वीरगंज । स्वास्थ्य तथा जनसङ्ख्यामन्त्री प्रदीप पौडेलले वीरगंजकाे नारायणी अस्पतालमा झाडापखाला र हैजाका बिरामीलाई निःशुल्क औषधि र उपचार उपलब्ध गराउन अस्पताल प्रशासनलाई निर्देशन दिएका छन् ।

मन्त्री पौडेलले अस्पतालमा उपचाररत बिरामीसँग सेवा र गुनासाबारे जानकारी लिँदै कुनै पनि बिरामीले औषधि किन्न नपर्ने व्यवस्था मिलाउन आग्रह गरे । साथै, औषधि अभाव नहोस् भनी तीनै तहका सरकारसँग समन्वय गरी आवश्यक जनशक्ति र सामग्री उपलब्ध गराइने प्रतिबद्धता व्यक्त गरे ।

मधेस प्रदेशका भूमि व्यवस्था, कृषि तथा सहकारी मन्त्री जनार्दनसिंह क्षत्रीले दीर्घकालीन योजना सहित अस्पतालमा औषधि उपलब्ध गराइरहेको जानकारी दिए । वीरगंज महानगरपालिका प्रमुख राजेशमान सिंहले एकद्वार प्रणालीबाट उपचार र औषधि वितरणमा जोड दिए ।

नारायणी अस्पतालका मेडिकल सुपरिटेन्डेन्ट चुमनलाल दासका अनुसार हाल ४८ जना बिरामीको उपचार भइरहेको छ भने प्रादेशिक अस्पताल गौर र कलैयाँबाट चिकित्सकसहितको टोली सेवा दिइरहेको छ । स्वास्थ्य कार्यालयका जनस्वास्थ्य अधिकृत जयमोद ठाकुरका अनुसार हालसम्म २५४ जना बिरामी दर्ता भएका छन्, जसमा १०३ जना उपचाररत, १२४ जना घर फर्किसकेका, र २२ जना आइसियुमा रहेका छन्।

वीरगंज । हैजाको संक्रमण नियन्त्रणलाई प्रभावकारी बनाउन वीरगंज महानगर प्रमुख राजेशमान सिंहले प्रभावित क्षेत्रमा जथाभावी औषधि वितरण नगरी एकद्वार नीति अवलम्बन गर्न निर्देशन दिएका छन् । उनले हैजालाई “हौवा” बनाएर व्यापार नगर्न सबैलाई आग्रह पनि गरेका हुन् ।

नीजि अस्पतालहरूले परीक्षणको नाममा किट बिक्री गर्ने प्रयास गरेको उल्लेख गर्दै प्रमुख सिंहले सरकारले नै निशुल्क किट उपलब्ध गराउने स्पष्ट पारे ।

वीरगंजमा आयोजित अन्तरक्रियात्मक छलफलमा स्वास्थ्य मन्त्रालय, विश्व स्वास्थ्य संगठन (WHO), युनिसेफ, प्रदेश स्वास्थ्य निर्देशनालय र महानगर स्वास्थ्य शाखाका प्रतिनिधिहरूसँग छलफल गर्दै सिंहले हैजा नियन्त्रणका सबै कार्य एकीकृत प्रयासमार्फत अघि बढाउनुपर्नेमा जोड दिए ।

स्वास्थ्य मन्त्रालयका जनस्वास्थ्य प्रशासक विशाल सुवेदीले सरकारी स्वास्थ्य संस्थालाई उपचारको मुख्य केन्द्र बनाउनुपर्ने धारणा राख्दै, निजी अस्पतालहरूले पनि समान मापदण्ड अपनाउनुपर्ने बताए । यसका लागि मन्त्रालयको टोलीले निजी अस्पतालहरूको अनुगमन गर्ने र आइसियुमा उपचाररत विरामीहरूको अवस्थाबारे प्रत्यक्ष जानकारी लिने तयारी रहेको जानकारी दिए ।

त्यसैगरी, स्वास्थ्य सेवा विभागका सरुवा रोग शाखा प्रमुख डा. प्रविण झाले हैजाको परीक्षण बारम्बार आवश्यक नहुने प्रष्ट पार्दै, बिरामीमा एक पटक हैजा पुष्टि भएपछि अन्य बिरामीमा त्यस्तै लक्षण देखिए उपचारमा सीधा ध्यान दिन आग्रह गरे ।

यसैबीच, हैजाको अवस्था प्रत्यक्ष अवलोकन गर्न स्वास्थ्य मन्त्री प्रदीप पौडेल आज दिउँसो वीरगंज आइपुगेका छन् । उनले  नारायणी अस्पताल पुगेर निरीक्षण गर्ने र त्यसपछि महानगर तथा सरोकारवालाहरूसँग छलफल गर्ने तय भएको छ।

स्वास्थ्य मन्त्रालय र स्वास्थ्य सेवा विभागको उच्चस्तरीय टोली भने हिजोदेखि नै वीरगंजमा खटिएको छ र हैजा नियन्त्रण तथा उपचारका गतिविधि नजिकैबाट अनुगमन गरिरहेको छ ।