदिनै बढ्दै गएको छ । सन् २०२२ यता १९ महिनामा विदेश जाने युवाहरुको संख्या १३ लाख भन्दा बढि रहेको तथ्यांकले जनाउछ । तर यहि भिडको बीचमै संदिपको यो सराहनिय कार्यले एक न एक दिन विदेशीने यूवाहरुको सोँच पक्कै बदल्ने विश्वाश राख्छन् यूवा नेता सुभनारायण पटेल । जसरी विभिन्न कारणले दिनहुँ विदेशिने युवाहरुको संख्या बढिरहेको छ, ठिक अर्कोतिर संदिपको आफ्नै ठाउँमा केहि गर्ने हुटहुटिले आफ्नै देशमा पनि विदेश बराबरकै पैसा कमाउन सकिन्छ भन्ने सुन्दर सन्देश दिइरहेको छ ।

वीरगंजमा सरकार विरुद्ध तरुण दलकाे प्रदर्शन

0
वीरगंज । सत्तारुढ दल नेपाली कांग्रेस निकटका तरुण दलले शुक्रबार सरकार विरुद्ध प्रदर्शन गरेकाे छ ।
 
कांग्रेस सहमहामन्त्री महेन्द्र यादवमाथि भएकाे सांघातिक आक्रमणका विरुद्ध कांग्रेसकाे भातृ संगठन नेपाल तरुण दल पर्साका नेता कार्यकर्ताहरुले बिहीबार साँझ घण्टाघर चाेकमा प्रदर्शन गर्दै सरकार र गृहमन्त्री नारायणकाजी श्रेष्ठकाे विराेधमा नाराबाजी गरेका हुन् ।
 
प्रदर्शनमा सहभागी तरुण दलका नेता कार्यकर्ताहरुले नालायक सरकार मुर्दावादा, हत्यारा सरकार मुर्दावाद, गृहमन्त्री राजिनामा दे लगायतका नारा लगाएका थिए । नाराबाजीपछि आयाेजित काेण सभामा बाेल्दै कांग्रेस पर्साका सहसचिव नविन सिंहले कांग्रेस नेता यादमाथि भएकाे सांघातिक आक्रमण गर्नेलाई हदैसम्मको कारबाही गर्न सरकारसंग माग गरे ।
 
उनले लाेकतन्त्र र गणतन्त्रका विराेधी शक्तिहरु कांग्रेसलाई तर्साउने हर्कतमा लागेकाे भएपनि कांग्रेस त्यसबाट कदापि नडराउने बताए । त्यस्ता अराजक र अपराधीक तत्वहरुलाई सरकारले कारबाही नगरे कांग्रेसले देशैभर आन्दाेलन चर्काउने चेतावनीसमेत उनले दिए ।
 
तरुण दल पर्साका अध्यक्ष विकास तिवारीकाे अध्यक्षतामा भएकाे प्रदर्शनमा नेवि संघका केन्द्रीय सदस्य मुनराज तिवारी, नेहा मिश्रा, तरुण दलका नेता कालु सिंह, कांग्रेस क्षेत्रीय सचिव रन्जित कुमार पटेल, युवा नेता शेष हजरा लगायतको सहभागीता रहेकाे थियाे ।
 
यस अघि कांग्रेस निकट कै विद्यार्थी संगठन नेपाल विद्यार्थी (नेवि) संघ पर्साले उपप्रधान तथा गृहमन्त्री नारायणकाजी श्रेष्ठको राजीनामा मागेको छ । बिहीबार पर्साका प्रमुख जिल्ला अधिकारीमार्फत प्रधानमन्त्री पुष्पकमल दाहाललाई ज्ञापन पत्र बुझाउँदै नेविसङ्घ पर्साले गृहमन्त्री श्रेष्ठको राजीनामा मागेको हो ।
 

काठमाडौँमा बुधवार दिनदहाडै काङ्ग्रेसका सहमहामन्त्री महेन्द्र यादवमाथि खुकुरी प्रहार गरी ज्यान लिने प्रयास गरिएकोले देशमा शान्ति सुरक्षा कायम गर्न गृहमन्त्री श्रेष्ठ असफल भएकाले श्रेष्ठले अविलम्ब राजीनामा दिनुपर्ने माग नेविसङ्घको छ ।

नेविसंघ पर्साका सभापति रमेश यादवले पर्साका प्रमुख जिल्ला अधिकारी हीरालाल रेग्मीलाई बुझाएको ज्ञापनत्रमा गृहमन्त्री श्रेष्ठले अपराधी र तस्करलाई संरक्षण गरेको, श्रेष्ठको कार्यकालमा  लोकतन्त्रका लागि लडेका नेताहरूको ज्यानै लिने गरी आक्रमण भइरहेको, मुलुकमा शान्ति–सुरक्षा र अमयन चयन कायम गर्न श्रेष्ठ असफल भएकाले नैतिकताका आधारमा श्रेष्ठले गृहमन्त्रीबाट राजीनामा दिनुपर्ने उल्लेख छ । 

राेट्याक्टकाे आयाेजनामा ट्राफिक सुरक्षा सम्बन्धी अभिमुखीकरण

0

वीरगंज । रोट्याक्ट क्लब ऑफ वीरगंज मेट्रोपोलिसको आयोजनामा बिहिबार ट्राफिक सुरक्षा नियम सम्बन्धी अभिमुखीकरण कार्यक्रम सम्पन्न भएकाे छ ।  

वीरगंजस्थित माउन्ट मकालूमा इंगलिश बाेर्डिङ्ग स्कुलमा भएकाे कार्यक्रममा ट्राफिक नियम सम्बन्धि प्रशिक्षण दिइएकाे क्लबका उपाध्यक्ष एवम् कार्यक्रम संयाेजक दिपु बर्णवालले वताए । 

कक्षा ७, ८ र ९ का विद्यार्थीलाई लक्षित गरेर आयोजित अभिमुखीकरण कार्यक्रममा ट्राफिक सुरक्षा नियम, ट्राफिक नियम पालनाको महत्त्व र युवाहरूमा सुरक्षा नियमहरूको पालना र कार्यान्वयनमा विद्यार्थीहरूको भूमिकालगायतका विषयका बारेमा जानकारी गराइएकाे थियाे ।

कार्यक्रममा जिल्ला ट्राफिक प्रहरी कार्यालय पर्साका प्रमुख भास्कर खतिवडा विद्यार्थीहरूलाई ट्राफिक नियमको पालना गर्न आग्रह गरेका थिए । उनले ट्राफिक नियम पालना नगर्दा दुर्घटना हुन सक्ने भएकाेले ट्राफिक नियमकाे पालना गर्नु पर्नेमा जाेड दिए ।

विद्यार्थीमा ट्राफिक नियम सम्बन्धी जनचेतना जगाउन कार्यक्रम आयोजना गरेकोमा स्कूलले आयोजकलाई धन्यवाद दिएको थियाे ।

कार्यक्रममा रोट्याक्ट क्लब ऑफ वीरगंज मेट्रोपोलिसका अध्यक्ष रेशु अग्रवाल, उपाध्यक्ष दिपु वर्णवाल, राधिका दारुका र स्कूलका संयोजक विजय कुमार बल लगायतको उपस्थिति रहेकाे थियो ।

कांग्रेस सहमहामन्त्री यादवमाथि सांघातिक आक्रमण, दाेषीमाथि कडा कारबाहीकाे माग

0

वीरगंज । नेपाली कांग्रेसका सहमहामन्त्री महेन्द्र यादवमाथि सांघातिक आक्रमण भएको छ । काठमाण्डौको भृकुटीमण्डपमा रहेको रिपोर्टर्स क्लबमा बुधबार आयोजित कार्यक्रममा भाग लिएर बाहिरिने क्रममा यादवमाथि खुकुरी प्रहार भएको हो ।

घाइते यादवको ट्रमा सेन्टरमा उपचार भइरहेको छ । उनीमाथि खुकुरी हानेको आरोपमा नुवाकोटको विदुर नगरपालिका टुप्चे घर भई बालाजुको पैँयुटार बस्ने ४७ वर्षका श्यामबहादुर सापकोटालाई प्रहरीले पक्राउ गरेको काठमाडौं प्रहरी प्रमुख भुपेन्द्र खत्रीले जानकारी दिए ।

कार्यक्रममा सकिएपछि यादवलाई पछ्याउँदै आएर उनले खुकुरी हानेको प्रत्यक्षदर्शीले बताएका छन् । पक्राउ परेका सापकोटले आफूलाई अभियान्ता भन्ने गरेका छन् ।

रिपोटर्स क्लबको कार्यक्रममा यादवले सुन तस्करी, भुटानी शरणार्थी प्रकरण, ललिता निवास प्रकरणमा सरकारले चालेको कदमको विरोधमा धारणा राखेका थिए । 

नेपाली कांग्रेसले पार्टीका सहमहामन्त्री महेन्द्र यादवमाथि भएको आक्रमणको निन्दा गर्दै दोषीमाथि कारवाही गर्न माग गरेको छ ।

कांग्रेस मुख्यसचिव कृष्णप्रसाद पौडेलले एक विज्ञप्ति जारी गर्दै यादवमाथि भएको सांघातिक हमलालाई कांग्रेसले गम्भीरतापूर्वक लिएको र आक्रमण गर्ने व्यक्तिलाई कडाभन्दा कडा कारबाही गर्न सरकारसँग माग गरेको हो ।

‘यो घटनाको नेपाली कांग्रेस घोर निन्दा र भर्त्सना गर्दछ । रिपोटर्स क्लवमा भएको कार्यक्रमबाट बाहिरिने क्रममा भएको आक्रमण पछि उहाँको अहिले काठमाडौंको ट्रमा सेन्टरमा उपचार भैरहेको छ,’ विज्ञप्तिमा भनिएको छ ।
‘उहाँमाथि आक्रमण गर्ने व्यक्ति र पछिल्तिर हुन सक्ने जो कोही व्यक्ति वा समूह उपर गहिरो अनुसन्धान गरेर कडाभन्दा कडा कारबाही गर्न नेपाली कांग्रेस सरकारसँग जोडदार माग गर्दछ,’ विज्ञप्तिमा उल्लेख छ ।

वीरगंजमा धुमधामकाे साथ मनाइयाे कृष्ण जन्माष्टमी

0

वीरगंज । वैदिक सनातन धर्मावलम्बीले ‘श्रीकृष्ण जन्माष्टमी’ पर्व बुधबार देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक मनाएका छन् ।

श्रीकृष्ण जन्माष्टमी पर्बको अवसरमा वीरगंज १० स्थित गीता मन्दिरमापनि बुधबार बिहानैदेखि भक्तजनहरुको घुंइचो लागेको थियाे । मन्दिरमा पूजापाठ र दर्शन गर्न भक्तजनहरु बिहानैदेखि मन्दिरमा पुगेका थिए । मन्दिर परिसर बाहिर मेलापनि लागेको थियाे ।

यसैगरी राष्ट्र सेविका नेपालले श्री कृष्ण जन्माष्टमी उत्सव कार्यक्रम आयाेजना गरेकाे थियाे । जन्माष्टमीकाे अवसरमा वीरगंजकाे माइस्थानमा आयाेजित कार्यक्रममा बालबालिकाहरु श्रीकृष्ण र राधाकाे पहिरनमा सहभागि भएकाे थियाे ।

यसैगरी पर्सा जिल्लाका अन्य स्थानमा रहेका सम्पूर्ण कृष्ण मन्दिरहरूमा पनि भक्तजनको भीड लागेकाे थियाे । देशका विभिन्न स्थानमा रहेका ठूला, साना श्रीकृष्ण मन्दिरमा पनि भक्तजनको भीड लाग्ने गर्छ ।

धेरै जसाे ठाउँमा कृष्ण अष्टमीदेखि ६ दिन सम्म भजन कृतनकाे साथै सांस्कृतिक कार्यक्रम समेत हुने गरेकाे छ । कृष्णा जन्माष्टमीकाे अवसरमा विभिन्न विद्यालयहरुले पनि सांस्कृतिक कार्यक्रम आयाेजना गरेका थिए ।

ज्ञान योग, कर्मयोग र भक्ति योगका प्रणेता भगवान् श्रीकृष्णको जन्म द्वापर युगमा भाद्रकृष्ण अष्टमीको मध्यरातमा भएकाले अष्टमीकाे दिनलाई ‘श्रीकृष्ण जन्माष्टमी’ र रातलाई ‘मोह रात्रि’ भनिन्छ । यस दिन देशभरिका कृष्ण मन्दिरमा भगवान् श्रीकृष्णको पूजा–आराधना, प्रवचन, भजन कीर्तन गर्नाका साथै विशेष गरी महिला, पुरुष ‘व्रत’ बसी रातभर जाग्राम बस्ने प्रचलन छ ।

अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान् विष्णुको आठौँ अवतारका रूपमा जन्मिएका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए । कुरुक्षेत्रमा कौरवसँगको लडाइँमा संलग्न पाण्डवमध्येका अर्जुनलाई उपदेश दिने क्रममा स्वयम् श्रीकृष्णका मुखर विन्दुबाट व्यक्त ‘श्रीमद् भागवत गीता’ पवित्र ग्रन्थ मानिन्छ । छोटकरीमा गीता नामले समेत चिनिने यो ग्रन्थ विश्वमै सबैभन्दा बढी भाषामा अनुवाद भएको विश्वास गरिन्छ ।

बाल्यकालदेखि नै आफ्ना विचित्र लीला देखाएका श्रीकृष्णले पूतना, कंस, जरासन्ध र शिशुपालजस्ता दानवी प्रवृत्तिको संहार गरेको पौराणिक ग्रन्थमा उल्लेख छ ।  

कृष्ण जन्माष्टमी पर्वकाे अवसरमा सरकारले बुधबार देशभर सार्वजनिक बिदा समेत दिएको थियाे ।

मधेश विश्वविद्यालयले प्रथम वार्षिकोत्सव मनाउने

0

वीरगंज । मधेश विश्वविद्यालयले विविध कार्यक्रम गरेर वार्षिकोत्सव मनाउने भएको छ । यही भदौ २२ गते मधेश विश्वविद्यालयले वार्षिकोत्सवकै अवसरमा विभिन्न कार्यक्रमको आयोजना गरेको छ । 

मधेश प्रदेशका मुख्यमन्त्री एवम् मधेश विश्वविद्यालयका कुलपति सरोज कुमार यादवको प्रमुख आथित्यतामा प्रथम वार्षिकोत्सव समारोह हुने विश्वविद्यालयका उपकुलपति प्राध्यापक डा. दीपक शाक्यले जानकारी दिए । 

उनका अनुसार भदौ २२ गते शुक्रवार बिहान साढे ७ बजेदेखि साढे ८ बजेसम्म बहदुरमाई नगरपालिका वडा नम्बर २ स्थित विश्वविद्यालयको जग्गामा वृक्षरोपण गरिनेछ । त्यस्तै साढे ८ बजेदेखि सवा ९ बजेसम्म बिहान बहुदरमाईमै खाजा खुवाएर साढे ९ बजेदेखि साढे १२ बजेसम्म बृहत स्वास्थ्य शिविरको आयोजना गरिएको शाक्यले जानकारी दिए । 

बहुदरमाई मन्दिर परिसरमा निशुल्क स्वास्थ्य शिविरको आयोजना गरी बिशिष्ट स्वास्थ्य चिकित्सकहरुको उपस्थितीमा स्थानीयको चेकजाँच गरिनेछ । साढे १२ बजेदेखि पौने २ बजेसम्म मधेश विश्वविद्यालय परिसरमा दीवा खाना खुवाएर २ बजेदेखि वार्षिकोत्सव समारोह सुरु हुने विश्वविद्यालयका रजिष्टार विजय यादवले जानकारी दिए ।

बारामा नेवि संघको समानान्तर कमिटी गठन

0

वीरगंज । बारामा नेपाल विद्यार्थी (नेवि) संघको समानान्तर कमिटी गठन भएकाे छ । नेपाली कांग्रेस निकट नेवि संघकाे स‌ंस्थापन इतर पक्षले बारामा समानान्तर कमिटी गठन गरेको हाे ।

जिल्लाको सदरमुकाम कलैयास्थित बृहत् विधार्थी भेलाबाट समानान्तर जिल्ला अध्यक्षमा  प्रविण सिंह राउतलाई चयन गरिएको छ ।

साे भेलामा नेविसंघ केन्द्रीय सदस्य भुवन भट्ट, मधेश प्रदेशबाट प्रतिनिधित्व गर्ने नेविसंघका केन्द्रीय सदस्यहरू हरिओम शाह, कमलेश पटेल, राजकिशोर शाह, विकेस पटेल, पुष्पेन्द्र गोइत, मुनराज तिवारी लगायतको उपस्थितिमा रहेकाे थियाे ।

मंगलबार मात्रै नेविसंघका अध्यक्ष दोजाङ शेर्पाले बारा जिल्लामा समीर चौधरिको नाममा पत्र काटेर अध्यक्षको जिम्मेवारी दिएका थिए । नेपाली कांग्रेस जिल्ला सभापतिले गरेको सिफारिस विपरीत अध्यक्ष शेर्पाले मापदण्ड र संगठनको विधिविधानलाई कुल्चेर पत्र काटेको आरोप लगाउदै इतर समूहका विधार्थी नेताहरूले विरोध जनाएका थिए ।

शेर्पाले पठाएको पत्र बाहिरिएपछि इतर केन्द्रीय सदस्यहरूले सामानान्तर समिति गठन गर्न निर्देशनसहितका धारणा राखेका थिए ।

विभिन्न पार्टी परित्याग एक सय जनाले गरे जनमत पार्टीमा प्रबेश

0

दिपु बर्णवाल /
वीरगंज । धनुषामा विभिन्न पार्टी परित्याग गर्दै सयौंको संख्यामा नेताकार्यकर्ताहरु जनमत पार्टीमा प्रवेश गरेका छन् । मंगलबार जनमत पार्टी धनुषाले महेन्द्रनगरमा आयोजना गरेको वृहत् पार्टी प्रवेश कार्यक्रममा विभिन्न पार्टीका पाँच सय भन्दा बढि नेताकार्यकर्ताहरुले जनमतमा प्रवेश गरेका हुन ।

पार्टी प्रवेश गर्नेमा नेपाल समाजवादी पार्टी (नेसपा) का धनुषा जिल्ला अध्यक्ष पवन मण्डलको नेतृत्वमा नेसपाका जिल्ला कार्यसमिति ,केन्द्रिय सदस्य, प्रदेश सदस्यसहित एक सय भन्दा बढी जनमत पार्टीमा प्रवेश गरेका छन् ।

त्यसैगरी लोकतान्त्रिक समाजवादी पार्टी(लोसपा)का धनुषा क्षेत्र नं. ४ का क्षेत्रीय अध्यक्ष जितनारायण साहको नेतृत्वमा लोसपाका क्षिरेश्वरनाथ नगरपालिकाको कार्यसमितिका सदस्यहरु, बटेश्वर गाउँपालिकाको कार्यसमितिका पदाधिकारीहरु, मिथिला नगरपालिका कार्यसमितका पदाधिकारीहरुसहित एक सय ५० जना भन्दा बढी लोसपा परित्याग गरि जनमत प्रवेश गरेका हुन ।

त्यस्तै, राष्ट्रिय प्रजातान्त्रिक पार्टी (राप्रपा)का नेता दिपनारायण यादवको नेतृत्वमा राप्रपाका धनुषा क्षेत्र नं.४ का एक सय भन्दा बढी नेता कार्यकर्ताहरुले जनमत पार्टी प्रवेश गरेको हो ।

त्यसैगरि, नेकपा एमाले,नेपाली कांग्रेस ,जनता समाजवादी पार्टी नेपाल( जसपा) ,माओवादी केन्द्रियका नेताकार्यकर्ताहरुसहित पाँच सय भन्दा बढी नेताकार्यकर्ताहरु जनमत पार्टीमा प्रवेश गरेको जनमत पार्टी धनुषा इन्चार्ज सुरेन्द्र मण्डलले बताए ।

नवप्रवेश नेताकार्यकर्ताहरुलाई कार्यक्रमको प्रमुख अतिथि जनमत पार्टीका राष्ट्रिय अध्यक्ष डा.सीके राउत र विशिष्ट अतिथी जनमत पार्टीका महासचिव तथा मधेश सरकारका श्रम तथा यातायात मन्त्री चन्दन कुमार सिंहले फुलमला र अविरको टीका लगाएर पार्टीमा स्वागत गरेको हो।

साथै, पार्टी प्रवेश गरेका नेताकार्यकर्ताहरुलाई अध्यक्ष डा.राउतले पार्टीको सदस्यता समेत प्रदान गरिएको छ ।

सो कार्यक्रममा जनमत पार्टीका राष्ट्रिय सचिव तथा पुर्व कृषि राज्यमन्त्री प्रदेश सांसद संजय यादव,राष्ट्रिय सचीव बीपी साह, केन्द्रिय कार्यकारिणी सदस्य रेखा मण्डल ,अंजली मण्डल ,प्रदेश सांसद अनिता कुमारी साहसहित पार्टीका केन्द्रिय सदस्य, राजनीतिक समिती सदस्य, प्रदेश सदस्यसहित जिल्लाका नेताकार्यकर्ताहरुको उपस्थितमा वृहत् पार्टी प्रवेश कार्यक्रम सम्पन्न भएको हो ।

जिल्ला इन्चार्ज सुरेन्द्र मण्डलको अध्यक्षतामा भएको कार्यक्रमको संचालन जनमत पार्टीका नेता इन्दजित यादवले गरेका थियो ।

रेडक्रस दिवसमा वीरगंजमा नि:शुल्क स्वास्थ्य परिक्षण शिविर

0

वीरगंज । नेपाल रेडक्रसकाे ६१ औं दिवसकाे अवसरमा मंगलबार वीरगंजमा निशुल्क स्वास्थ्य परिक्षण शिविर सम्पन्न भएकाे छ । दिवसकाे अवसरमा रेडक्रस माइस्थान उपशाखाकाे आयाेजना वीरगंजकाे घडिअर्वास्थि गिता मन्दिर परिसरमा भएकाे स्वास्थ्य परिक्षण र मधुमेह रोग परिक्षण शिविर सम्पन्न भएकाे रेडक्रस पर्साका राजन श्रीवास्तवले जानकारी दिए ।

नेपाल रेडक्रस सोसाइटी माइस्थान उपशाखाका सभापति मदन प्रसाद गुप्ताको सभापतित्वमा भएको शबिरकाे रेडक्रस मधेस प्रदेसका अध्यक्ष फुलमहम्मद मियाँ र रेडक्रस पर्सा शाखाका सभापति बिरेन्द्र राज कंडेलले संयुक्त रुपमा उदघाटन गरेका थिए ।

शिविरमा सहभागिहरु स्वास्थ्य परिक्षण बरिष्ट चिकित्सक डा. प्रमोद सरार्फ, डा. निरज सिंह, डा. दिप्ती यादव र डा. सागर सरार्फले गरेका थिए । 

शिविरमा रेडक्रसका शैलेन्द्र कुमार चौरासीया, साबिर अहम्मद एराज, दिनानाथ रौनियार, दयाशन्कर सिह, काशी प्रसाद साह, संतोष गुप्ता, उमेस गुप्ता, संतोषज ज्यासवाल, ओमप्रकाश जैसवाल, मधुसूदन उपाध्याय, उतमा प्याकुरेल, बिरशम्सेर प्रसाद कुर्मी, बिक्की सरार्फ, ओम गुप्ता, प्रमोद गुप्ता, सिवजी साह लगायतको उपस्थिति रहेको थियो भने कार्यक्रमकाे संचालन राजन श्रीवास्तवले गर्नु भएको थियो ।

यसैगरी ६१ औ नेपाल रेडक्रस दिवसको अवसर मै दिप प्रज्वलन कार्यक्रम सम्पन्न भएकाे छ । रेडक्रस माइस्थान उपशाखा कै आयाेजनामा मंगलबार सांझ वीरगंजकाे माइस्थानस्थित गिता मन्दिर परिसरमा दीप प्रज्वलन गरिएकाे हाे ।

पानीटंकीका दुई कलेजमा पनि शिलबन्दी, एक माविमा ७ विद्यार्थी मात्र भेटिए

0

वीरगंज । वीरगंजकाे पानीटंकीमा अनाधिकृत रुपमा संचालनमा रहेका शैक्षिक संस्थाहरुमा पनि महानगरपालिकाले शिलबन्दी गरेकाे छ । वीरगंज महानगरपालिकाकाे वडा नं. ८ स्थित पानीटंकीकाे गल्लीमा मापदण्ड विपरित संचालनमा रहेकाे दुई शैक्षिक संस्थामा महानगरपालिकाले शिलबन्दी गरेकाे हाे । 

याे गल्लीमा विना भाैतिक संरचनाकाे मापदण्ड विपरित चार वटा प्लस टुहरु संचालनमा थियाे । जस मध्ये महानगरपालिकाले मंगलबार युनिभर्सल प्लस टु कलेज र प्रिन्सटन मोडेल एकेडेमीमा सिलबन्दी गरेको हो ।

महानगरअन्तर्गतको नियमन समितिका संयोजक ईश्वरचन्द्र यादव नेतृत्वको टोलीले दुबै कलेजमा शिलबन्दी गरेकाे महानगरका मेयर राजेशमान सिंहका जनसम्पर्क सल्लाहकार नवराज फुयाँलले जानकारी दिए ।

त्यसैगरी त्यही गलीमा संचालनमा रहेकाे डिसमल प्लस टुले सबै नियम पक्रियाहरु पुरा गरेकाे अनुगमन समितिले जनाएकाे छ । याे प्यलस टु डिसमल कलेजकाे नामले परिचित रहेकाे छ । 

एउटै गलीमा चार वटा प्लस टुहरु संचालमा रहेपनि मापदण्ड अनुसार कसैकाे भाैतिक संरचनाहरु प्रयाप्त रहेकाे छैन । सबैले माध्यमिक तहकाे अनुमति लिएर कक्षा ११ र १२ संचालन गरेपनि कलेजकाे नामले प्रचार गर्दै आएका छन् । जुन नियम विपरित छ ।

कक्षा १२ सम्म माध्यमिक तह अन्तर्गत नै परेपनि सबैले माध्यमिक विद्यालय अथवा प्लस टु नभनेर विद्यार्थी आकर्षण गर्न कलेज भन्दै र प्रचार गर्दै आएका छन् । यी शैक्षिक संस्थाहरुकाे कक्षा १ देखि १० सम्म अरु ठाउँमा संचालनमा रहेका छन् भने पानीटंकीमा कक्षा ११ र १२ मात्र संचालनमा रहेकाे छ । जुन पनि नियम विपरित छ । 

अनुमति नलिई र मापदण्ड विपरीत सञ्चालित शैक्षिक संस्थालाई सिल गर्ने अभियान नै महानगरले चलाएकाे नियम समितिका संयाेजक यादवले वताए ।  

वीरगंज – १५ मा रहेको युनिभर्सल सेकेण्डरी स्कूलले कक्षा ११ र १२ सञ्चालन गर्न लिएको अनुमतिलाई दुरुपयोग गर्दै नियम विपरीत वीरगंज ८ पानीटंकीमा युनिभर्सल प्लस टु कलेज चलाएको पाएपछि अनुगमन गर्न पुगेको टोलीले सिलबन्दी गरेको नियमन समितिका संयोजक ईश्वरचन्द्र यादवले बताए ।

यादवका अनुसार कक्षा ११ र १२ सञ्चालन गर्न अनुमति लिएको शैक्षिक संस्थाले नाम परिवर्तन गरेर कलेज लेख्न पाइँदैन । यद्यपि युनिभर्सलले सो विपरीत कलेज लेखेको पाएपछि सिल गरिएको उनको भनाई छ ।

अनुगमन समितिले वीरगंज- ८ पानीटंकी स्थित नै रहेको प्रिन्सटन मोडेल एकेडेमीलाई पनि सिल गरेको उनले वताए । प्रिन्सटनले कक्षा ११ र १२ सञ्चालनका लागि अनुमति नै नलिएर पठनपाठन गराइरहेको पाएपछि सिल गरिएको संयाेजक यादवले जानकारी दिए ।

वीरगंज सेन्ट्रल स्कूलको नाममा कक्षा सञ्चालन गर्न अनुमति लिने प्रक्रिया मै रहेको समयमा छुट्टै नाम राखेर विद्यार्थी भर्ना गरेर कक्षा सञ्चालन समेत गरिरहेको भेटिएको उनले बताए ।

अनुगमन टोलीले वीरगंज सेन्ट्रल स्कूल पनि मापदण्ड अनुसार सञ्चालनमा नरहेको भेटेको थियो । स्कुलका प्रिन्सपल इन्जिनियर बिनाेद प्रसाद यादवले यहाँ कुनै पनि कलेज संचालनमा नरहेकाे मात्र वीरगंज सेन्ट्रल स्कुल संचालनमा रहेकाे वताएपनि स्कुल पनि मापदण्ड अनुसार संचालनमा नरहेकाे भेटिएकाे थियाे ।

प्रिन्सपल यादवले कक्षा १० सम्म अनुमति लिएर संचालन गरेकाे र प्लस टु संचालनकाे लागि अनुमति लिने परक्रियामा रहेकाे वताए पनि स्कूलमा एउटा कक्षा कोठा भित्र जम्मा सात जना विद्यार्थी अध्ययन गरिरहेको मात्र भेटिएका थिए ।

अनुगमन समिति पानीटंकीमा आएकाे कलेजका संचालकहरु थाहा पाएपछि स्कुल भित्र लगाइएकाे बाेर्डमा प्रिन्सटन माेडल एकेडमी लेखिएकाे नाम छाेपेका थिए । बाहिर रहेकाे प्रिन्सटन कलेजकाे बाेर्ड बारे आफुलाई थाहा नभएकाे स्कुलका प्रिन्सपल यादवले वताएका थिए । 

अनुगमन समिति गइसकेपछि स्कुल बाहिर रहेकाे प्रिन्सटन कलेजकाे बाेर्ड हटाइएकाे थियाे ।  

यसअघि महानगरले सोमबार वीरगंज – १६ स्थित श्री माईस्थान बाल विद्या मन्दिर इन्दु लाखे आधारभूत विद्यालय गहवामा सञ्चालनमा रहेको अन्नपूर्ण कलेज, वीरगंज – ११ स्थित युनिभर्सल एकेडेमी कलेजमा सिलबन्दी गरेको थियो ।

त्यसै गरी महानगरले गत बुधवार वीरगंज – ११ स्थित इम्पेरियल कलेज र वीरगंज – १३ स्थित वीरगंज स्कूल अफ लमा पनि सिलबन्दी गरेको थियो ।