वीरगंज । जिल्ला प्रहरी कार्यालय पर्साले स्रोत नखुलेको १० लाख २ हजार १० रुपैयाँ (हुण्डी रकम)सहित तीन जनालाई पक्राउ गरेको छ।
प्रहरीका अनुसार विशेष सूचनाको आधारमा शुक्रबार जिल्ला प्रहरी कार्यालयबाट खटिएको प्रहरी टोलीले पर्सा जिल्लाका विभिन्न स्थानबाट हुण्डी कारोबारमा संलग्न व्यक्तिहरूलाई नियन्त्रणमा लिएको हो। पक्राउ परेकाहरूको साथबाट स्रोत नखुलेको १० लाख २ हजार १० रुपैयाँ नगद तथा ना. १६ प ३०२० नम्बरको एनएक्सजी स्प्लेन्डर मोटरसाइकल बरामद गरिएको छ।
पक्राउ पर्नेमा पर्सा जिल्ला सखुवा प्रसौनी गाउँपालिका–४, देवरवाना निवासी २२ वर्षीय पवन कुमार साह, ३० वर्षीय मुस्ताक अन्सारी र १९ वर्षीय रामपुकार पासवान रहेका छन् । उनीहरूलाई जगरनाथपुर गाउँपालिका–३ गडैयाटोलस्थित सडकखण्डबाट पक्राउ गरिएको प्रहरीले जनाएको छ।
नियन्त्रणमा लिइएका व्यक्तिहरूविरुद्ध मुलुकी अपराध संहिता, २०७४ को दफा १२५ (क) अनुसार (हुण्डी सम्बन्धी कारोबार गर्न नहुने) कसुरमा पर्सा जिल्ला अदालतबाट सात दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीले जानकारी दिए ।
प्रवक्ता कार्कीले अवैध आर्थिक कारोबार नियन्त्रणका लागि प्रहरीले निगरानी थप कडा बनाइएको बताएका छन् ।
