वीरगंज । पर्सा निर्वाचन क्षेत्र नं. १ अन्तर्गत वीरगंज महानगरपालिका वडा नं. २१ को तत्वा टोल तथा वडा नं. २३ को सबैठवामा जनमत पार्टीले स्थानीयसँग भेटघाट तथा संवाद कार्यक्रम सम्पन्न गरेको छ।
वीरगंज वडा नं. २१ तत्वा टोलमा आयोजित कार्यक्रममा करिब ३० जना महिला तथा युवती जनमत पार्टीमा प्रवेश गरेका छन्। सोही अवसरमा शोभा कुमारी साह र इन्द्रावती कुशवाको नेतृत्वमा २१ सदस्यीय महिला बुथ समिति गठन गरिएको छ।
कार्यक्रमलाई सम्बोधन गर्दै जनमत पार्टी पर्सा जिल्ला अध्यक्ष तथा पर्सा–१ बाट सिफारिस गरिएका उम्मेदवार ओमप्रकाश सरार्फले देश र मधेसको निकास तथा विकासका लागि स्पष्ट रोडम्याप जनमत पार्टीसँग मात्र रहेको दाबी गरे। अबको एक मात्र विकल्प जनमत पार्टी नै भएको उनले बताए।
कार्यक्रममा जनमत पार्टीका नेता बिध्यालाल प्रसाद, विजय पासवान, निराजन कुशवाहा, विष्णु कुशवाहा, सहनवाज राकी, रामबाबु ठाकुरलगायतको उपस्थिति रहेको थियो।
यसैबीच, जाडोको प्रतिकूल मौसमका बाबजुद पनि पर्सा–१ मा जनमत पार्टीबाट सिफारिस उम्मेदवार ओमप्रकाश सरार्फको चुनावी भेटघाट तथा युवा र महिला समिति विस्तार कार्यक्रम निरन्तर रूपमा जारी रहेको क्षेत्र नं. १ का पर्यवेक्षक डा. मनोज कुमारले जानकारी दिए।
