वीरगंज । सुदूरपश्चिम प्रदेश सभामा प्रस्तुत दलित सशक्तीकरण ऐन, २०७८ को संशोधन विधेयक सम्बन्धमा सरोकारवालासँग नीतिगत संवाद कार्यक्रम आज धनगढीमा सम्पन्न भएको छ।

नेपालमा विगत २६ वर्षदेखि दलित मानव अधिकार र सामाजिक न्यायका क्षेत्रमा कार्यरत राष्ट्रिय दलित नेटवर्क, नेपालको अगुवाइमा दलित महिला संघ कैलाली, दलित महिला अधिकार मञ्च कैलाली तथा राष्ट्रिय मुक्त हलिया समाज महासंघ नेपालको संयुक्त आयोजनामा उक्त कार्यक्रम सम्पन्न भएको हो।

नीतिगत संवाद कार्यक्रममा सुदूरपश्चिम प्रदेश सरकारका आन्तरिक मामिला तथा कानुन मन्त्री हिरासिं सार्कीले दलित सशक्तीकरण ऐन, २०७८ को संशोधन समयानुकूल, व्यवहारिक र प्रभावकारी हुनुपर्नेमा जोड दिनुभयो। उहाँले सरोकारवालाबाट प्राप्त सुझावहरूलाई गम्भीरतापूर्वक समेट्दै विधेयकलाई थप प्रभावकारी बनाइने प्रतिबद्धता व्यक्त गर्नुभयो। मन्त्री सार्कीले दलित समुदायको शिक्षा, रोजगारी, सीप विकास र न्यायमा पहुँच सुनिश्चित गर्न कानुनी सुधार अपरिहार्य रहेको उल्लेख गर्दै प्रदेश सरकार दलित अधिकारको संरक्षण र प्रवर्द्धनप्रति प्रतिबद्ध रहेको बताउनुभयो।

सुदूरपश्चिम प्रदेश सरकारका पूर्व शिक्षा तथा युवा खेलकुद मन्त्री एवं प्रदेशसभा सदस्य लक्ष्मी बि.क. ले संशोधन विधेयक अझ स्पष्ट, अधिकारमुखी र कार्यान्वयनयोग्य हुनुपर्ने धारणा राख्नुभयो। उहाँले ऐनमा रहेका अस्पष्ट प्रावधान, कमजोर कार्यान्वयन संयन्त्र तथा उत्तरदायित्वको अभावका कारण ऐन प्रभावकारी हुन नसकेको भन्दै ती कमजोरी सच्याउनुपर्नेमा जोड दिनुभयो। साथै, सरोकारवाला संस्थाहरूबाट प्राप्त सुझाव समेटिनु नितान्त आवश्यक रहेको बताउनुभयो।

कार्यक्रममा नेपाली काँग्रेसका प्रमुख सचेतक एवं प्रदेशसभा सदस्य बिक्रम धामी, प्रदेशसभा सदस्य जानकी ऐर बम, इन्दीरा गिरी, ललिता सुनार, सुदूरपश्चिम प्रदेश सरकारका पूर्व सामाजिक विकास राज्यमन्त्री टेक बहादुर रैका, नेकपा नेता गोरख सार्की, मुक्ति समाजका प्रदेश अध्यक्ष भानसिं विश्वकर्मा, दलित बुद्धिजीवी बसन्त बागचन्द, गौरीगंगा नगरपालिका कार्यपालिका सदस्य मदन नेपाली, मुक्ति समाज डोटीका अध्यक्ष केशव चुनारा, सामाजिक विकास मन्त्रालयका कानुन अधिकृत दान बहादुर सुनार, गैरसरकारी संस्था महासंघका केन्द्रीय सचिव सावित्रा घिमिरे, सञ्चारकर्मी मिलन परियार तथा दलित अधिकारकर्मी अग्नि शिखा, जय बिक र चन्द्र ताम्राकारलगायतले ऐन संशोधनमा समेटिनुपर्ने विषयमा सुझाव प्रस्तुत गर्नुभएको थियो।

राष्ट्रिय दलित नेटवर्क, नेपालका केन्द्रीय अध्यक्ष मोहन ओडको अध्यक्षतामा सम्पन्न कार्यक्रममा कैलाली जिल्ला अदालतका निमित्त कार्यालय प्रमुख दिवानीराम लोहारले संशोधन विधेयकसम्बन्धी प्रस्तुतीकरण गर्नुभएको थियो। सो प्रस्तुतीकरणमाथि वरिष्ठ पत्रकार तथा अनुसन्धानकर्ता मनमोहन स्वारले टिप्पणी गर्नुभएको थियो। कार्यक्रमको सञ्चालन दलित अधिकारकर्मी चक्र बिकले गर्नुभएको थियो भने दलित महिला संघ कैलालीकी अध्यक्ष सविना घिमिरेले स्वागत मन्तव्य व्यक्त गर्नुभएको थियो।

वीरगंज । मुलुकलाई असफल राष्ट्र बन्नबाट जोगाएर सफल राष्ट्रतर्फ अग्रसर गराउनु नै पृथ्वी नारायण शाहप्रति सच्चा श्रद्धाञ्जलि हुने वक्ताहरूले बताएका छन्।

३०४औँ पृथ्वी जयन्ती तथा राष्ट्रिय एकता दिवसको अवसरमा राष्ट्रिय नागरिक संघर्ष समिति, वीरगंज केन्द्रद्वारा आयोजित नागरिक सभामा बोल्ने वक्ताहरूले वर्तमान अवस्थामा मुलुकको अस्तित्व र राष्ट्रिय एकता जोगाउन संवैधानिक राजतन्त्रको विकल्प नरहेको धारणा व्यक्त गरे।

सभामा संघर्ष समितिका केन्द्रीय प्रवक्ता हीरा बहादुर चन्दले दलहरूले पनि वर्तमान अवस्थामा राजसंस्थाको विकल्प नरहेको कुरा स्वीकार गरिसकेको भए पनि विभिन्न दबाब र प्रभावका कारण सार्वजनिक रूपमा व्यक्त गर्न नसकेको दाबी गर्नुभयो। उहाँले बडामहाराज पृथ्वी नारायण शाहको दिव्य उपदेशलाई मनन गर्दै मुलुक जोगाउन ढिलाइ नगरी संवैधानिक राजतन्त्र, बहुदलीय प्रजातन्त्र अर्थात् संविधान २०४७ पुनः स्थापना गर्नुको विकल्प नरहेको बताउनुभयो।

चन्दले मुलुकलाई असफल हुनबाट जोगाउन २०६३ साल वैशाख ११ गते दल र राजाबीच भएको पाँचबुँदे सहमति कार्यान्वयन अनिवार्य रहेकोमा जोड दिनुभयो। पृथ्वी जयन्ती तथा राष्ट्रिय एकता दिवसको अवसरमा श्री ५ महाराजधिराज ज्ञानेन्द्र वीर विक्रम देव सरकारबाट जारी शुभकामना सन्देशको स्मरण गर्दै उहाँले पृथ्वी नारायण शाहको दिव्य उपदेशअनुसार ‘पृथ्वीपथ’ तर्फ अघि बढ्नु नै मुलुक जोगाउने एकमात्र बाटो भएको उल्लेख गर्नुभयो।

सभामा वरिष्ठ अधिवक्ता देवेन्द्रलाल नेपालीले २०७२ सालको संविधानलाई अवैध दस्तावेजको संज्ञा दिँदै त्यसलाई खारेज गरी २०४७ को संविधान जारी गर्नुपर्ने माग गर्नुभयो। “मुलुक नै नरहे के गर्छौं ?” भन्दै उहाँले दलका नेताहरूलाई नामै तोकेर चेतावनी दिँदै यथाशीघ्र संविधान २०४७ तर्फ नफर्किए मुलुक गम्भीर संकटमा फस्ने दाबी गर्नुभयो।

त्यस्तै संघर्ष समितिका केन्द्रीय सदस्य डा. राजीव झाले २०७२ को संविधानलाई सिंगो नेपालले बहिष्कार गरिसकेको दाबी गर्दै २०४७ को संविधान पुनःस्थापना गरी आपसी मतभेद त्यागेर राष्ट्रिय एकता कायम गर्नु नै पृथ्वी नारायण शाहप्रति सच्चा श्रद्धाञ्जलि हुने धारणा राख्नुभयो।

नागरिक सभा राष्ट्रिय नागरिक संघर्ष समितिका केन्द्रीय प्रवक्ता तथा वीरगंज केन्द्रका संयोजक हीरा बहादुर चन्दको सभापतित्वमा सम्पन्न भएको थियो। सभामा राजकुमार सिन्धी, विपिन शाह, अब्दुल सतार, बृजकिशोर गुप्तालगायतले मन्तव्य राखेका थिए। कार्यक्रमको सञ्चालन मानव सेवकले गर्नुभएको थियो भने स्वागत मन्तव्य दिनानाथ प्रसाद यादवले दिनुभएको थियो।

सभामा पशुपति विक्रम शाह, रोजिना गुरुङ, चन्द्रभूषण साह, पुनित गुप्ता, रमेश मानन्धर, उपेन्द्र यादवलगायतको उल्लेख्य उपस्थिति रहेको थियो।

पृथ्वी जयन्तीको अवसरमा राष्ट्रिय नागरिक संघर्ष समितिले सम्झना होटल प्रांगणबाट रथ र बाजागाजासहित नागरिक ¥याली आयोजना गरेको थियो। ¥याली घण्टाघर, आदर्शनगर हुँदै नगर परिक्रमा गरी पुनः घण्टाघर चोकमा पुगेर श्री ५ बडामहाराजधिराज पृथ्वी नारायण शाहको तस्बिरमा माल्यार्पण गरेपछि नागरिक सभामा परिणत भएको थियो।

वीरगंज । “२५ औँ सशस्त्र प्रहरी दिवस २०८२” को अवसरमा सशस्त्र प्रहरी बल नेपाल पर्साले सीमावासीसँग सशस्त्र प्रहरी कार्यक्रम अन्तर्गत ROTARY CLUB OF BIRGUNJ सँगको सहकार्यमा न्यानो कपडा वितरण गरेको छ।

सशस्त्र प्रहरी बल, नेपाल नं. १३ गण हे.क्वा. पर्साको आयोजनामा पर्सा जिल्लाका विभिन्न पालिकामा रहेका २०३ विपन्न घरपरिवारलाई जाडोबाट राहत पुर्‍याउने उद्देश्यले पोलार वितरण गरिएको हो।

कार्यक्रम सशस्त्र प्रहरी बल नेपाल नं. १३ गण हे.क्वा. पर्साका गणपति सप्रउ पुरन चन्द्र भट्टको प्रमुख आतिथ्यतामा सम्पन्न भएको थियो। विभिन्न वडाका वडा अध्यक्ष तथा जनप्रतिनिधिहरूको उपस्थितिमा सीमा सुरक्षा गुल्म तथा बीओपी परिसरहरूमा न्यानो कपडा वितरण गरिएको हो।

विवरण अनुसार, सीमा सुरक्षा गुल्म हे.क्वा. अलौको प्राङ्गणमा वीरगञ्ज महानगरपालिका–१७ का ३४ विपन्न घरपरिवार, बीओपी अमरपट्टीको प्राङ्गणमा बिन्दवासिनी गाउँपालिका–३, ४ र ५ का ३७ घरपरिवार, बीओपी पिडारीगुठ्ठीमा जगरनाथपुर गाउँपालिका–१ का १६ घरपरिवार, बीओपी भिष्वामा छिपहरमाई गाउँपालिका–३, ४ र ५ का ७१ घरपरिवार, बीओपी महादेवपट्टीमा जिराभवानी गाउँपालिका–१ का १५ घरपरिवार तथा सीमा सुरक्षा गुल्म हे.क्वा. भिखमपुरमा धोविनी गाउँपालिका–२ र जगरनाथपुर गाउँपालिका–२ का ३० विपन्न घरपरिवारलाई न्यानो कपडा वितरण गरिएको हो।

सशस्त्र प्रहरी बल, नेपाल नं. १३ गण हे.क्वा. पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाका अनुसार सीमावर्ती क्षेत्रका विपन्न नागरिकलाई लक्षित गर्दै सामाजिक उत्तरदायित्वअन्तर्गत कार्यक्रम सञ्चालन गरिएको हो।