काठमाडौं । सरकारले जेनजी आन्दोलनमा ज्यान गुमाएका व्यक्तिहरूको सम्झनामा यही असाे १ गते बुधबार ‘शोक दिवस’ मनाउने निर्णय गरेको छ । सोमबार बसेको प्रधानमन्त्री सुशिला कार्की नेतृत्वको मन्त्रिपरिषद्को पहिलो बैठकले यस्तो निर्णय गरेको हो।

गृह तथा कानुनमन्त्री ओमप्रकाश अर्यालका अनुसार असोज १ गते सार्वजनिक बिदा दिने र ज्यान गुमाएका व्यक्तिहरूलाई राष्ट्रिय झण्डा ओढाएर सम्मान गर्ने निर्णय भएको छ । आन्दोलनका क्रममा ज्यान गुमाएका व्यक्तिहरूलाई शहीद घोषणा गर्ने निर्णयसमेत गरिएको उनले जानकारी दिए ।

सरकारले मृतकका परिवारलाई राहतस्वरूप यसअघि उपलब्ध गराउँदै आएको १० लाख रुपैयाँमा थप ५ लाख थप गरेर १५ लाख रुपैयाँ दिने निर्णय पनि गरेको छ । साथै, ज्यान गुमाएका व्यक्तिहरूलाई राष्ट्रिय सम्मानका साथ अन्त्येष्टि गरिनेछ ।

जेनजी आन्दोलनका क्रममा देशभर ७२ जनाको मृत्यु भएको र २ हजार ३१६ जना घाइते भएको सरकारको तथ्यांकमा उल्लेख छ । हाल २८३ जना विभिन्न अस्पतालमा उपचाररत छन् ।

मन्त्रिपरिषद् बैठकले आन्दोलनमा क्षति भएका निजी तथा सार्वजनिक संरचनाको पुनर्निर्माणका लागि ‘पुनर्निर्माण कोष’ स्थापना गर्ने र उक्त कोषमा रकम जम्मा गर्न सबैलाई आह्वान गर्ने निर्णय गरेको छ ।

त्यस्तै, जेनजी आन्दोलनमा ज्यान गुमाएका युवाको सम्झनामा ‘जेनजी जागरण स्मारक पार्क’ निर्माण गर्ने योजना तयार पार्न शहरी विकास मन्त्रालयलाई जिम्मेवारी दिएको छ।

बैठकले आन्दोलनका घटनाबारे छानबिन गर्न पूर्व न्यायाधीशको अध्यक्षतामा न्यायिक समिति गठन गर्ने निर्णय पनि गरेको छ।