वीरगंज । रौतहटको माधव नारायण नगरपालिकाका तत्कालीन निमित्त प्रमुख प्रशासकीय अधिकृत प्रलब कायस्थ, लेखापाल रामबलम प्रसाद यादव, र रौतहट एडभटाइजिङ्ग एजेन्सी प्रा.लि. का सञ्चालक अजित कुमार कर्णसहित तीन जना उपर गैरकानूनी लाभ उठाई नगरपालिकालाई हानी पुर्याएको आरोपमा विशेष अदालत काठमाडौंमा भ्रष्टाचारको मुद्दा दायर गरिएको छ ।
अख्तियार दुरुपयोग अनुसन्धान आयोगका अनुसार, उक्त अधिकारीहरूले आ.व. २०७७/७८ अन्तर्गत देवी माध्यमिक विद्यालय, सखुअर्वा (माधव नारायण–३) मा निर्माण कार्यका लागि बोलपत्र आह्वान गर्दा सार्वजनिक खरिद ऐन अनुसार सूचना प्रकाशन नगरी आन्तरिक रूपमा मात्र सूचना जारी गरेको पाइएको हो ।
आरोपपत्रका अनुसार, उनीहरूले ठेक्का नं. MNM/Works/2/077/078 को बोलपत्र आह्वान र आशयको सूचना राष्ट्रियस्तरको दैनिक पत्रिकामा प्रकाशन नगरी झुट्टा पत्रिका तयार गरी अभिलेखमा राखेका थिए । साथै, उक्त झुट्टा सूचना पत्रिकाका आधारमा रौतहट एडभटाइजिङ्ग एजेन्सीलाई २ लाख ५७ हजार ९७० रुपैयाँ भुक्तानी गरिएको प्रमाणित भएको आयोगले जनाएको छ ।
प्रवक्ता राजेन्द्र कुमार पौडेलका अनुसार, सो कार्य नगरपालिकाका कर्मचारी र विज्ञापन कम्पनीबीचको आपसी मिलेमतो र बदनियतपूर्ण योजनाअन्तर्गत गरिएको पुष्टि भएपछि उनीहरूविरुद्ध विशेष अदालतमा भ्रष्टाचार सम्बन्धी आरोपपत्र दायर गरिएको हो ।
