वीरगंज । पर्साको बिन्दवासिनी गाउँपालिका–४ अमरपट्टीस्थित सशस्त्र प्रहरी बल नेपाल, नम्बर १३ गण अन्तर्गतको बीओपी अमरपट्टीबाट खटिएको गस्ती टोलीले दुई जनालाई गाँजासहित नियन्त्रणमा लिएको छ।
शनिबार दिउँसो ३:२० बजे सशस्त्र प्रहरी निरीक्षक कृष्ण बहादुर के.सी.को कमाण्डमा खटिएको चार जनाको मोटरसाइकल गस्ती टोलीले नेपालबाट भारततर्फ जाँदै गरेको ना.१३ प.४६१८ नम्बरको रातो–कालो रंगको ऐमहा अल्बा मोटरसाइकललाई चेकजाँच गर्ने क्रममा सो सामग्री बरामद गरेको हो।
गस्ती टोलीले जिल्ला पर्सा, पर्सागढी नगरपालिका–९ एकटाङा निवासी २९ वर्षीय गोपाल यादव र जगरनाथपुर गाउँपालिका–६ बहुवरी निवासी १९ वर्षीय गौतम पटेललाई पक्राउ गरेको जनाएको छ।
उनीहरूका साथबाट शरीरभित्र र मोटरसाइकलको सिटमुनी लुकाइ ल्याइएको ५ के.जी. गाँजा, एक थान रियल मि मोबाइल, एक थान standard कम्पनीको घडी, साथै रु २२० नगद बरामद गरिएको सशस्त्र प्रहरी बलले जनाएको छ।
बरामद सामान र पक्राउ परेकाहरूलाई आवश्यक कानूनी कारबाहीका लागि नेपाल प्रहरीलाई बुझाउने तयारी भइरहेको सशस्त्र प्रहरी बल नम्बर १३ गण, पर्साका सूचना अधिकारी प्रहरी नायब उपरीक्षक सुरज कार्कीले जानकारी दिए ।
