वीरगंज । त्रिभुवन राजपथअन्तर्गत गण्डकदेखि मितेरी पुलसम्मको सडक विस्तारको क्रममा वीरगंज महानगरपालिकाले सुरु गरेको संरचना हटाउने कार्यविरुद्ध घरधनीहरूले बिहीबार बजार बन्द र प्रदर्शन गरेका छन् ।

‘वीरगंज बचाउ संघर्ष समिति’ र ‘वीरगंज युवा तथा व्यापारी सडक पीडित संघर्ष समिति’को संयोजनमा गरिएको विरोधका क्रममा घण्टाघर चोकमा टायर बालेर प्रदर्शन गरिएको थियो। सो समितिहरूको राणीसति धर्मशालामा बसेको बैठकले शुक्रबार बिहान ११ बजेसम्म बजार बन्द गर्ने निर्णय गरेपछि वीरगंज बजार आंशिक रूपमा प्रभावित बन्यो ।

सङ्घर्ष समितिका अध्यक्ष जवाहरप्रसाद गुप्ताले प्रमुख सडक क्षेत्रका घरहरूमा कालो झण्डा राखेर शान्तिपूर्ण तर शक्तिशाली रूपमा विरोध जनाउने निर्णय भएको जानकारी दिए ।

यसअघि, घरधनीहरूले जिल्ला प्रशासन कार्यालय, पर्सामा ज्ञापन पत्र बुझाउँदै संरचना भत्काउने कार्य तत्काल रोक्न माग गरेका थिए । उनीहरूले महानगरपालिकाले आफ्नो क्षेत्राधिकारभन्दा बाहिर गई जबरजस्ती घर–टहरा भत्काएको आरोप समेत लगाएका छन् ।

तर, वीरगंज महानगरपालिकाले भने सर्वोच्च अदालतको आदेशअनुसार भन्सार क्षेत्रबाट सडक विस्तारको काम अघि बढाइएको दाबी गरेको छ । सोमबारदेखि सुरु गरिएको कार्य अन्तर्गत डोजर प्रयोग गरी दुई दिनसम्म सडक क्षेत्रका संरचना हटाइएको थियो । यद्यपि, जिल्ला प्रशासनको आग्रहमा महानगरले हालका लागि काम रोकेको छ ।

मुख्य सडक क्षेत्रका घरधनीहरू भने बिना मुआब्जा र पूर्वसूचना संरचना भत्काइएको भन्दै आक्रोशित छन् र आन्दोलन थप चर्काउने चेतावनी दिइरहेका छन् ।

सडक विस्तार पक्षधर समूहले भने वीरगंज सहरको विकासका लागि काम रोकिनु नहुने अडान लिएको छ । अहिले सडक विस्तार र नागरिकको सम्पत्तिको संरक्षणबिच सन्तुलन कायम गर्नु वीरगंज महानगर र प्रशासनका लागि चुनौतीपूर्ण बन्दै गएको छ ।

वीरगंज । वीरगंजकाे मुख्य सडक विस्तार अब विलम्ब गर्ने विषय नभई तत्काल कार्यान्वयन गर्नुपर्ने अपरिहार्य आवश्यकता भएको प्रतिनिधि सभा सदस्य विना जयसवालले स्पष्ट पार्नुभएको छ ।

उहाँका अनुसार, वीरगंज नेपालको एक प्रमुख व्यापारिक केन्द्र हो, जहाँको आर्थिक गतिविधि केवल स्थानीय क्षेत्रसँग मात्र नभई राष्ट्रकै समग्र विकाससँग गहिरो सम्बन्धित छ । यस्तो संवेदनशील सहरको मुख्य सडक संकुचित, अव्यवस्थित र अत्यधिक चापयुक्त हुनुले दीर्घकालीन रूपमा विकासको गतिमा बाधा पुर्‍याइरहेको छ ।

“यो सडक विस्तार कुनै वैकल्पिक कुरा होइन, यो आवश्यकता हो, जुन जुनसुकै मूल्यमा भए पनि सम्पन्न हुनैपर्छ,” सांसद जयसवालले भनाई छ ।

उहाँले सबै नागरिकलाई आग्रह गर्दै भन्नुभयो, “आजको सानो असहजता भोलिको ठूलो सहजता बन्न सक्छ । मुख्य सडकको विस्तारले यातायात व्यवस्थापन सहज बनाउनेछ, व्यापारिक गतिविधिमा तीव्रता ल्याउनेछ, रोजगारी सिर्जना गर्नेछ र सम्पूर्ण सहरको जीवनशैलीमा सकारात्मक परिवर्तन ल्याउनेछ ।”

जयसवालले प्रस्ट पार्नुभयो कि विकासको कुनै पनि कार्यले अस्थायी असुविधा त ल्याउँछ नै, तर स्थायी समाधान र समृद्ध भविष्य त्यसको प्रतिफल हुन्छ ।

“हामी सत्यसँग आँखा चिम्लेर बस्न सक्दैनौं,” उहाँले जोड दिँदै भन्नुभयो, “यदि सडक विस्तारका लागि केही त्याग गर्नुपर्छ भने त्यो त्याग जनताको दीर्घकालीन हितका लागि हुनेछ।”

उहाँले व्यक्तिगत स्वार्थ वा अल्पकालीन असुविधा देखाएर विरोध गर्ने सोचप्रणालीलाई देशको समृद्धिको बाटोमा रोकिने अवरोध मात्र भएको भन्दै त्यसलाई स्पष्ट रूपमा चुनौती दिनुपर्ने धारणा राख्नुभयो।

जयसवालको भनाइमा अन्ततः यस कार्यका लागि अब दोधारमा बस्ने बेला होइन, “निर्णय गर्ने, अघि बढ्ने र विकासको पथमा सहकार्य गर्ने समय” भएको उल्लेख छ ।

“बिरगंजको मुख्य सडक विस्तार राष्ट्रकै मेरुदण्ड मजबुत बनाउने खम्बा हुनेछ,” सांसद जयसवालले आफ्नाे आधिकारिक फेसबुकमा लेख्नु भएकाे छ ।

वीरगंज । वीरगंज महानगरपालिकाले मुख्य सडक विस्तार गर्ने बहुप्रतीक्षित योजना १६ असारदेखि औपचारिक रूपमा कार्यान्वयनमा ल्याएको छ । मेयर राजेशमान सिंहको नेतृत्वमा त्रिभुवनराज पथकाे वीरगंज भन्सार क्षेत्रबाट सुरु भएको अभियानले बजार क्षेत्रको मुटुमा पर्ने यो मार्गलाई २५ मिटर चौडाइमा विस्तार गर्ने लक्ष्य लिएको छ।

सर्वोच्च अदालतमा स्थानीयवासीहरूले दायर गरेको मुद्दा हालै खारेज भएपछि कानुनी अड्चन हटेको र त्यसपछि डोजरसहितको टोली परिचालन गरिएको महानगरले जनाएको छ । “सहरलाई व्यवस्थित, सुरक्षित र दिगो बनाउने हाम्रो लक्ष्यमा अब अवरोध सहन सकिँदैन,” मेयर सिंहले बताए ।

त्रिभुवनराज पथ रक्सौलबाट भित्रिने मालवाहक सवारीको मुख्य प्रवेशद्वार हो र यो मार्ग पथलैया–कोलकाता मालवाहक कोरिडोरसँग जोडिन्छ । विगतमा अतिक्रमण, धुलो–धुवाँ र जामका कारण सास्ती खेप्दै आएका नागरिकले यस अभियानबाट ठुलो राहतको अपेक्षा गरेका छन् ।

यद्यपि केही स्थानीयवासीले मुआब्जा नपाएको गुनासो गर्दै विरोध जनाएका छन् । तर महानगरपालिकाले ३० दिनअघि नै सूचना जारी गरेर स्वेच्छिक रूपमा संरचना हटाउन आग्रह गरेको थियो । प्रतिक्रिया नआएपछि मात्रै डोजर प्रयोग गरिएको जनाइएको छ ।

स्थानीय व्यापारी, युवाहरू र सामाजिक अभियन्ताहरूले यो अभियानको स्वागत गर्दै सडक विस्तारपछि वीरगंजकाे स्वरूप नै फेरिने विश्वास व्यक्त गरेका छन् ।