ठोरी गाउँपालिकाको हिउँदे गाउँसभा तथा चौधौँ अधिवेशन सम्पन्न

पुस १८, २०८२

वीरगंज । पर्साकाे ठोरी गाउँपालिकाको हिउँदे गाउँसभा तथा चौधौँ अधिवेशन शुक्रबार सम्पन्न भएको छ। गाउँपालिका अध्यक्ष लालबहादुर श्रेष्ठको अध्यक्षतामा सम्पन्न अधिवेशनको उद्घाटन जिल्ला समन्वय समिति पर्साकी सदस्य शुशिला विकले गरेकी थिइन ।

अधिवेशनमा गाउँपालिकाका प्रमुख प्रशासकीय अधिकृत सरोजकुमार चौधरीले स्वागत मन्तव्य राख्दै हालसम्म गाउँपालिकाले गरेका काम, उपलब्धि तथा भावी योजनाबारे संक्षिप्त जानकारी गराए । कार्यक्रममा गाउँपालिका अध्यक्ष श्रेष्ठ, उपाध्यक्ष गोकुली रेग्मी, वडा अध्यक्षहरू अमृतकृष्ण सापकोटा र अष्टबहादुर लोप्चन, कार्यपालिका सदस्य फुलमाया दर्जी लगायतले आ–आफ्नो धारणा राखेका थिए ।

वक्ताहरूले स्थानीय विकास, सेवा प्रवाहको सुदृढीकरण, सुशासन तथा जनमुखी कार्यक्रमहरूलाई निरन्तरता दिनुपर्ने आवश्यकता औंल्याउँदै जनप्रतिनिधि र कर्मचारीबीचको समन्वयले गाउँपालिकाको विकास यात्रालाई अझ सशक्त बनाउने विश्वास व्यक्त गरे ।

सर्वसम्मत रूपमा विभिन्न प्रस्तावहरू पारित गर्दै सम्पन्न अधिवेशनमा केही याेजना र बजेटमा समान्य सन्सोधन समेत गरिएकाे प्रमुख प्रशासकीय अधिकृत चाैधरीले जानकारी दिए । अधिवेशनले आगामी दिनमा ठोरी गाउँपालिकाको विकास र प्रशासनिक सुधारका लागि महत्वपूर्ण दिशानिर्देश तय गर्ने अपेक्षा गरिएको छ।