वीरगंज । सशस्त्र प्रहरी बल, नेपालले पर्साको विभिन्न स्थानमा सञ्चालन गरेको नियमित गस्ती तथा निगरानीका क्रममा ६ लाख २४ हजार ५० रुपैया बराबरको अबैध सामान तथा मोटरसाइकल बरामद गरी आवश्यक कारबाहीका लागि बीरगंज भन्सार कार्यालयमा बुझाएको छ ।
सशस्त्र प्रहरी बल, नेपाल बोर्डर आउट पोष्ट प्रसौनीभाठ्ठाबाट खटिएको टोलीले बिहिबार बिन्दवासिनी गाउँपालिका–५ प्रसौनीभाठ्ठा नजिक भारतबाट भन्सार छली टाउकोमा बोकी नेपालतर्फ ल्याउँदै गरेको करिब रु.२ लाख ७६ हजार ३४० बराबरको कपडा बरामद गरेको थियाे । बरामद गरिएको सामान शुक्रबार बीरगंज भन्सार कार्यालयमा बुझाइएको सशस्त्र प्रहरीले जनाएको छ ।
त्यसैगरी, सशस्त्र प्रहरी बल, नेपाल नं.१३ गण हे.क्वा. पर्साबाट खटिएको अर्को टोलीले धोविनी गाउँपालिका–१ जानकीटोला नजिक भारतबाट अबैध रुपमा भन्सार छली मोटरसाइकलमा लोड गरी ल्याउँदै गरेको ७३ हजार ५०० बराबरको किराना तथा कस्मेटिक सामान बरामद गरेको छ । उक्त घटनामा संलग्न व्यक्ति मोटरसाइकल छाडी फरार भएको प्रहरीले जनाएको छ।
यस्तै, शुक्रबार सशस्त्र प्रहरी बल, नेपाल बोर्डर आउट पोष्ट अमरपट्टीबाट खटिएको टोलीले बिन्दवासिनी गाउँपालिका–३ झौवा नजिक नेपालबाट भारततर्फ लैजादै गरिएको रु.४ हजार २१० बराबरको स्याउ र उक्त कार्यमा प्रयोग भएको २ लाख ७० हजार रुपैया बराबरको मोटरसाइकल नियन्त्रणमा लिएको छ ।
बरामद गरिएको सम्पूर्ण सामान र मोटरसाइकल आवश्यक कारबाहीका लागि बीरगंज भन्सार कार्यालयमा बुझाइएको सशस्त्र प्रहरी बल नेपाल नं. १३ गण, पर्साका सूचना अधिकारी सशस्त्र प्रहरी नायव उपरीक्षक विश्वराज योन्जनले जानकारी दिए ।
