वीरगंज । वीरगंज महानगरपालिका–२८ सिधुवाटोलस्थित छठिघाट नजिकको पोखरीमा डुबेर एक १२ वर्षीय बालकको मृत्यु भएको छ । मृत्यु भएको बालकको शव सशस्त्र प्रहरीले उद्धार गरेको हो ।
शुक्रबार बिहान १०:०० बजेतिर बारा जिल्लाको विश्रामपुर गाउँपालिका–५ मुसहरवा बस्ने कन्हाई साहका छोरा शनि कुमार साह डुबेको जानकारी स्थानीयवासीले दिएका थिए । सो जानकारीपछि सशस्त्र प्रहरी बल नेपाल बेश क्याम्प बेलवाबाट सशस्त्र प्रहरी नायव निरीक्षक लोकबहादुर कार्कीको कमाण्डमा पाँच जनाको टोली र सशस्त्र प्रहरी बल नेपाल नं.१३ गण मुख्यालय पर्साबाट सशस्त्र प्रहरी सहायक निरीक्षक संजिव यादवको कमाण्डमा सात जनाको विपद् उद्धार टोली खटिएको थियो ।
उद्धार टोलीले खोजीकार्यपछि बालकको शव पोखरीबाट बाहिर निकालेर आवश्यक कानूनी प्रकृयाका लागि नेपाल प्रहरीलाई बुझाएको सशस्त्र प्रहरी बल नेपाल नं.१३ गण मुख्यालय, पर्साका सूचना अधिकारी विश्वराज योन्जनले जानकारी दिए ।
सो क्रममा वडा प्रहरी कार्यालय बिर्ताबाट प्रहरी निरीक्षक नविन थापाको कमाण्डमा समेत टोली खटिएको थियो ।
