वीरगंज । मधेश प्रदेशका युवा, खेलकुद तथा समाज कल्याणमन्त्री प्रमोद जयसवालले बुद्ध एयरलाइन्सप्रति यात्रु सुविधा सम्बन्धी गुनासो सार्वजनिक गरेका छन् । उनले सामाजिक सञ्जाल फेसबुकमार्फत बुद्ध एयरको U-4560 नम्बरको विमानमा एयर कन्डिसन (AC) बिग्रिएर यात्रुहरू अत्याधिक गर्मी सहन बाध्य भएको जानकारी दिएका हुन् ।
मन्त्री जयसवालका अनुसार, सिमराबाट काठमाडौं उडानको क्रममा विमानभित्र AC ले काम नगर्दा यात्रुहरूलाई आकाशमै ठूलो असुविधा भएको थियो । बुझ्दा चार दिनदेखि AC बिग्रिएको थाहा पाइएको उनले उल्लेख गरेका छन् ।
विमान अवतरणलगत्तै उनले बुद्ध एयरको व्यवस्थापनलाई फोन गरी यस्तो गैरजिम्मेवार व्यवहारबारे प्रश्न गरेका थिए । साथै, तत्कालै समस्या समाधान गर्ने प्रतिबद्धता व्यवस्थापनले जनाएको उनले जानकारी दिए । जयसवालले संस्कृति, पर्यटन तथा नागरिक उड्डयन मन्त्रीलाई समेत यो समस्या बारे जानकारी गराइसकेका छन् ।
यसअघि पनि आन्तरिक उडानका यात्रुहरूले बुद्ध एयरमा सेवा सुविधासम्बन्धी असन्तुष्टि प्रकट गर्दै आएका छन् ।
