वीरगंज । पछिल्ला दिनमा हैजाको सङ्क्रमण बढ्दै गएपछि वीरगंज महानगरपालिकाले अत्यावश्यक सतर्कता स्वरूप विद्यालय बन्द गर्ने निर्णय गरेको छ। महानगरको शैक्षिक प्रशासन महाशाखाले जारी गरेको विज्ञप्तिअनुसार भाद्र ८ र ९ गते (आइतबार र सोमबार) दुई दिनका लागि महानगरपालिका अन्तर्गतका सम्पूर्ण सामुदायिक तथा संस्थागत विद्यालयहरूको पठनपाठन स्थगित गरिएको हो।

सूचनामा भनिएको छ, “हैजाको सङ्क्रमणलाई मध्यनजर गर्दै विद्यालयहरूमा पठनपाठन अस्थायी रूपमा रोकिएको छ।” साथै विद्यार्थी, अभिभावक तथा शिक्षकहरूलाई सतर्कता अपनाउन आह्वान गरिएको छ।

महानगरले सुरक्षित स्वास्थ्य अभ्यासमा जोड दिँदै सबैलाई पानी उमालेर मात्र पिउन, शौचालय प्रयोगपछि अनिवार्य रूपमा साबुनपानीले हात धुन, काँचै खाने तरकारी तथा सागपात तातोपानीले धोएर मात्र खाने, सरसफाइ कायम राख्ने र अन्य सावधानी अपनाउन अनुरोध गरेको छ।

महानगरले हैजाको जोखिम कम गर्न सामूहिक सहयोग आवश्यक भएको भन्दै सचेत रहन सबैलाई आग्रह गरेको छ।

वीरगंज । वीरगंज महानगरपालिका–१२ मुर्लीको नयाँ टोलमा हैजाका बिरामी भेटिएपछि रोकथाम तथा नियन्त्रणका लागि महानगरले शुक्रबार रातिदेखि नै स्वास्थ्यकर्मीको टोली परिचालन गरेको छ।

संक्रमणको जानकारी पाएलगत्तै महानगर प्रमुख राजेशमान सिंहले टोलीलाई तत्काल प्रभावित क्षेत्रमा खटाउन निर्देशन दिएका थिए। निर्देशनअनुसार टोली रातिदेखि नै संक्रमित क्षेत्रमा पुगेर अवस्थाको जानकारी लिनुका साथै स्थानीयलाई सतर्क गराउने कार्य थालेको हो।

महानगरका अनुसार मुर्ली टोलका करिब ३० जना बासिन्दा झाडापखालाका कारण वीरगंजको तराई हस्पिटलमा भर्ना भएका थिए। एकैपटक ठूलो संख्यामा बिरामी आएपछि अस्पतालले शंका व्यक्त गर्दै महानगरलाई खबर गरेको थियो। त्यसपछि नारायणी अस्पताल र जिल्ला जनस्वास्थ्य कार्यालयसँगको समन्वयमा गरिएको परीक्षणमा तीन जनामा हैजाको जीवाणु भिब्रियो कोलेरा पाइएको हो। संक्रमितमध्ये १६ वर्षीय बालक, २४ वर्षीय युवक र २४ वर्षीय महिला रहेका छन्। तीमध्ये बालकको अवस्था गम्भीर रहेको महानगर स्वास्थ्य शाखा प्रमुख राजु शाहले जानकारी दिएका छन्।

यसैबीच, मुर्ली टोलमा प्रयोग भइरहेको पिउने पानीको नमुना थप परीक्षणका लागि काठमाडौंको टेकुस्थित स्वास्थ्य विज्ञान प्रयोगशालामा पठाइएको छ।

हैजा फैलिन नदिन र स्थानीयलाई सतर्क बनाउन महानगरले घर–घरमा पुगेर सचेतना अभियान सुरु गरेको छ। टोलीले हैजाबाट जोगिने उपायहरूबारे जानकारी दिँदै शंकास्पद बिरामी भेटिए तत्काल नजिकैको स्वास्थ्य संस्थामा लैजान आग्रह गरेको छ। अभियानमा जिल्ला जनस्वास्थ्य कार्यालयका अधिकृत जयमोद ठाकुर र महानगरका जनस्वास्थ्य अधिकृत सुमनचन्द्र ठाकुरलगायत सक्रिय छन्।

जनस्वास्थ्य अधिकृत ठाकुरका अनुसार, पर्सा जिल्लामा पछिल्लो १० वर्षयता पहिलोपटक हैजाको प्रकोप देखिएको हो। भिब्रियो कोलेरा जीवाणु दूषित खाना वा पानीमार्फत शरीरमा प्रवेश गरेपछि हैजा लाग्ने गर्दछ। यस रोगका लक्षणमा निरन्तर झाडापखाला लाग्ने, वान्ता हुने, पेट दुख्ने, शरीरमा पानी कमी भई मांसपेसी दुख्ने र ज्वरो आउने जस्ता समस्या देखिन्छन्। समयमै उपचार नपाए मृत्यु समेत हुन सक्ने उनले चेतावनी दिएका छन्।

महानगरले सबैलाई उमालिएको वा निर्मलीकरण गरिएको पानी पिउन, तरकारी तथा हरियो सागपात उमालेको पानीले धोएर मात्र पकाएर खान, बासी खाना नखान, राम्ररी नपकाएको मासु वा माछा नखान, साबुनपानीले पटक–पटक हात धुन, भाँडाकुडा सफा राख्न र सफा शौचालय प्रयोग गर्न आग्रह गरेको छ।

महानगर प्रमुख सिंहले हैजा गम्भीर संक्रामक रोग भएकाले यसको रोकथाममा लापरबाही नगर्न सबैलाई चेतावनी दिएका छन्। उनले कुनै पनि शंकास्पद लक्षण देखिए तत्काल नजिकैको स्वास्थ्य संस्थामा सम्पर्क गर्न आग्रह गरेका छन्।

वीरगंज । जिल्ला प्रहरी कार्यालय पर्साले श्रोत नखुलेको १४ लाख १३ हजार ५०० रुपैयाँ हुण्डी रकमसहित दुई जनालाई नियन्त्रणमा लिएको छ।

विशेष सूचनाका आधारमा बिहिबार साँझ करिब ४ बजेर २० मिनेटमा वीरगंज महानगरपालिका–२, घुसुकपुर इदगाह चोक सडक खण्डमा भारतीय नम्बर प्लेट बिआर०५ एबि ७७६१ र प्रदेश २–०३–००२ प ५५४४ नम्बरका दुई मोटरसाइकल रोकी जाँच गरिएको थियो।

जाँचका क्रममा मोटरसाइकलमा फल्स सिलिङ बनाएर लुकाइ राखिएको अवस्थामा एक हजारका एक हजार थान (जम्मा रु. १० लाख) र रु. ५ सय का ८ सय २७ थान (जम्मा रु. ४ लाख १३ हजार ५००) बरामद गरिएको प्रहरीले जनाएको छ।

यसरी पक्राउ परेका व्यक्तिहरूमा वीरगंज महानगरपालिका–२, घुसुकपुर बस्ने ३९ वर्षीय संजय कुमार साह र बारा जिल्ला महागढीमाई नगरपालिका–४, बगडमपुर बस्ने ४१ वर्षीय शनि कुमार ठाकुर रहेका छन् ।

उनीहरू विरुद्ध मुलुकी अपराध संहिता, २०७४ को दफा १२५ (क) बमोजिम हुण्डी कारोबारसम्बन्धी कसुरमा पर्सा जिल्ला अदालतबाट पाँच दिनको म्याद अनुमति लिएर थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) सुबाष भट्टले जानकारी दिए ।