वीरगंज । सशस्त्र प्रहरी बल नेपाल नं. १३ गण हे.क्वा. पर्साले भारतबाट अवैध रूपमा चोरी पैठारी गरिएका १० हजार गोटा ब्रोइलर कुखुराका चल्ला नियन्त्रणमा लिई नष्ट गरेको छ।
सशस्त्र प्रहरी बल नं. १३ गणबाट खटिएको टोलीले आइतबार पर्सा जिल्लाको जगरनाथपुर गाउँपालिका–५, मसियानी क्षेत्रबाट नौ जना व्यक्तिले टाउकोमा बोकी नेपालतर्फ ल्याउँदै गरेको अवस्थामा चल्ला बरामद गरेको थियाे । बरामद चल्लाको अनुमानित ५ लाख बराबर रहेको सशस्त्र प्रहरीले जनाएको छ।
नियन्त्रणमा लिइएका प्रतिबन्धित ब्रोइलर चल्लालाई आवश्यक कानुनी प्रक्रिया पूरा गरी नेपाल प्रहरी, स्थानीय जनप्रतिनिधि, सञ्चारकर्मी तथा क्वारेन्टाइन कार्यालयका प्रतिनिधिहरूको रोहबरमा सशस्त्र प्रहरी बल नं. १३ गण परिसरभित्र नष्ट गरिएको सशस्त्र प्रहरीले जनाइएको छ।
सशस्त्र प्रहरी बलले अवैध आयात–निर्यात नियन्त्रण तथा जैविक सुरक्षालाई ध्यानमा राख्दै यस्ता कार्यविरुद्ध कडाइका साथ निगरानी जारी राख्ने सशस्त्र प्रहरी बल नेपाल, नं. १३ गण हे.क्वा. पर्साकका सूचना अधिकारी प्रहरी नायब उपरिक्षक विश्वराज याेन्जनले जानकारी दिए ।
