वीरगंज । पर्साको पकहा मैनपुर गाउँपालिका–१ धोरेमा विद्युत् सर्ट भएर आगलागी हुँदा करिब एक लाख छयासी हजार रुपैयाँ बराबरको क्षति भएको छ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालका अनुसार धुपनाथ राउतको गोठघरमा शनिबार राति २:०० बजेतिर आगलागी भएको हो। सो खबर प्राप्त भएपछि प्रहरी चौकी धोरेबाट प्रहरी सहायक निरीक्षक भन्टु राय यादवको कमाण्डमा टोली खटिएको थियो।
स्थानीय बासिन्दा र प्रहरीको सहयोगमा आगो राति ३:०० बजेतिर नियन्त्रणमा लिइएको थियो। आगलागीबाट गोठघरभित्र रहेको बिआर ०५एएस ४८७९ नम्बरको टीभीएस मोटरसाइकल, एक थान साइकल र एक थान बिद्युत् मिटर जलेर नष्ट भएको प्रहरीले जनाएको छ। साथै, गोठमा रहेका एक भैंसी र दुईवटा पाडीको ढाडमा करिब १० प्रतिशत पोलिएको पनि बताइएको छ।
प्रारम्भिक अनुमान अनुसार आगलागीबाट करिब १ लाख ८६ हजार रुपैयाँ बराबरको क्षति भएको र मानविय क्षति भने नभएको प्रहरी नायब उपरीक्षक लम्सालले जानकारी दिए।
