वीरगंज । पर्सा जिल्लाको कालिकामाई गाउँपालिका–२ स्थित कालिकामाई युवा समाजले आफ्नो दोस्रो वार्षिकोत्सव समाजसेवामूलक कार्यका साथ मनाएको छ । वार्षिकोत्सवको अवसरमा आईतवार समाजले दलित बस्तीमा पुगेर छठ ब्रतालुहरूलाई साडी तथा छठ पूजाका सामग्री वितरण गर्दै शुभकामना अर्पण कार्यक्रम आयोजना गरेको हो।
कार्यक्रम अन्तर्गत समाजले कालिकामाई गाउँपालिका–१, गोपालपुरस्थित माझी समुदायका करिब ५० घरपरिवारलाई लुगा, मैदा, चिनी, रिफाइन तेल, अगरबत्ती, सलाही लगायतका पूजाका सामग्री वितरण गरेको समाजका अध्यक्ष आकाश चौरसियाले जानकारी दिए।
अध्यक्ष चौरसियाका अनुसार संस्थाले आफ्नो दोस्रो वर्ष पूरा गरी तेस्रो वर्षमा प्रवेश गरेको अवसरमा यो कार्यक्रम आयोजना गरिएको हो। उनले भने, “हाम्रो संस्था समाजसेवा, सहकार्य र समृद्ध समाज निर्माणको लक्ष्यसहित निरन्तर क्रियाशील छ। यो कार्यक्रमका लागि कुनै बाह्य सहयोग नलिई आफ्नै सदस्यहरूको योगदानबाट व्यवस्थापन गरिएको हो।”
अध्यक्ष आकाश चौरसियाको अध्यक्षतामा सम्पन्न कार्यक्रममा वरिष्ठ उपाध्यक्ष आकाश केवट, उपाध्यक्ष भरत साह, सचिव विकास पटेल, कोषाध्यक्ष बुलेट तिवारी, इलाका प्रहरी कार्यालय बिरञ्चीबर्वाका प्रहरी सहायक निरीक्षक जगमोहन साह कानु, संस्थापक सदस्यहरू राकेश सर्राफ, मोहन महतो, रमेश चौरसिया, चन्द्रशेखर पटेल, दिपेन्द्र गुप्ता, सुदिप चौरसिया लगायत समाजका सदस्यहरूको उपस्थिति थियो।
कार्यक्रमले समाजमा सहकार्य, सेवा र सामुदायिक एकताको सन्देश फैलाएको सहभागीहरूले बताएका छन्।
