वीरगंज । तराई–मधेश लोकतान्त्रिक पार्टी (तमलोपा) का पूर्व जिल्ला अध्यक्ष तथा तत्कालीन गोविन्दपुर गाविसका पूर्व अध्यक्ष योगेन्द्र प्रसाद कुर्मी राष्ट्रिय स्वतन्त्र पार्टी (रास्वपा) मा प्रवेश गरेका छन्। उनलाई मंगलबार वीरगंजस्थित कन्ट्री इन होटलमा आयोजित एक कार्यक्रममा रास्वपा पर्साका सभापति हरी पन्तले पार्टी प्रवेश गराएका हुन्।
कुर्मी सँगै वीरगंज महानगरपालिका वडा नं. १५ का जुझारु युवा नेता लाल बाबु कुमार यादव पनि रास्वपामा प्रवेश गरेका छन्।
पार्टी प्रवेश गराउँदै रास्वपा पर्सा सभापति हरी पन्तले पर्सा जिल्लामा रास्वपामा प्रवेश गर्नेहरूको लहर चलेको बताए । उनले यसपटक सम्पूर्ण पर्साबासी एकजुट भएर “बलेन सरकार” निर्माणका लागि अघि बढिरहेको दाबी गर्दै आगामी निर्वाचनमा रक्सी, मासु र पैसाको प्रभाव नचल्ने विश्वास व्यक्त गरे।
कार्यक्रममा रास्वपा जिल्ला सचिव सुदिश प्रजापति, क्षेत्रीय सभापतिहरू मनोज कुर्मी, जीतेन्द्र मिश्रा, पोखरिया नगर सभापति प्रदीप पटेल, संगठन विभागका प्रमोद रायमाझी, सोना लाल कुर्मीलगायतको उपस्थिति रहेको थियो।
