वीरगंज । जगरनाथपुर गाउँपालिकाले हिन्दुहरुको महान चाँड छठ पर्व २०८२ को अवसरमा गाउँपालिका क्षेत्रभित्र तीन दिनका लागि मासु, माछा, मदिरा र अन्य नशालु पदार्थहरू उत्पादन, बिक्री, ओसारपसार, भण्डारण र सेवनमा पूर्ण प्रतिबन्ध लगाएको छ।
गाउँपालिका अध्यक्ष श्रीकान्त प्रसाद यादवद्वारा जारी सूचना अनुसार यही कार्तिक ८ गतेदेखि १० गतेसम्मका लागि स्थानीय सरकार सञ्चालन ऐन, २०७४ को परिच्छेद ३ बमोजिम यो निर्णय लागू हुने जनाइएको छ।
छठ पर्वको धार्मिक, सांस्कृतिक मर्यादा, पवित्रता र सुरक्षालाई मध्यनजर गर्दै यो निर्णय गरिएको गाउँपालिकाले जनाएको छ। साथै, सो अवधिमा प्रतिबन्ध उल्लङ्घन गर्ने व्यक्तिहरूमाथि प्रचलित कानुन अनुसार कारबाही हुने चेतावनीसमेत सूचना मार्फत दिइएको छ।
सूचना बोधार्थका लागि जिल्ला प्रशासन कार्यालय पर्सा, जिल्ला प्रहरी कार्यालय, ईलाका प्रहरी कार्यालय पोखरिया, सशस्त्र प्रहरी बल गुल्म र प्रहरी चौकीहरूलाई समेत पठाइएको छ ।
