काठमाडौँ । आम जनता पार्टीका अध्यक्ष तथा पूर्वमन्त्री प्रभु साहले नेकपा (एमाले) का अध्यक्ष केपी शर्मा ओलीमाथि आगामी २१ फागुनमा हुने चुनाव भाँड्नका लागि नयाँ–नयाँ नाटक मञ्चन गरिरहेको आरोप लगाएका छन्। उनले चुनाव हुन नदिन गरिएको कुनै पनि षड्यन्त्रविरुद्ध जनस्तरबाट प्रतिवाद गर्नुपर्ने बताएका छन्।
शनिबार काठमाडौँमा आयोजित अन्तरक्रियात्मक कार्यक्रममा बोल्दै साहले प्रतिनिधिसभा पुनर्स्थापना गर्ने नाममा ओलीले आफ्नै दलका नेताहरूसँग हस्ताक्षर सङ्कलन अभियान चलाउन लगाएको भन्दै उनलाई चुनावबाट नभाग्न चेतावनी दिए।
साहले भने, “जेन-जि आन्दोलनमा युवाहरूको छाती र टाउकोमा गोली हान्नेहरूले नै आज चुनाव हुन नदिने भन्दै चुनौती दिन थालेका छन्।” उनले ओलीको ‘दम्भकारी शासन र अहंकार’ जनताले युवाहरूको बलमा परास्त गरेको र त्यसैले एमाले अहिले चुनावको सामना गर्न डराएको टिप्पणी गरे।
साहले जेन-जि आन्दोलनका क्रममा मारिएका युवाहरूका हत्यारामाथि कारबाही प्रक्रिया अघि नबढेकोप्रति असन्तोष जनाउँदै सरकार र अपराधीबीचको “नेक्ससको गन्ध” आएको बताए।
त्यसक्रममा उनले गृहमन्त्री ओमप्रकाश अर्याललाई “सस्तो लोकप्रियता खोज्ने” व्यक्ति भन्दै आलोचना गरे। “पूर्वराष्ट्रपतिहरूको जलेको घर हेरेर फोटो प्रचार गर्नेभन्दा जेन-जि हत्यारामाथि कारबाही गर्नु नै मन्त्रीको जिम्मेवारी हो,” उनले भने।
साहले आन्दोलनकारीहरूलाई छानीछानी पक्राउ गर्ने तर हत्याराहरूलाई उन्मुक्ति दिने प्रवृत्ति चलाइएको आरोप लगाए। उनले सुशीला कार्की नेतृत्वको सरकारमाथि समेत जेन-जि आन्दोलनको गौरव धुमिल पार्न खोजेको शंका व्यक्त गर्दै भने, “सरकार जसरी पनि २१ फागुनमा चुनाव गराउने दायित्वबाट नभागोस्, यही जनताको माग हो।”
