वीरगंज । ट्रिगर आउट फिटनेस जिमको आयोजनामा शनिबार रक्तदान कार्यक्रम सम्पन्न भएको छ । सामाजिक उत्तरदायित्वअन्तर्गत आयोजित उक्त कार्यक्रममा १४ महिला सहित ५० जनाले रक्तदान गरेको रक्त सञ्चार केन्द्र वीरगंजले जनाएको छ।
कार्यक्रम ट्रिगर आउटका फाउन्डर अरमान सहानी र डाइरेक्टर श्याम अग्रवालको पहलमा सम्पन्न गरिएको हो । कार्यक्रममा नेपाल रेडक्रस सोसाइटी वीरगंजका अध्यक्ष बृजकिशोर पटेल र नेपाल इनोभेन्ट सोसाइटी वीरगंजका अध्यक्ष कमल चौगाईले रक्तदाताहरुलाई प्रमाणपत्र वितरण गर्दै यस्ता मानवीय कार्यहरूले समाजमा सकारात्मक सन्देश फैलाउने बताएका थिए।
रक्त सञ्चार केन्द्र वीरगंजका प्रमुख सौरभराज पाण्डेको नेतृत्वमा रहेको प्राविधिक टोलीले रक्त संकलन तथा व्यवस्थापनमा सहयोग पुर्याएको थियो । आयोजक अरमान सहानीले भने, “रक्तदान जीवनदान हो, यो हाम्रा फिटनेस सदस्यहरू र समाजका युवाहरूका लागि गर्वको विषय हो। आगामी दिनमा पनि यस्ता सामाजिक अभियानलाई निरन्तरता दिइनेछ।”
कार्यक्रममा स्थानीय युवाहरू, जिमका सदस्य, समाजसेवी राजेन्द्र भट्टराई तथा विभिन्न संघ–संस्थाका प्रतिनिधिहरूको सक्रिय सहभागिता रहेको थियो।
