वीरगंज । वीरगंज महानगरपालिकाले महानगरपालिकामा कार्यरत कार्यालय सहयोगी राजु कुमार थापाको असामयिक निधनप्रति शोक व्यक्त गर्दै आज शोक विदा दिएको छ।
थापा यही पुस ६ गते सवारी दुर्घटनामा गम्भीर घाइते भई उपचाररत रहनु भएकोमा पुस १२ गते उपचारकै क्रममा निधन भएको हो। उहाँ २०५२ साल माघ १२ गतेदेखि वीरगंज महानगरपालिकामा कार्यालय सहयोगीका रूपमा नियुक्त भई लामो समयदेखि निरन्तर सेवा गर्दै आउनु भएको थियो।
दिवंगत थापाको आकस्मिक निधनले वीरगंज महानगरपालिका परिवार मात्र नभई सम्पूर्ण कर्मचारी वृत्तमा शोकको वातावरण सिर्जना भएको महानगरपालिकाले जनाएको छ। महानगरपालिकाले उहाँप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति हार्दिक समवेदना प्रकट गरेको छ।
दिवंगत थापाको शोकमा शुक्रबार बिहान ११ बजे वीरगंज महानगरपालिकाको प्रांगणमा शोक सभा आयोजना गरिएको थियो। शोक सभामा महानगर प्रमुखको उपस्थितिमा उपप्रमुख इम्तियाज आलम, प्रमुख प्रशासकीय अधिकृत अरविन्द लाल कर्ण तथा महानगरपालिकाका कर्मचारीहरूको उपस्थिति रहेको थियो।
प्रशासन प्रमुख सुनिल कर्णका अनुसार आज महानगरपालिका अन्तर्गत अत्यावश्यक सेवाहरू बाहेक सम्पूर्ण सेवाहरू बन्द रहनेछन्।
