वीरगंज । सशस्त्र प्रहरीले पर्साकाे ठोरी गाउँपालिका–४ निर्मल बस्तीबाट ९१ के.जि. प्रतिबन्धित लागु औषध गाँजा बरामद गरेको छ।
सशस्त्र प्रहरी बल पर्साले सिमावर्ती क्षेत्रमा हुने चोरी–तस्करी तथा लागू औषध ओसारपसार नियन्त्रण गर्ने अभियानलाई तीव्रता दिँदै आएको छ । बिहिबार सीमा सुरक्षा टोली सुवर्णपुरबाट खटिएको टोलीले ९–१० जना व्यक्तिहरूलाई नाम्लो लगाएर ढाँडमा बोकी नेपालबाट भारततर्फ लैजाँदै गरेको अवस्थामा १० वटा प्लास्टिकको पोका नियन्त्रणमा लिएको थियो।
पोका खोली निरीक्षण गर्दा सबैमा लागू औषध गाँजा भएको पुष्टि भएको थियो । बरामद भएको गाँजाको कुल तौल ९१ के.जि. रहेको छ । बरामद गाँजा आवश्यक प्रक्रिया पूरा गरी ईलाका प्रहरी कार्यालय ठोरीमा बुझाइएको सशस्त्र प्रहरी बल नेपाल, नम्बर १३ गण हे. क्वा सुचना अधिकार डिएसपी विश्वराज योन्जनले जानकारी दिए ।
उनका अनुसार लागू औषध ओसारपसार र प्रयोगले समाजमा दुरगामी नकारात्मक प्रभाव पार्ने भएकाले सशस्त्र प्रहरीले यस किसिमका नियन्त्रण गतिविधि प्रभावकारी रूपमा सञ्चालन गरिंदै आएको छ ।
