वीरगंज । सशस्त्र प्रहरी बल नेपाल सीमा सुरक्षा गुल्म हेडक्वार्टर लहावरकरीले आइतबारदेखि ७ दिने केश कटाइ (हेयर कटिङ) तालिम सुरु गरेको छ। बेरोजगार युवालाई स्वरोजगारतर्फ उन्मुख गराउने र सीमाक्षेत्रमा हुने तस्करीलाई निरुत्साहित गर्ने उद्देश्यले तालिम सञ्चालन गरिएको हो।
पकहाँ मैनपुर ४ लहावरथकरीस्थित सिमा सुरक्षा गुल्म लहावरथकरीमा सुरु भएकाे तालिमकाे उद्घाटन लहावरकरी गुल्मका गणपति डीएसपी लोकनाथ उप्रेतीले गरेका छन् । उद्घाटन कार्यक्रममा वाेल्दै डीएसपी उप्रेतीले सीमाक्षेत्रमा सशस्त्र प्रहरी र आम नागरिकबीच समन्वय र सहकार्य बढाउने उद्देश्यले यस्ता सीपमूलक तालिम आयोजना गरिएको बताए । सात दिनसम्म संचालन हुने तालिममा १५ जना सहभागी रहेका छन् ।
तालिम उद्घाटन समारोहमा सीमा सुरक्षा समितिका संयोजकसमेत रहेका पकहाँ मैनपुर गाउँपालिका–४ का वडाध्यक्ष ढेडी यादव, पकहाँ मैनपुर–५ का वडाध्यक्ष बलिराम चौरसिया, पत्रकार छठु साह, वडा समिति सदस्य पप्पू गिरी, सशस्त्र प्रहरी सीमा सुरक्षा बल मिर्जापुरका इन्सपेक्टर धानबहादुर अधिकारी, भिस्वाका इन्सपेक्टर राेशन सिर्नेट लगायतकाे उपस्थिति रहेको थियो।
सशस्त्र प्रहरीले सीमाक्षेत्रमा शान्ति, सुरक्षा र सामाजिक सद्भाव कायम गर्न आगामी दिनमा पनि यस्ता सीपमूलक तथा जनमैत्री कार्यक्रमहरू निरन्तर सञ्चालन गर्ने जनाएको छ।
