वीरगंज । पर्सा जिल्लाको वीरगंज महानगरपालिका क्षेत्रमा जारी कर्फ्यू आदेशलाई आज मंगलबार दिउँसो १:०० बजेसम्म निरन्तरता दिइएको छ।
जिल्ला प्रशासन कार्यालय पर्साका प्रमुख जिल्ला अधिकारी भोला दाहालद्वारा जारी आदेशअनुसार हिजो साँझ ६:०० बजेदेखि आज बिहान ८:०० बजेसम्म लागू कर्फ्यूलाई पछिल्लो सुरक्षा अवस्थालाई मध्यनजर गर्दै स्थानीय प्रशासन ऐन, २०२८ को दफा ६ (क) बमोजिम थप गरिएको हो।
कर्फ्यू लागू हुने क्षेत्रअन्तर्गत पूर्वतर्फ बसपार्क, नगवा र इनर्वा, पश्चिमतर्फ सिर्सिया नदी, उत्तरतर्फ गण्डक चौक र दक्षिणतर्फ शंकराचार्य गेटसम्मको सीमा तोकिएको छ। सो क्षेत्रमा आवत–जावत, भेला, जुलुस, प्रदर्शन, सभा, बैठक तथा घेराउ गर्न पूर्ण रूपमा निषेध गरिएको छ।
प्रशासनले कर्फ्यू अवधिमा अत्यावश्यक बाहेक घरबाहिर ननिस्किन अनुरोध गरेको छ। अत्यावश्यक कारणले बाहिर निस्कनु परे नजिकको सुरक्षाकर्मीसँग समन्वय गर्न वा १०० नम्बरमा फोन गर्न आग्रह गरिएको छ। कर्फ्यूको समयमा सुरक्षाकर्मीले कडा कदम चाल्न सक्ने भएकाले सर्वसाधारणलाई सतर्क रहन समेत प्रशासनले चेतावनी दिएको छ।
यद्यपि एम्बुलेन्स, दमकल, शव वाहन, स्वास्थ्यकर्मी, सञ्चारकर्मी, पर्यटक, मानवअधिकार तथा कूटनीतिक नियोगका सवारी साधनहरू र हवाई टिकटको आधारमा यात्रा गर्ने यात्रुहरूको आवागमनमा सुरक्षाकर्मीबाट सहजीकरण गरिने जिल्ला प्रशासन कार्यालयले जनाएको छ।
