वीरगंज । जिल्ला प्रशासन कार्यालय पर्साले वीरगंज महानगरपालिका क्षेत्रमा कर्फ्यू आदेश जारी गरेको छ । प्रमुख जिल्ला अधिकारी भोला दाहालद्वारा जारी आदेशअनुसार आज पुस २१ गते साँझ ६:०० बजेदेखि पुस २२ गते बिहान ८:०० बजेसम्म कर्फ्यू लागू रहनेछ।
स्थानीय प्रशासन ऐन, २०२८ को दफा ६ (क) बमोजिम जारी कर्फ्यू आदेशअनुसार वीरगंज महानगरपालिकाभित्र पूर्वतर्फ बाइपास रोड, पश्चिमतर्फ सिर्सिया पुल, उत्तरतर्फ पावर हाउस चौक र दक्षिणतर्फ शंकराचार्य गेटसम्मको क्षेत्र कर्फ्यू क्षेत्र घोषणा गरिएको छ। सो सीमाभित्र कसैले पनि आवतजावत गर्न, भेला, जुलुस, प्रदर्शन, सभा, बैठक तथा घेराउ गर्न नपाउने गरी पूर्ण निषेध गरिएको छ।
जिल्ला प्रशासनले कर्फ्यू अवधिमा सुरक्षाकर्मीले कडा निगरानी गर्ने जनाएको छ। अत्यावश्यक कामबाहेक घर बाहिर ननिस्कन आग्रह गर्दै, निस्किनु परे नजिकको सुरक्षाकर्मीसँग समन्वय गरी वा १०० नम्बरमा फोन गरी मात्र बाहिर निस्कन अनुरोध गरिएको छ।
कर्फ्यू आदेशको अवधिभर अत्यावश्यक सेवाका सवारी साधनहरू, एम्बुलेन्स, दमकल, शववाहन, स्वास्थ्यकर्मीका सवारी साधन, सञ्चारकर्मी, पर्यटक सवारी साधन, मानवअधिकार तथा कूटनीतिक नियोगका सवारी साधनहरू तथा हवाई टिकटको आधारमा हवाई यात्रुहरूको आवागमनमा सुरक्षाकर्मीबाट सहजीकरण गरिने जिल्ला प्रशासन कार्यालय पर्साले जनाएको छ।
