वीरगंज । लोकतन्त्रको महापर्व आगामी निर्वाचनलाई लक्षित गर्दै जनमत पार्टीले मतदाता दर्ता अभियानलाई गाउँ–गाउँ र टोल–टोलसम्म पुर्याउने उद्देश्यका साथ ‘घर–घर जनसन्देश’ अभियान सुरु गरेको छ।
पार्टीले वीरगंज महानगरपालिका–१६ का नगवा र फुलवारी टोलमा शुक्रबार उत्प्रेरणामूलक घरदैलो कार्यक्रम सम्पन्न गरेको हो। सो क्रममा जनमत पार्टीका कार्यकर्ताहरूले स्थानीय बासिन्दासँग भेटघाट गर्दै मतदाता नामावलीमा आफ्नो नाम अनिवार्य रूपमा दर्ता गराउन र आगामी निर्वाचनमा सक्रिय रूपमा सहभागी हुन आग्रह गरे।
जनमत पार्टी पर्साका अध्यक्ष ओमप्रकाश सर्राफका अनुसार, “लोकतन्त्रको महापर्वमा कुनै पनि नागरिक मताधिकार प्रयोगबाट वञ्चित नहोस् भन्ने उद्देश्यले यो घरदैलो अभियान सञ्चालन गरिएको हो।”
कार्यक्रममा पार्टीका नेता भुपेन्द्र साह, युवा दस्ताका जिल्ला अध्यक्ष मनोज साह, उपाध्यक्ष रोषण पान्डे, दलित जिल्ला अध्यक्ष नरेश राम, जिल्ला सदस्यहरू सत्जिव साह र तुलसी राम, क्षेत्रीय संयोजक डा. मनोज साह, निखिल चौरसिया, सुमित सिंह, मन्जय साह लगायतको सक्रिय सहभागिता रहेको थियो।
यो अभियान अहिले पर्साका गाउँ–गाउँ र बस्ती–बस्तीमा विस्तार हुँदै गएको छ। पार्टीले जनचेतनाको यो पहललाई निरन्तरता दिने र सबै नागरिकलाई मतदाता सूचीमा समेट्ने तयारी गरिरहेको जनाएको छ।
जनमत पार्टीले लोकतान्त्रिक सहभागिता र सचेत मतदाताको निर्माणलाई दीर्घकालीन लक्ष्यका रूपमा लिएको बताएको छ।
