वीरगंज । भारतको विहार राज्यमा यहि कार्तिक २५ गते (11th November) मा हुने विधान सभा निर्वाचनलाई मध्यनजर गर्दै पर्सा जिल्लाका नेपाल–भारत सीमा नाकाहरू अस्थायी रूपमा बन्द भएको छ।
जिल्ला प्रशासन कार्यालय, पर्साद्वारा जारी सूचनाअनुसार मिति २०८२।०७।२२ गतेदेखि २०८२।०७।२५ गते साँझ ६:०० बजेसम्म सीमावर्ती नाकाहरूमा अत्यावश्यक बाहेक आवतजावतमा रोक लगाइनेछ। निर्वाचनको दिन अर्थात् मिति २०८२।०७।२५ गते साँझ ६:०० बजेसम्म सीमावर्ती नाकाहरूमा पूर्ण रूपमा आवागमन रोक लगाइने जनाइएको छ।
नेपाल–भारत सीमावर्ती जिल्ला समन्वय बैठक (BDCC Meeting) मा भएको समझदारीअनुसार यो व्यवस्था लागू गर्न लागिएको हो। पर्सा जिल्ला र भारतको पूर्वी चम्पारण जिल्लासँग जोडिएका मुख्य नाकाहरू सहित अन्य साना नाकाहरूमा समेत यो निर्णय लागू हुने जिल्ला प्रशासन कार्यालयले जनाएको छ।
जिल्ला सुरक्षा समितिको निर्णयअनुसार लागू गरिएको यो कदम सीमाक्षेत्रमा सुरक्षात्मक दृष्टिले महत्त्वपूर्ण हुने जनाइएको छ।
सहायक प्रमुख जिल्ला अधिकारी सुमन कुमार कार्कीले हस्ताक्षर गरेको सूचनामा यस अवधिमा अनावश्यक आवतजावत नगर्न सम्बन्धित सबैलाई अनुरोध गरिएको छ।
