वीरगंज । पर्साको पर्सागढी नगरपालिकाले आगामी आर्थिक वर्ष २०८२/८३ का लागि ५६ करोड ६ लाख २ हजार ४ सय ७९ रुपैयाँ बराबरको अनुमानित बजेट सार्वजनिक गरेको छ। नगरसभाको १३औं अधिवेशनमा उपमेयर पूजा चौधरीले बजेट प्रस्तुत गरेकी हुन्।

बजेटमा संघीय र प्रदेश सरकारबाट प्राप्त हुने विभिन्न शीर्षकका अनुदान, राजस्व बाँडफाँड तथा आन्तरिक आय समावेश गरिएको छ। संघीय समानीकरण अनुदान ११ करोड ७६ लाख, संघीय सशर्त अनुदान २६ करोड ९० लाख, राजस्व बाँडफाँड १० करोड ६१ लाख १ हजार ८९९, प्रदेश समानीकरण अनुदान ८२ लाख ६ हजार, प्रदेश सशर्त अनुदान ९५ लाख, प्रदेश राजस्व बाँडफाँड ८० लाख ८४ हजार ५८०, विशेष अनुदान ३० लाख, समपुरक अनुदान २० लाख र आन्तरिक आय २ करोड ७१ लाख १० हजार रुपैयाँ रहेको छ।

कार्यक्रममा मेयर गोकर्ण पाठकले नीति तथा कार्यक्रम सार्वजनिक गर्दै शिक्षा, स्वास्थ्य, कृषि, पर्यटन, पूर्वाधार र खेलकुदलाई प्राथमिकतामा राखिएको जानकारी दिए। उनले जनताको प्रत्यक्ष लाभ हुने कार्यक्रम कार्यान्वयनमा पारदर्शिता र प्रभावकारिता सुनिश्चित गरिने प्रतिबद्धता व्यक्त गरे।

प्रमुख प्रशासकीय अधिकृत राजु प्रसाद साहले स्वागत मन्तव्य राख्दै जनप्रतिनिधि र कर्मचारीबीचको सहकार्यबाट पर्सागढी समृद्धिको बाटोमा अघि बढ्ने विश्वास व्यक्त गरे।

स्वास्थ्य शाखा प्रमुख नारायण प्रसाद पौडेलले कार्यक्रमको सहजीकरण गरेका थिए। कार्यक्रममा वडा नं. १ देखि ९ सम्मका वडाध्यक्ष, कार्यपालिका सदस्य, कर्मचारी, सञ्चारकर्मीको उल्लेखनीय उपस्थिति थियो।

कार्यक्रमको अन्त्यमा नगरपालिकाबाट अवकाश पाएका कर्मचारीहरू र उत्कृष्ट कार्य प्रदर्शन गर्ने कर्मचारीहरूलाई सम्मान गरिएको थियो।

पोखरिया । पर्साकाे पोखरिया नगरपालिकाकाे वडा नं. ५ सतवरियामा मेयर प्रदुमन प्रसाद चौहान र उपमेयर रुवी कुमारी ठाकुरले संयुक्त रूपमा २ करोड ८० लाख रुपैयाँ लागतमा सडक तथा नाला निर्माणको शिलान्यास गरेका छन् ।

निर्माण कार्य अन्तर्गत कमल मुखियाको घरदेखि नहरसम्म कालोपत्र, लक्ष्मण सिंह ख्वासको घरदेखि राधाकृष्ण मन्दिरसम्म कालोपत्र, दलित बस्ती नजिक रहेको मस्जिददेखि स्ल्याब कलभर्टसम्म र मन्सुर मियाको घरदेखि नहरसम्म ग्राभेलसहितको ढलान गरिनेछ। योजना अन्तर्गत एक हजार ३ मिटर लम्बाइ र ६ मिटर चौडाइको सडक तथा ३९४ मिटर नालाको निर्माण गरिनेछ ।

शिलान्यास कार्यक्रममा बोल्दै मेयर चौहानले निर्माण कार्य स्टिमेटअनुसार गुणस्तरीय र समयमा सम्पन्न गर्न ठेकेदारलाई निर्देशन दिएका छन् । साथै, काममा लापरवाही भए कडा कारबाही हुने चेतावनी दिएका उनले स्थानीयहरूलाई समेत निगरानीमा सहयोग गर्न आग्रह गरे ।

वडा अध्यक्ष महेन्द्र महतो चाईको अध्यक्षतामा भएकाे शिलान्यास कार्यक्रममा प्रमुख प्रशासकीय अधिकृत रामविनय कुमार सिंह, इन्जिनियर सुमित प्रसाद यादव, अखिलेश प्रसाद चौरसिया, ज्ञानेन्द्र यादव, हृदयलाल साह लगायतकाे उपस्थिति रहेकाे थियो ।

वीरगंज । पर्साकाे पोखरीया नगरपालिका तत्कालिन हालका बहुदरमाई नगरपालिकाका निमित्त प्रमुख प्रशासकिय अधिकृतलाई अख्तियारले अनुसन्धान गर्न नियन्त्रणमा लिएकाे छ ।

पाेखरिया नगरपालिकाका योजनाको स्वीकृति तथा कर्मचारी नियुक्तिमा अनियमितता र भ्रष्टाचारको आरोपमा अख्तियार दुरुपयोग अनुसन्धान आयोग टंगालकाे टाेलीले पाेखरियाका तत्कालीन प्रमुख प्रशासकीय अधिकृत अजय कुमार श्रीवास्तव र नायब सुब्बा संदीप साहलाई नियन्त्रणमा लिएको हाे ।

आयोगको टंगाल कार्यालयबाट खटिएको टोलीले वीरगंज महानगरपालिका वडा नं. १२ स्थित प्रतिमा चोकबाट अधिकृत श्रीवास्तवलाई र वीरगंज कै वडा नं. ३ प्रगतिनगरबाट नायब सुब्बा साहलाई मोबाइल फोनसहित नियन्त्रणमा लिएको अख्तियारका सहायक प्रवक्ता देवी प्रसाद थपलियाले जानकारी दिए ।

त्यस्तै, हाल पोखरीया नगरपालिकाका प्रमुख प्रशासकीय अधिकृत राम बिनय कुमार सिंह र वडा नं. २ का सचिव ओम प्रकाश चौरसियाको साथबाट समेत दुई थान मोबाइल नियन्त्रणमा लिएर थप अनुसन्धान जारी रहेको प्रवक्ता थपलियाले वताए ।