काठमाडौँ । नेपालका लागि भारतीय राजदूत नवीन श्रीवास्तवले मंगलबार प्रधानमन्त्री सुशीला कार्कीसँग शिष्टाचार भेट गरेका छन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा द्विपक्षीय हित र आपसी चासोका विभिन्न विषयमा छलफल गरिएको प्रधानमन्त्रीको सचिवालयले जनाएको छ ।
भेटका क्रममा प्रधानमन्त्री कार्कीले वर्तमान सरकारको प्रमुख कार्यादेश निर्वाचन सम्पन्न गर्नु भएकाले त्यसमा सहयोगका लागि भारतलाई आग्रह गरिन् ।
सो अवसरमा राजदूत श्रीवास्तवले भारतीय प्रधानमन्त्री नरेन्द्र मोदीको तर्फबाट प्रधानमन्त्री कार्कीलाई बधाई सन्देश हस्तान्तरण गरे । उक्त सन्देशमा नेपाल–भारतबीचको मित्रता र सहयोगलाई अझ सुदृढ बनाउन मिलेर काम गर्ने प्रतिबद्धता व्यक्त गरिएको परराष्ट्र मन्त्रालयले जनाएको छ ।
राजदूत श्रीवास्तवले नेपालका आवश्यकता र प्राथमिकताअनुसार भारतको सहयोग निरन्तर रहने बताउँदै असल छिमेकीको नातालाई अझ प्रगाढ बनाउन दुवै पक्ष इच्छुक रहेको जानकारी गराए ।
त्यस्तै, उनले आगामी असोज २ गते भारतीय प्रधानमन्त्री मोदी र प्रधानमन्त्री कार्कीसँग टेलिफोन वार्ता हुने तयारी भइरहेको समेत जानकारी गराए ।
