वीरगंज । आगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा पर्सा निर्वाचन क्षेत्र नम्बर ३ मा चुनावी सरगर्मी बढ्न थालेको छ। निर्वाचनको मिति नजिकिएसँगै विभिन्न राजनीतिक दलहरूले उम्मेदवार छनोटको प्रक्रिया अघि बढाएका छन् भने उम्मेदवार बन्ने आकांक्षीहरू ठूला दलबाट टिकट सुरक्षित गर्न सक्रिय देखिएका छन्।
पर्सा–३ मा प्रतिनिधि सभा सदस्यका लागि एक दर्जनभन्दा बढी आकांक्षी देखिएका छन् । नेकपा एमालेबाट पूर्व मन्त्री तथा निर्वतमान सांसद राजकुमार गुप्ता, रुपेश पाण्डे, पूर्व मन्त्री तथा प्रदेश सभा सदस्य प्रमोद जयसवालसहित करिब १० जनाको नाम सिफारिस भएको छ।
पूर्व मन्त्री गुप्ता हाल भ्रष्टाचार मुद्दामा थुनामा रहेकाले एमालेभित्र वैकल्पिक उम्मेदवारको खोजी तीव्र बनेको छ । यही कारण जिल्ला तहका नेताहरूले व्यापारी पृष्ठभूमिका युवा नेता रुपेश पाण्डेलाई उम्मेदवार बनाउन केन्द्रमा पैरवी थालेका छन् । युवा र व्यवसायिक छविका कारण पाण्डेले चुनाव जित्न सक्ने अनुमान गर्दै नेताहरू सक्रिय देखिएका छन्।
यद्यपि अर्को पक्षले निर्वतमान सांसद गुप्तालाई नै टिकट दिनुपर्ने, उनको अवस्था प्रतिकूल भए स्वतन्त्र प्रदेश सभा सदस्य जितेर मन्त्रीसमेत बनेका प्रमोद जयसवाललाई उम्मेदवार बनाइनुपर्ने भन्दै केन्द्रमा दबाब दिएको बताइन्छ । एमालेबाट अन्ततः कसले टिकट पाउने भन्ने विषय अझै अनिश्चित छ ।
नेपाली कांग्रेसबाट पूर्व मन्त्री सुरेन्द्र चौधरी र पूर्व मन्त्री तथा प्रदेश सभा सदस्य जनार्दन सिंह क्षेत्रीको नाम सिफारिस भएको छ। अघिल्लो निर्वाचनमा चौधरी झिनो मतले पराजित भएका थिए भने क्षेत्री कांग्रेस पर्साका सभापति हुन् । दुवै संस्थापन पक्षका नेता भए पनि चौधरी महामन्त्री गगन थापा पक्षमा खुलेपछि कांग्रेसभित्र पनि टिकट कसले पाउने भन्ने विषय पेचिलो बनेको छ।
प्रचण्ड–माधव नेपाल नेतृत्वको नेकपाबाट रामबाबु बैठा, छोटेलाल यादव र विक्रम चौरसियाको नाम सिफारिस भएको छ। पहिलो नम्बरमा रहेका बैठा नेकपा केन्द्रीय सदस्य हुन् । दोस्रो नम्बरका यादव अघिल्लो निर्वाचनमा माओवादी केन्द्रबाट प्रदेश सभा सदस्यमा प्रतिस्पर्धा गरेका थिए भने चौरसिया तत्कालीन नेकपा (एकीकृत समाजवादी) पर्साका उपाध्यक्ष हुन् ।
जनमत पार्टीबाट मालती कुशवाहाले उम्मेदवारीको तयारी गर्दै चुनावी अभियानसमेत सुरु गरिसकेकी छन् । राष्ट्रिय स्वतन्त्र पार्टी (रास्वपा) बाट भने हालसम्म उम्मेदवार तय नभएको र आकांक्षीको चर्चा पनि खासै नदेखिएको अवस्था छ।
जनता समाजवादी पार्टी (जसपा) नेपालबाट नरेन्द्र प्रसाद यादव, भरत गिरी र जनार्दन यादवको नाम छुट्टाछुट्टै सिफारिस भएको छ। चुनावी लडने तयारीमा रहेका जनार्दन यादवले रास्वपाबाट टिकट पाएमा त्यहीँबाट चुनाव लड्न सक्ने चाहना व्यक्त गरेको चर्चा पनि छ।
यसैगरी हरेक निर्वाचनमा फरक–फरक दलबाट उम्मेदवारी दिने राजकुमार यादवले यसपटक पनि चुनाव लड्न सक्ने सम्भावना देखिएको छ, तर कुन दलबाट लड्ने भन्ने अझै अनिश्चित छ। यसका अतिरिक्त साना दलहरूबाट पनि उम्मेदवार देखिन सक्ने भए तापनि मुख्य प्रतिस्पर्धा यिनै उम्मेदवारहरूबीच हुने अनुमान गरिएको छ ।
निर्वाचन कार्यतालिका अनुसार मनोनयन दर्ताको समय नजिकिँदै जाँदा दलहरू उम्मेदवार टुंग्याउने र सम्भावित गठबन्धनको तयारीमा व्यस्त छन् । तर हालसम्म कुनै पनि दलले पर्सा–३ का लागि अन्तिम उम्मेदवार घोषणा गरिसकेका छैनन्।
