वीरगंज । पर्साकाे पर्सागढी नगरपालिकाका विभिन्न विद्यालयमा अध्ययनरत आर्थिक रुपमा कमजोर रहेका जेहेन्दार विद्यार्थीहरुलाई यूवालयको सहकार्यमा अध्ययन सामग्री वितरण कार्यक्रम सम्पन्न भएको छ ।

नगर प्रमुख गोकर्ण पाठककाे प्रमुख आतिथ्यतामा यूवालयले एक वर्षका लागि आवश्यक पर्ने कापी, कलम, कटर, इरेजर, औजार बक्स, झोला, क्याल्कुलेटर लगायत १६ प्रकारका अध्ययन सहयोग सामग्री वितरण गरेका छन्।

यो कार्यक्रम हालसम्म ८ वटा विद्यालय र बाल क्लबका १६ जना विद्यार्थीले सामग्री प्राप्त गर्ने गरी प्रबन्ध गरिएको छ। बाँकी विद्यार्थीहरुलाई विद्यालय खुलेपछि अध्ययन सामग्री वितरण गरिने यूवालयका पर्सा जिल्ला संयोजक राहुल कुमार साहले जानकारी दिए।

यस प्रकारको सहयोगले आर्थिक रुपमा कमजोर विद्यार्थीहरुमा अध्ययनमा प्रोत्साहन बढाउने अपेक्षा गरिएको छ। यूवालयले आगामी दिनहरुमा पनि यस्ता कार्यक्रमलाई निरन्तरता दिने प्रतिबद्धता व्यक्त गरेको छ।

वीरगंज । सगरमाथा स्कूल, वीरगंज–१२, मुर्लीस्थित ब्लक ‘बी’ शुक्रबार रक्षा बन्धनको अवसरमा भव्य कार्यक्रम सम्पन्न गरिएको छ । नेपाली संस्कृति, भाइचारा र आपसी सम्बन्ध प्रगाढ बनाउने उद्देश्यले हरेक वर्ष आयोजना हुने यो कार्यक्रम यस वर्ष पनि विद्यार्थीहरूको सक्रिय सहभागिता र रचनात्मक प्रस्तुतिसहित सम्पन्न भएको हो ।

कार्यक्रमको अध्यक्षता सगरमाथा स्कूलका संस्थापक निर्देशक तथा नेशनल प्याब्सन वीरगंजका नगर अध्यक्ष जियालाल गुप्ताले गरेका थिए । साे अवसरमा वाेल्दै उनले विद्यार्थीहरूलाई संस्कार, परम्परा र आधुनिक शिक्षाबीच सन्तुलन कायम राख्दै अघि बढ्न प्रेरित गर्ने गतिविधिहरूमा सहभागी हुन आग्रह गरे ।

पत्रकार राजेन्द्र सिंह राजपूतकाे विशेष उपस्थितीमा भएकाे कार्यक्रमकाे निर्णायकको भूमिकामा मुकेश महतो, पत्रकार दिपु वर्णवाल, करिश्मा शाह र डाइमेंशन स्कूलका संस्थापक बसन्त चौधरी रहेका थिए ।

प्रतियोगितामा सीनियरतर्फ ब्लु हाउसले पहिलो र दोस्रो दुवै स्थान जित्दा, रेड हाउसले तेस्रो स्थान प्राप्त गर्‍यो । जुनियरतर्फ ब्लु हाउसकी रोशनी साह पहिलो, रेड र ग्रिन हाउस संयुक्त रूपमा दोस्रो, र ग्रिन हाउस तेस्रो स्थानमा रहे । प्रतिस्पर्धात्मक प्रस्तुति, सौन्दर्य, रचनात्मकता र संस्कारका आधारमा मूल्यांकन गरिएका प्रस्तुतिहरूले कार्यक्रमलाई अझ आकर्षक बनाएका थिए ।

विजयी विद्यार्थीहरूलाई प्रमुख अतिथि र निर्णायक मण्डलबाट प्रमाणपत्र तथा शिल्ड प्रदान गरिएको थियो । कार्यक्रमको आकर्षक उद्घोषणा विद्यालयका को–अर्डिनेटर सञ्जीव यादवले गरेका थिए । उनले विद्यार्थीहरूलाई नेपाली संस्कृतिको मूल्य बुझ्दै त्यसको संरक्षणमा लाग्न आग्रह गरे ।