काठमाडौं । प्रधानमन्त्री तथा मन्त्रिपरिषद्को कार्यालयले विभिन्न माग राखी विगत केही दिनदेखि अनसनरत कमल भूसाल (डा. निकोलस भूसाल) नेतृत्वको समूहसँग वार्ता गर्न वार्ता समिति गठन गरेको छ।
प्रधानमन्त्री कार्यालयले सिंहदरबारस्थित कार्यालयबाट जारी पत्रमार्फत देहायबमोजिमको वार्ता समिति गठन गरिएको जानकारी गराउँदै वार्तामा सहभागी हुन अनुरोध गरेको हो।
गठन गरिएको वार्ता समितिको संयोजकमा प्रधानमन्त्रीका प्रमुख सल्लाहकार अजयभद्र खनाल रहेका छन्।
समितिका सदस्यहरूमा प्रधानमन्त्रीज्यूका जनसम्पर्क सल्लाहकार गोबिन्द नारायण तिमिल्सिना, प्रधानमन्त्री तथा मन्त्रिपरिषद्को कार्यालयका सहसचिव डा. भीष्मकुमार भूसाल तथा जिल्ला प्रशासन कार्यालय काठमाडौंका प्रमुख जिल्ला अधिकारी ईश्वर राज पौडेल रहेका छन्।
उक्त पत्र प्रधानमन्त्री तथा मन्त्रिपरिषद्को कार्यालयका उपसचिव जीवन चन्द्र राईद्वारा हस्ताक्षरित छ। अनसनरत समूहसँग वार्ता गरी समस्या समाधानका लागि सरकारले औपचारिक पहल थालेको रूपमा यसलाई हेरिएको छ।
