वीरगंज । बाराको परवानीपुर गाउँपालिकाले हैजा रोग नियन्त्रणका लागि सबै वडामा अनुगमन समिति गठन गरी अभिमुखिकरण कार्यक्रम सञ्चालन गरेको छ । गाउँपालिकाका अध्यक्ष रामक्षत्री प्रसाद कुर्मीको अगुवाइमा वडामा जनचेतनामूलक र्‍यालीसमेत निकालिएको गाउँपालिकाले जनाएको छ ।

गाउँपालिका बासिन्दालाई हैजा सम्बन्धी आवश्यक जानकारी र सचेतना फैलाउनका लागि सञ्चालन गरिएको यस अभियानले स्थानीयस्तरमा सकारात्मक प्रभाव पारेको प्रमुख प्रशासकीय अधिकृत मुन्ना कुमार रौनियारले जानकारी दिएका छन् ।

उनका अनुसार, हैजाबाट बच्न सबैभन्दा पहिले व्यक्तिगत र सामूहिक सरसफाइमा विशेष ध्यान दिनु आवश्यक छ । उमालिएको वा फिल्टर गरिएको मात्र सुरक्षित खानेपानी सेवन गर्नुपर्ने, पानी भण्डारण गर्दा सफा भाँडाकुँडामा राख्नुपर्ने र व्यक्तिगत सतर्कता अपनाउनुपर्नेमा पनि विशेष जोड दिइएको छ ।

वीरगंज । हाल वीरगंजमा फैलिएको झाडापखाला र हैजाको जोखिमलाई ध्यानमा राख्दै वीरगंज महानगरपालिकाले खानेपानी शुद्धिकरणलाई प्राथमिकतामा राखेको छ। महानगरले विभिन्न स्थानमा राखिएका ट्यांकीहरूमा ट्यांकरमार्फत पुर्‍याइने पानीलाई क्लोरीन झोल र ब्लिचिङ पाउडर प्रयोग गरेर निर्मलीकरण गरेर मात्रै वितरण गर्दै आएको छ।

महानगरको वातावरण निरीक्षक प्रकाश ऐरका अनुसार फोहोर वा दूषित पानीकै कारण हैजा, टाइफाइडसहित अन्य पाचनसम्बन्धी रोग फैलने सम्भावना उच्च हुन्छ। “हामीले ट्यांकरमै क्लोरीन घोल्छौं र टंकीमा समेत ब्लिचिङ पाउडर प्रयोग गर्छौं। यसरी शुद्धिकरण नगरिकन कुनै पनि स्थानमा पानी पठाइँदैन,” उहाँले भन्नुभयो।

ब्लिचिङ पाउडर पानीलाई सुरक्षित बनाउने प्रभावकारी उपाय मानिन्छ। यसले पानीमा क्लोरीन मुक्त गराएर हैजा र टाइफाइड जस्ता रोगका जीवाणुहरूलाई तुरुन्तै नष्ट गर्ने भएकाले लामो समयसम्म सुरक्षित रूपमा प्रयोग गर्न सकिन्छ।

महानगर प्रमुख राजेशमान सिंहले खानेपानी शुद्धिकरणलाई रोग नियन्त्रणको सबैभन्दा महत्त्वपूर्ण उपाय भन्दै नागरिकलाई पनि घरमै पानी उमालेर मात्र पिउन र सरसफाइमा विशेष ध्यान दिन आग्रह गर्नुभयो। उहाँले भन्नुभयो, “सामुदायिक स्वास्थ्य हाम्रो पहिलो प्राथमिकता हो। महानगरले आफ्नो तर्फबाट शुद्धिकरणको सम्पूर्ण प्रक्रिया अवलम्बन गरिरहेको छ, तर नागरिकले पनि सतर्कता अपनाउनुपर्छ। हामी कुनै पनि हालतमा अशुद्ध पानी वितरण गर्न दिने छैनौं।”

महानगरले प्रत्येक घरपरिवारलाई सुरक्षित पानी उपलब्ध गराउने प्रतिबद्धता दोहोर्‍याएको छ।

वीरगंज । वीरगंजमा हाल फैलिएको झाडापखालाका संक्रमितहरूको परीक्षण रपोर्ट सार्वजनिक भएसँगै हैजाको संक्रमण पुष्टि भएको छ । नारायणी अस्पतालका सूचना अधिकारी डा. उदय नारायण सिंहका अनुसार प्रादेशिक प्रयोगशालामा गरिएको परीक्षणमा १५ वटा नमूनामध्ये १२ मा Vibrio Cholera नामक जीवाणु पाइएको छ ।

त्यसैगरी केन्द्रिय प्रयोगशालामा पठाइएका १० नमूनामध्ये ८ को रिपोर्ट आइसकेको छ, जसमा समेत सोही जीवाणु भेटिएको छ । विस्तृत परीक्षणका क्रममा भेटिएका स्ट्रेनमध्ये poly O1 र ogawa serotype पाइएको छ । यी दुवै सिरोटाइप अत्यन्त आक्रमक मानिन्छन् र प्रायः हैजाका महामारी यिनै कारण हुने गरेको पाइएको छ ।

विशेषज्ञहरूले हैजा नियन्त्रणका लागि सतर्कता अपनाउन आग्रह गरेका छन् । स्वास्थ्यकर्मीहरूले पिउनु अघि पानी उमाल्ने, खानेकुरा खानु अघि र शौचालय प्रयोगपछि साबुनपानीले राम्ररी हात धुने, पखाला लागेमा तुरुन्त जीवनजल (ORS) प्रयोग गर्ने र अवस्था गम्भीर भए नजिकैको स्वास्थ्य संस्थामा चाँडै लैजान सुझाव दिएका छन् ।

“आत्तिनुपर्ने अवस्था छैन तर उच्च सतर्कता आवश्यक छ,” डा. सिंहले बताए । स्थानीयलाई घरमा केही जीवनजल (ORS) राख्न र सरसफाइमा विशेष ध्यान दिन पनि आग्रह गरिएको छ ।

वीरगंज । हैजाको जोखिम बढेसँगै वीरगंज महानगरपालिकाले होटल र मासु पसलहरूमा व्यापक अनुगमन सुरु गरेको छ । मंगलबार महानगरको संयुक्त टोलीले मुर्ली, पानी टंकी, बसपार्क र नगवा क्षेत्रमा रहेका होटल तथा मासु पसलहरूको सरसफाइ अवस्था निरीक्षण गरेको हो ।

अनुगमनका क्रममा पसल र होटलभित्रको सरसफाइ, खानेपानीको स्वच्छता, सुरक्षित भण्डारण, फ्रिजमा राखिएका मासु, माछा, अण्डा तथा अन्य खाद्य सामग्रीहरूको अवस्था जाँच गरिएको थियो । टोलीले व्यवसायीहरूलाई स्वास्थ्य र स्वच्छताप्रति विशेष ध्यान दिन चेतावनीसहित सचेत गराएको छ ।

महानगर प्रमुख राजेशमान सिंहको निर्देशनमा पशु सेवा शाखा, वातावरण शाखा र महानगर प्रहरी बलको संयुक्त टोलीले अनुगमन गरेको हो । सिंहले हैजा फैलन नदिन व्यवसायी स्वयं जिम्मेवार बन्नुपर्ने आवश्यकता औंल्याउँदै नियमित अनुगमनलाई निरन्तरता दिइने बताए ।

उनले भने, “होटल तथा मासु पसलहरूमा स्वच्छता कायम भए मात्र हैजासहितका संक्रमणजन्य रोग नियन्त्रण गर्न सकिन्छ । यसलाई अब दैनिक कार्यको रूपमा अघि बढाइन्छ ।”

हैजा नियन्त्रणका लागि महानगरले जनचेतना कार्यक्रम, दूषित पानीको परीक्षण, संक्रमित क्षेत्रको सरसफाइ र स्वास्थ्यकर्मीमार्फत घरदैलो अभियानलाई पनि सक्रिय पारेको छ । यससँगै स्थानीयवासीलाई पानी उमालेर मात्र पिउन, सफा खानेकुरा सेवन गर्न र व्यक्तिगत सरसफाइमा ध्यान दिन आग्रह गरिएको छ ।