वीरगंज । नेकपा एमालेको ११औं महाधिवेशनको उद्घाटन समारोहमा सहभागी हुन वीरगंजबाट ठूलो संख्यामा कार्यकर्ताहरू काठमाडौँ जान तयारी भइरहेको छ । वीरगंज महानगर कमिटीको अगुवाईमा दुई दर्जन बस र एक दर्जन इभि भ्यान काठमाडौँतर्फ प्रस्थान गर्ने तयारी भएको महानगर कमिटीका लेखा समिति अध्यक्ष अजय साहले जानकारी दिए।
उनका अनुसार आगामी मंसिर २७ गते वीरगंजबाट उक्त सवारी साधनमार्फत दुई हजार भन्दा बढी नेता तथा कार्यकर्ता महाधिवेशनको उद्घाटन समारोहमा सहभागी हुन प्रस्थान गर्नेछन्। एमालेको महाधिवेशनलाई भव्य र ऐतिहासिक बनाउन वीरगंज महानगरपालिकाकाे विभिन्न वडाबाट पनि उल्लेख्य सहभागिता रहने कमिटीले जनाएको छ।
अध्यक्ष साहका अनुसार आवश्यक समन्वय, यातायात व्यवस्था र व्यवस्थापनका सबै तयारी पूरा भइसकेका छन् । सहभागी हुने कार्यकर्ताहरूको सूचि पनि अन्तिम तयारीमा रहेको र सुरक्षा तथा आवास व्यवस्थापनसमेत सुनिश्चित गरिएको उनले बताए ।
एमालेको ११औं महाधिवेशन काठमाडौंमा हुँदैछ, जहाँ देशभरबाट हजारौं कार्यकर्ता र प्रतिनिधिहरू सहभागी हुने अपेक्षा गरिएको छ।
