वीरगंज । जिल्ला प्रहरी कार्यालय पर्साले श्रोत नखुलेको हुण्डीकाे रकमसहित एक युवकलाई नियन्त्रणमा लिएको छ ।
विशेष सूचनाका आधारमा आइतबार दिउँसो करिब १२ बजे वीरगंज महानगरपालिका–१० आदर्शनगरस्थित नबिल बैंक अगाडिको सडक खण्डमा एक जना संकास्पद व्यक्तिलाई जाँच गर्ने क्रममा उक्त रकम फेला परेको प्रहरीले जनाएकाे छ ।
प्रहरीका अनुसार पक्राउ पर्नेमा वीरगंज महानगरपालिका–१६ बस्ने १९ वर्षीय किशन यादव रहेका छन् । प्रहरीले यादवले लगाएको सेतो जिन्स पाइन्टको खल्तीबाट नेपाली रूपैयाँ ५०० दरका ८६८ थान नोट, जम्मा ४ लाख ३४ हजार रुपैयाँ बरामद गरेको जनाएको छ ।
उक्त रकमको श्रोत खुल्न नसकेपछि यादवमाथि मुलुकी अपराध संहिता २०७४ को दफा १२५(क) अनुसार हुण्डी कारोबार सम्बन्धी कसूरमा मुद्दा दर्ता गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले जानकारी दिए ।
प्रवक्ता लम्सालका अनुसार पक्राउ परेकालाई जिल्ला अदालत पर्साबाट पाँच दिनको म्याद थप अनुमति लिएर घटनाबारे थप अनुसन्धान भइरहेको छ ।
