वीरगंज । गुडविल सोसाइटीले वीरगञ्जस्थित नारायणी अस्पतालमा २०० प्याकेट खाना वितरण गरेको छ। संस्थाका अध्यक्ष अरबाज आलमको नेतृत्वमा बिरामी र बिरामीका कुरुवाहरूलाई खाना वितरण गरिएको हो।
खाना वितरण कार्यक्रमको क्रममा अस्पताल व्यवस्थापन समितिले पनि सहयोग प्रदान गरेको गुडविल सोसाइटीले जनाएको छ। संस्थाले सामाजिक उत्तरदायित्व अन्तर्गत नियमित रुपमा यस्ता कार्यक्रमहरू गर्दै आएको बताएको छ।
काठमाडौँ । नेकपा (एकीकृत समाजवादीका) अध्यक्ष माधवकुमार नेपालले जेनजी प्रदर्शनका क्रममा ज्यान गुमाउने सम्पूर्णप्रति श्रद्धाञ्जलि अर्पण गरेका छन्।
अध्यक्ष नेपालले आज शोक वक्तव्य जारी गरी शोक सन्तप्त परिवारजनमा गहिरो समवेदना प्रकट गरेका छन्। उनले सो प्रदर्शनका क्रममा घाइते हुने सबैको शीघ्र स्वास्थ्यलाभको कामनासमेत गरे ।
‘जेनजी’ अन्दोलनका मागप्रति आफ्नो पार्टीले त्यस बेला नै समर्थन तथा ऐक्यबद्धता प्रकट गरेको स्मरण गराउँदै उनले जायज मागलाई सम्बोधन गर्नुको साटो तत्कालीन सरकारको दम्भ र अहङ्कारले धेरै जनधनको क्षति हुन गएको उल्लेख गरे।
वक्तव्यमा भनिएको छ, “जनताको चाहना र भावना अनुरुप पारदर्शी तथा जनउत्तरदायी शासन प्रणाली कायम गर्न नसक्दा जनतामा उत्पन्न निराशा र आक्रोशको परिणामका रुपमा त्यस घटनालाई स्वीकार गर्नुपर्छ।
नेता र जनताको जीवनशैली बीचको अन्तर, भ्रष्टाचार, कुशासन, बरोजगारी, युवा पलायन तथा आर्थिक सामाजिक रुपान्तरणको मार्गमा हिँड्न नचाहने/नखोज्ने कार्यशैलीका कारण यो अवस्था उत्पन्न भएको कुरालाई समेत मनन गर्नुपर्दछ।”
अध्यक्ष नेपालले सम्पूर्ण राजनीतिक दल, नागरिक समाज, राज्य तथा निजी क्षेत्रलगायत समाजका विभिन्न पक्षसँग हातेमालो एवम् सहकार्य गर्न आफूहरु सदैव तत्पर रहेको स्पष्ट पारे।
काठमाडौँ । जनमत पार्टीभित्र नेतृत्व परिवर्तनको मागसहित पार्टीका शीर्ष पदाधिकारीहरूले अध्यक्ष डा. सिके राउत (चन्द्रकान्त राउत) र संगठन विभाग प्रमुख डा. जयकान्त राउतलाई २४ घण्टाभित्र पदबाट राजीनामा दिन आग्रह गरेका छन्।
जनमत पार्टीका वरिष्ठ उपाध्यक्ष अब्दुल खान, केन्द्रीय प्रवक्ता डा. शरद सिंह यादव, जनमत युवा संघका केन्द्रीय संयोजक संजय कुमार यादव, स्वास्थ्यकर्मी जनमत संघका केन्द्रीय संयोजक सि.के. सिंह, सुदूरपश्चिम प्रदेशका वरिष्ठ इन्चार्ज राजाराम चौधरी र राष्ट्रिय परिषद सदस्य विक्रम बहादुर बमले संयुक्तरूपमा हस्ताक्षर गरी उक्त माग राखेका हुन्।
पार्टी पदाधिकारीहरूले देशमा व्याप्त भ्रष्टाचार, नातावाद, कृपावाद र कुशासनको विरोधमा २०८२ भदौ २३ र २४ गते भएको “जेन–जी आन्दोलन” ले नेपालको राजनीतिक परिदृश्यमा ऐतिहासिक मोड दिएको भन्दै जनमत पार्टीले पनि आत्मसमीक्षा र नेतृत्व परिवर्तनको बाटो लिनुपर्ने आवश्यकता औंल्याएका छन्।
उनहरूले पछिल्लो समय पार्टीको शीर्ष नेतृत्वमा देखिएको कमजोर कार्यशैली, पारदर्शिताको अभाव र जनभावनासँग विमुख गतिविधिहरूले पार्टीको मूल उद्देश्य कमजोर बनाएको भन्दै जनआस्थाको पुनःस्थापनाका लागि नेतृत्व परिवर्तन अपरिहार्य भएको दाबी गरेका छन्।
साथै, नेतृत्व परिवर्तनमार्फत पार्टीलाई थप सशक्त, लोकतान्त्रिक र जवाफदेही संस्थामा रूपान्तरण गर्ने प्रतिबद्धता व्यक्त गर्दै पार्टी निर्माणदेखि अहिलेसम्म योगदान पु¥याएका सम्पूर्ण नेता तथा कार्यकर्तालाई पुनर्गठनमा सक्रिय हुन पनि आग्रह गरिएको छ।
धनुषा । ईलाका प्रहरी कार्यालय ढल्केवरले ठूलो परिमाणको लागुऔषध गाँजा सहित दुई जनालाई नियन्त्रणमा लिएको छ। प्रहरीले गाँजा ओसारपसारमा प्रयोग भएको तरकारी बोक्ने पिकअप गाडी समेत बरामद गरेको हो।
ईलाका प्रहरी कार्यालय ढलकेबरका प्रहरी निरीक्षक जाटाशंकर यादवको नेतृत्वमा खटिएको टोलीले बुधबार बिहान धनुषा जिल्लाको गणेशमान चारनाथ नगरपालिका–४ बिरेन्द्रबजारमा उक्त गाडी फेला पारी चालक र सहचालकलाई नियन्त्रणमा लिएको हो।
प्रारम्भिक अनुसन्धान अनुसार धरानबाट पिकअप गाडीमा गाँजा लोड गरी माथिबाट बन्दाकोबी राखेर ढाकिएको थियो। उक्त गाँजा धनुषा बिदेह नगरपालिका–३ जोगियारास्थित भगवति फिक्स ईट्टा भट्टामा अनलोड गर्ने तयारीमा रहेको प्रहरीले जनाएको छ।
प्रहरीले सोही दिन दिउँसो ४:०० बजे उक्त स्थानमा चेकजाँच गर्दा तयारी ईट्टाको चाङबीच त्रिपालले छोपेर राखिएको १९ पोका करिब ४७५ किलो बरामद गरेको हो।
पक्राउ परेका चालक धादिङ बेनिघाट रोलाङ गाउँपालिका–१ का २४ वर्षीय बिराज गुम्बा र सहचालक बाँके कोहलपुर पार्वतीपुरका १८ वर्षीय रोहित चमार रहेका छन्। ना.३–०१–०२४ च ८३२५ नम्बरको पिकअप गाडीसमेत नियन्त्रणमा लिएर थप अनुसन्धान भइरहेको प्रहरीले जनाएको छ।
काठमाडौँ । जेन–जी प्रदर्शनका क्रममा मृत्यु भएका छ जनाको शव नेपाली सेनाको हवाई साधनमार्फत उनीहरूको सम्बन्धित जिल्लामा पुर्याइएको छ ।
सैनिक जनसम्पर्क तथा सूचना निर्देशनालयका अनुसार भदौ २३ र २४ गतेको प्रदर्शनमा मृत्यु भएका उनीहरूको शव परिवारका सदस्यसहित सुनसरी, उदयपुर, सिराहा, धनकुटा र संखुवासभा जिल्लामा पुर्याइएको हो ।
गृहमन्त्री ओमप्रकाश अर्यालले सोमबार पदभार ग्रहण गर्दै प्रदर्शनमा मृत्यु भएका व्यक्तिहरूको शव घर ठेगानासम्म पुर्याउने सरकारी निर्णय सार्वजनिक गरेका थिए ।
हालसम्म जेन–जी प्रदर्शनमा ७२ जनाको मृत्यु भएको पुष्टि भइसकेको छ । सरकारको निर्णयअनुसार मृतकहरूको शवको सम्मानपूर्वक घरसम्म पुर्याउने प्रक्रिया जारी राखिएको छ ।
काठमाडौँ । नेपालका लागि भारतीय राजदूत नवीन श्रीवास्तवले मंगलबार प्रधानमन्त्री सुशीला कार्कीसँग शिष्टाचार भेट गरेका छन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा द्विपक्षीय हित र आपसी चासोका विभिन्न विषयमा छलफल गरिएको प्रधानमन्त्रीको सचिवालयले जनाएको छ ।
भेटका क्रममा प्रधानमन्त्री कार्कीले वर्तमान सरकारको प्रमुख कार्यादेश निर्वाचन सम्पन्न गर्नु भएकाले त्यसमा सहयोगका लागि भारतलाई आग्रह गरिन् ।
सो अवसरमा राजदूत श्रीवास्तवले भारतीय प्रधानमन्त्री नरेन्द्र मोदीको तर्फबाट प्रधानमन्त्री कार्कीलाई बधाई सन्देश हस्तान्तरण गरे । उक्त सन्देशमा नेपाल–भारतबीचको मित्रता र सहयोगलाई अझ सुदृढ बनाउन मिलेर काम गर्ने प्रतिबद्धता व्यक्त गरिएको परराष्ट्र मन्त्रालयले जनाएको छ ।
राजदूत श्रीवास्तवले नेपालका आवश्यकता र प्राथमिकताअनुसार भारतको सहयोग निरन्तर रहने बताउँदै असल छिमेकीको नातालाई अझ प्रगाढ बनाउन दुवै पक्ष इच्छुक रहेको जानकारी गराए ।
त्यस्तै, उनले आगामी असोज २ गते भारतीय प्रधानमन्त्री मोदी र प्रधानमन्त्री कार्कीसँग टेलिफोन वार्ता हुने तयारी भइरहेको समेत जानकारी गराए ।
वीरगंज । जेन–जी आन्दोलनका क्रममा अराजक समूहले तोडफोड र आगजनी गरी ध्वस्त पारेको वीरगंज महानगरपालिका–१० स्थित आदर्शनगर वडा कार्यालय पुनः सञ्चालनमा आएको छ । गत मंगलबारको घटनापछि सेवा ठप्प भएको वडा कार्यालय पुनः सञ्चालनमा ल्याइएको हो ।
वडाध्यक्ष सुशील साह कानु, कर्मचारी तथा स्थानीय युवाहरूको सक्रियतामा आइतबार र सोमबार व्यापक सरसफाइ तथा मर्मतको काम सम्पन्न भएपछि सेवा पुनः सुरु गरिएको हो ।
वडाध्यक्ष कानुले कार्यालय सञ्चालनका लागि आवश्यक पर्ने फर्निचर, कम्प्युटर, ल्यापटप, प्रिन्टरलगायतका सामग्री आफ्नै व्यक्तिगत खर्चमा उपलब्ध गराएका छन् । उनका अनुसार करिब १५ लाख रुपैयाँ बराबरको सामग्री प्रयोग गरेर सेवा सञ्चालन गरिएको हो ।
आगोले जलेर पूर्ण रूपमा ध्वस्त भएको दोस्रो तल्लाको कोठा प्रयोग गर्न असम्भव भएकाले वडा कार्यालय अस्थायी रूपमा भुइँतल्लाको बरन्डाबाट सञ्चालनमा ल्याइएको छ ।
तोडफोड र आगजनीबाट करिब ७० लाख रुपैयाँ बराबरको क्षति भएको अनुमान गरिएको छ । कार्यालयका दुई कोठा र एक हल पूर्णरूपमा नष्ट भएका छन् । साथै कम्प्युटर, ल्यापटप, एसी, प्रिन्टर, टेबल, कुर्सी, सोफा, दराजलगायतका सम्पूर्ण फर्निचर जलेर खरानी भएका थिए ।
महानगरपालिकाले मंगलबार बसेको नगर परिषद् बैठकमा आवश्यक उपकरण र सामग्री केही दिनभित्र उपलब्ध गराउने प्रतिबद्धता जनाएको छ ।
वडाध्यक्ष कानुको निजी पहलले स्थानीय बासिन्दा हर्षित भएका छन् । सेवा ठप्प हुँदा समस्या भोगिरहेका वडाबासीले पुनः सहज रूपमा सेवा पाउन थालेको भन्दै राहत महसुस गरेका छन् ।
काठमाडौँ । जेन–जी पुस्ताद्वारा भदौ २३ र २४ गते भएका प्रदर्शनका क्रममा ज्यान गुमाउने मृतकहरूको सम्मानमा नेपाल सरकारले असोज १ गते बुधबार राष्ट्रिय शोक मनाउने र सार्वजनिक बिदा दिने निर्णय गरेको छ ।
गृह मन्त्रालयका अनुसार नेपालभरका सबै सरकारी कार्यालय, विदेशस्थित नेपाली दूतावास र नियोगहरूमा सो दिन सार्वजनिक बिदा हुनेछन् । साथै, राष्ट्रिय झण्डा आधा झुकाएर मृतकहरूलाई श्रद्धाञ्जली अर्पण गरिनेछ ।
मन्त्रिपरिषद्को २०८२।०५।३० गतेको निर्णयअनुसार सार्वजनिक बिदा दिने र राष्ट्रिय शोक मनाउने कार्य गर्न गृह मन्त्रालयका सहसचिव तथा प्रवक्ता आनन्द काफ्लेको जानकारी दिए ।
यस निर्णयलाई जेन–जी आन्दोलनका क्रममा ज्यान गुमाएकाहरूप्रतिको सरकारी सम्मानको रूपमा लिइएको छ ।
वीरगंज । पर्सा जिल्लाको जगरनाथपुर गाउँपालिका–२ इनर्वा बोर्डर नजिकबाट अन्दाजी ४० वर्षीया एक महिलाको उद्धार गरिएको छ । मंगलबार साँझ ४ बजे मानवसेवा आश्रम वीरगंज शाखाले महिलालाई उद्धार गरी आश्रममा ल्याएको हो ।
महिला आफ्नो नाम–थर प्रष्ट बताउन नसक्ने अवस्थामा थिइन् । उद्धार कार्यमा जगरनाथपुर गाउँपालिका अध्यक्ष श्रीकान्त यादवको पहल थियो भने मानवसेवा आश्रम वीरगंजका संस्थापक अभियन्ता देवेश गुप्ता, सामाजिक अभियन्ता तथा आश्रमका अभिभावक प्रकाश थारु, शसस्त्र प्रहरी बलका डिएसपी विष्णु राज उप्रेती, वडाध्यक्ष नेपली प्रसाद कुशवाहा र स्वयंसेवकहरू विकास माली, सरोज बि.क. र दिपेन्द्र चौधरीको सक्रिय सहभागिता रहेको थियो ।
महिलालाई आश्रममा ल्याएपछि नुहाइ–धुहाई तथा सरसफाइ गरी डाक्टर भरत गोईको निगरानीमा स्वास्थ्य परीक्षण र औषधोपचारको व्यवस्था गरिएको मानवसेवा आश्रमका संस्थापक गुप्ताले जानकारी दिए ।
यसअघि आइतबार पनि वीरगंजकाे बसपार्कबाट अन्दाजी १५ वर्षीया बोल्न नसक्ने बालिकालाई उद्धार गरीएकाे थियाे । वाेल्न नसक्ने ति महिलाई पनि मानवसेवा आश्रम वीरगंज शाखामा राखिएकाे छ ।
वीरगंज । काठमाडाैं महानगरपालिकाका मेयर बालेन साहले धरान उपमहानगरपालिकाका मेयर हर्क साम्पाङलाई फेसबुकमार्फत प्रेमपूर्ण तर स्पष्ट जवाफ दिएका छन्। मेयर साहले लेखेका छन्, “डियर हर्क साम्पाङ, तिमीले मलाई जति गाली गरे पनि म तिमीलाई माया गर्न छोड्दिन। एकतर्फी नै सही, तर मेरो माया साँचो हो।”
यसअघि हर्क साम्पाङले फेसबुकमा बालेनलाई लक्षित गर्दै “सिंहदरबारमा आगो लगाइदिन्छु, जलाइदिन्छु” लगायतका अभिव्यक्ति दिएका थिए। त्यस्तै, हर्कले लेखेका थिए, “चान्चुने नठान! सक्छस् भने प्रत्यक्ष कार्यकारी प्रमुखको चुनाव गर। हारें भने तेरो घरमा १ वर्ष नोकर बस्छु, तँ हारिस् भने मेरो घरमा सिर्फ १ महिना हली बस्। सक्छस्? मुला लुक्छस्? हूतिहारा…”
थुप्रै फेसबुक स्टाटसहरूमा हर्कले बालेनलाई लक्षित गरेपछि, बालेनले आज आफ्नै फेसबुक स्टाटसमार्फत जवाफ फर्काएका हुन्। उनका स्टाटसमा प्रेम र व्यंग्य दुवै मिसिएको देखिन्छ।
यो घटनाले सामाजिक सञ्जालमा चर्चा बढाएको छ र दुवै मेयरबीचको सम्बन्ध र राजनीतिक संवादको ध्यान तानेको छ। राजनीतिक क्षेत्रका विश्लेषकहरूले यसलाई आधुनिक डिजिटल युगमा नेताहरूबीचको संवादको अनौठो उदाहरणको रूपमा मूल्याङ्कन गरेका छन्।
