जनकपुरधाम । मधेश प्रदेश सरकारले छठ पर्वको भोलिपल्ट कार्तिक ११ गते, मंगलबारका दिन सार्वजनिक विदा दिने निर्णय गरेको छ।
गृह, सञ्चार तथा कानुन मन्त्रालय, मधेश प्रदेशले शुक्रबार एक सूचना प्रकाशित गर्दै मधेश प्रदेश सरकारद्वारा मिति २०८१ साल चैत्र २२ गतेको प्रदेश राजपत्रमा प्रकाशित “२०८२ सालका थप विदा सम्बन्धी सूचना” अनुसार, यस वर्षको छठ पर्वको भोलिपल्टका दिन प्रदेशभर सार्वजनिक विदा रहने जनाएको छ ।
मन्त्रालयका उपसचिव गणेश नायकद्वारा हस्ताक्षरित सूचनामा भनिएको छ, “मिति २०८२ साल कार्तिक ११ गते मंगलबारका दिन छठ पर्वको भोलिपल्ट मधेश प्रदेशमा सार्वजनिक विदा दिने निर्णय भएको व्यहोरा सम्बन्धित सबैमा जानकारीको लागि यो सूचना प्रकाशन गरिएको छ।”
यससँगै छठ पर्व मनाउने श्रद्धालु र व्रतालुहरूलाई पर्वको समापनपछि आवश्यक धार्मिक तथा पारिवारिक कार्य सहज रूपमा सम्पन्न गर्न मद्दत पुग्ने अपेक्षा गरिएको छ।
