वीरगंज । पछिल्ला दिनमा तीव्ररुपमा फैलिरहेको झाडापखाला र हैजाको जोखिमलाई ध्यानमा राख्दै वीरगंज महानगरपालिकाले आफ्नै पहलमा पानी परीक्षण कार्य सुरु गरेको छ। महानगरले संक्रमणको प्रमुख कारण दूषित खानेपानी हुनसक्ने आशंकामा नमूना संकलन गरी प्रयोगशालामा परीक्षण गर्न थालेको हो।

महानगर प्रमुख राजेशमान सिंहका अनुसार वडा नं. १०, ११ र १२ भित्रका विभिन्न पाँच स्थानका धाराबाट पानी नमूना संकलन गरिएको छ। माइक्रोबायोलोजिस्ट अजय मण्डल र वातावरण निरीक्षक प्रकाश ऐरसहितको प्राविधिक टोलीले संकास्पद क्षेत्रमा पुगेर नमूना संकलन गरी प्रयोगशालामा परीक्षण सुरु गरेका छन्। सोमबारदेखि नै महानगरले नमूना संकलन गरेर परीक्षण अघि बढाएको हो।

महानगरले वडा नं. १ छपकैयास्थित खानेपानी प्रशोधन केन्द्रमै आधुनिक प्रयोगशाला स्थापना गरेको छ। प्रयोगशालामा इ. कोली परीक्षण सहजै हुने व्यवस्था मिलाइएको छ भने युनिसेफले उपलब्ध गराएको विशेष किट प्रयोग गरेर कोलिफर्म परीक्षण समेत सुरु गरिएको छ। प्रारम्भिक नतिजा २४ घण्टाभित्र र विस्तृत रिपोर्ट ७२ घण्टाभित्र प्राप्त हुने प्राविधिक टोलीले जनाएको छ।

माइक्रोबायोलोजिस्ट मण्डलले भने, “समयमै नतिजा प्राप्त भएपछि कुन क्षेत्रमा दूषित पानी प्रवाह भइरहेको छ भन्ने थाहा पाउन सजिलो हुन्छ र त्यसअनुसार तत्काल कदम चाल्न सकिन्छ।”

संक्रमण नियन्त्रणलाई पहिलो प्राथमिकता दिँदै महानगर प्रमुख सिंहले सुरक्षित खानेपानी नै हालको मुख्य आवश्यकता रहेको उल्लेख गरे। उनका अनुसार, महानगरपालिकाले आफ्नै स्तरबाट परीक्षण सुरु गर्नुको उद्देश्य वासिन्दालाई शुद्ध र सुरक्षित खानेपानी उपलब्ध गराउनु हो।

हाल महानगरले सर्वाधिक प्रभावित क्षेत्रका धारामा प्राथमिकता दिँदै परीक्षण अघि बढाइरहेको छ भने आवश्यकता अनुसार अन्य संकास्पद स्थानका पानी नमूना पनि संकलन गरी परीक्षण गर्ने तयारी भएको महानगरले जनाएको छ।

वीरगंज । बाराकाे परवानीपुर गाउँपालिकाले वडा नं. ५, बहुअरीको मूल सडक निर्माण कार्यमा अवरोध र भ्रामक सूचना फैलाउने विषयमा सार्वजनिक स्पष्टीकरण जारी गरेको छ ।

गाउँपालिकाका अनुसार, विगत केही दिनदेखि बहुअरीको मूल बाटो निर्माण कार्यमा अवरोध गर्ने प्रयास भइरहेको र विभिन्न संचार माध्यममा भ्रामक सूचना फैलाइएको प्रति कार्यालयको गम्भीर ध्यान गएको छ । यस सन्दर्भमा गाउँपालिकाले स्पष्ट पार्दै भन्यो कि विगत ३ वर्षदेखि योजना तथा बजेट विनियोजन भई सडक निर्माण कार्य अघि बढाइएको हो र केही व्यक्तिहरूले व्यक्तिगत वा राजनीतिक स्वार्थका लागि अवरोध गर्दै आएका छन्।

गाउँपालिकाका प्रवक्ता महमद नुरुल होदा अंसारीद्वारा जारि विज्ञप्ती अनुसार वडा नं. ५ का वडा अध्यक्ष रामेश्वर प्रसाद कलवारको अध्यक्षतामा बसेको बैठकमा सर्वसम्मतिमा २५ फिट चौडा सडक निर्माण गर्ने निर्णय भइसकेको थियो । सो निर्णयअनुसार पटक-पटक सार्वजनिक सूचना जारी गरी घर, टहरा, पर्खाल खाली गर्न भनिएको थियो । यसै क्रममा न्यायिक समितिले २३ फिट चौडाइ कायम गर्ने निर्णय गरेको र कार्यपालिका तथा गाउँसभाबाट पनि यसलाई अनुमोदन गरिएको छ।

हाल अन्तिम निर्णय अनुसार सडक न्यूनतम १९ फिटदेखि अधिकतम २१ फिट चौडाइमा निर्माण हुने योजना तय गरिएको छ। गाउँपालिकाले भन्छ कि केहि व्यक्तिहरूले राजनीतिक तथा व्यक्तिगत स्वार्थका कारण सडक निर्माण अवरुद्ध गरिरहेका छन् र यस विषयमा कानुनी प्रक्रिया अपनाई सार्वजनिक हितमा सडक निर्माण कार्यलाई निरन्तरता दिइनेछ।

गाउँपालिकाले सबैमा अपील गर्दै भन्यो कि गैर जिम्मेवार रूपमा भ्रम फैलाउने वा सडक निर्माण अवरोध गर्ने कार्य तुरुन्त रोकिने र सार्वजनिक कार्यलाई निरन्तरता दिन सबैले सहकार्य गर्नुपर्नेछ।