वीरगंज । निजी तथा आवासीय विद्यालय संगठन (प्याब्सन) वीरगंज महानगर समितिले विभिन्न मागसहित वीरगंज महानगरपालिकालाई औपचारिक ज्ञापनपत्र बुझाएको छ।

नगर प्रमुख राजेशमान सिंह, प्रशासकीय अधिकृत अरविन्दलाल कर्ण र शैक्षिक प्रशासन महाशाखा प्रमुख आनन्द लामिछानेलाई संयुक्त रूपमा ज्ञापनपत्र बुझाइएको हो। प्याब्सन वीरगंज महानगर समितिका अध्यक्ष राहुल श्रीवास्तवका अनुसार, अहिले प्याब्सनसँग आबद्ध अधिकांश निजी विद्यालयहरूमा पिउने पानीको अभाव भएको भन्दै तत्काल समाधानका लागि विकल्प खोज्न महानगरसँग माग गरिएको हो।

श्रीवास्तवले भने, “महानगरभित्र सबैभन्दा बढी विद्यार्थी संख्याका विद्यालयहरू प्याब्सनमा आबद्ध छन्। त्यसैले विद्यार्थीको स्वास्थ्य र शिक्षाको गुणस्तर कायम राख्न खानेपानीको व्यवस्था महानगरको जिम्मेवारी हो।”

साथै, २०८१/८२ को आर्थिक वर्षअन्तर्गत व्यवसाय कर, घरबहाल कर, सम्पत्ति कर तथा फोहोर व्यवस्थापन कर चालु महिना भित्र तिर्ने तयारी प्याब्सनले गरिरहेको जानकारी गराउँदै, कुनै कारबाही नगर्न महानगरलाई आग्रह गरिएको सचिव अमित आलोकले जानकारी दिए।

ज्ञापनपत्रमा शिक्षा क्षेत्रमा निजी विद्यालयहरूको योगदानलाई सम्मान गर्दै आगामी दिनमा महानगरसँग अझ प्रभावकारी समन्वय र सहयोगको वातावरण निर्माण गर्नुपर्ने उल्लेख छ।

प्याब्सनको यो कदम निजी शिक्षण संस्थाहरूको आधारभूत आवश्यकताहरूप्रति स्थानीय सरकारको ध्यानाकर्षण गराउन र समस्या समाधानमा अग्रसर गराउन गरिएको पहलका रूपमा हेरिएको छ ।