जनकपुरधाम । मधेश प्रदेशका मुख्यमन्त्री जितेन्द्र सोनलको विश्वासको मतमा संकट उत्पन्न भएको छ। आजको प्रदेशसभा बैठकमा सत्ता पक्षका ५४ जना सांसद उपस्थित भए पनि नेकपा (माओवादी केन्द्र) का दुई सांसदले सदनमै विद्रोह गरेपछि मुख्यमन्त्री सोनलले विश्वासको मत नपाउने स्थिति बनेको हो।
विश्वासको मतका लागि आवश्यक बहुमत ५४ रहेको मधेश प्रदेशसभामा हाल मत विभाजन प्रक्रिया केहीबेरका लागि रोकिएको छ । कुल १०७ सदस्यीय सभामा जनमतबाट जनस्वराज पार्टीमा सनाखत गरेका निवर्तमान मुख्यमन्त्री सतिशकुमार सिंह र त्रिभुवन शाह आजको बैठकमा अनुपस्थित छन्।
सत्ता गठबन्धनमा लोसपा (८), जसपा नेपाल (१८), जनमत पार्टी (१३), नेकपा (माओवादी केन्द्र) (९) र एकीकृत समाजवादी (७) गरी जम्मा ५५ सांसद छन्। नागरिक उन्मुक्ति पार्टीले मुख्यमन्त्री सोनललाई विश्वासको मत दिने निर्णय गरिसकेको छ। तर संघीय समाजवादी पार्टीकी सांसद विमला अन्सारी अनुपस्थित रहेकी छन्।
यसबीच माओवादी केन्द्रका प्रदेश सांसद रहबर अन्सारी र माला राईले सदनमै खुलेर विद्रोह गर्दै मुख्यमन्त्री सोनलको नेतृत्वमा अविश्वास जनाएका छन्। यस घटनासँगै मधेश प्रदेशमा पुनः राजनीतिक अस्थिरता गहिरिएको देखिएको छ।
