जनकपुरधाम । जिल्ला प्रहरी कार्यालय धनुषाले प्रहरी निरीक्षक ओम प्रकाश यादवलाई २०८२ साल असोज महिनाको “Police of the Month” घोषित गरेको छ ।
प्रहरी निरीक्षक यादव हाल जिल्ला प्रहरी कार्यालय धनुषाको मातहत इलाका प्रहरी कार्यालय यदुकुहाका कार्यालय प्रमुखको रूपमा कार्यरत छन् । उनले आफ्नो कार्यक्षेत्रमा रहँदै विभिन्न मुद्दाका फरार १४ जना प्रतिवादीलाई पक्राउ गरी कानूनी कारबाही अघि बढाउने, हुण्डी कारोबारमा संलग्न भारतीय नागरिकलाई पक्राउ गर्ने र ठगी घटनामा संलग्न व्यक्तिहरूलाई पक्राउ गरी पिडितलाई रकम फिर्ता गराउने जस्ता उत्कृष्ट कार्यहरू गरेका छन् ।
त्यसैगरी उनले रामपरी देवी बरही ठाकुर हत्या प्रकरणमा संलग्न अभियुक्तलाई पक्राउ गर्न, Gen-Z आन्दोलनका क्रममा प्रमुख मन्त्रीको निवास र सरकारी भवनहरूमा आगजनी हुन नदिने, लुटपाटमा संलग्न व्यक्तिहरूलाई पक्राउ गर्ने, साथै कारागारबाट फरार भएका कैदीलाई पुनः पक्राउ गर्ने कार्यमा पनि महत्वपूर्ण भूमिका निर्वाह गरेका थिए ।
यस्तै, धार्मिक संवेदनशीलता देखिएको जनकपुर उपमहानगरपालिका–२० रुपैठा क्षेत्रमा गणेश र दुर्गा मूर्ति सेलाउने विषयमा उत्पन्न विवादलाई नियन्त्रणमा लिन, भीड तितर–बितर पार्न र थप अप्रिय घटना हुन नदिन समेत उनले प्रमुख भूमिका खेलेका थिए ।
प्रहरी उपरीक्षक नरहरी रेग्मीका अनुसार, निरीक्षक यादवले आफ्नो जिम्मेवारीलाई उच्च व्यवसायिक कुशलता र समर्पणका साथ निर्वाह गरी प्रहरी संगठनको छवि उच्च राख्न उल्लेखनीय योगदान दिएका छन् ।
उक्त कार्यको उच्च मूल्याङ्कन गर्दै जिल्ला प्रहरी कार्यालय धनुषाले उनीलाई “महिनाको उत्कृष्ट प्रहरी (Police of the Month)” को रूपमा सम्मान गरिएको जनाएको छ ।
