वीरगंज । भोजपुरी लोक तथा आधुनिक संगीतकी चर्चित गायिका कल्पना पटवारी वीरगंज आउने भएकी छन्। यही माघ १५, १६ र १७ गते आयोजना हुने मधेश साहित्य महोत्सव २०२६ मा सहभागिता जनाउन उनी वीरगंज आउन लागेकी हुन्। महोत्सवको सांगीतिक सन्ध्यामा उनले विशेष प्रस्तुति दिने कार्यक्रम तय भएको आयोजकले जनाएको छ।
लोकगीतलाई आधुनिक संगीतसँग जोडेर नयाँ पुस्तासम्म पुर्याउन सफल कल्पना पटवारी भोजपुरी संगीतको एक स्थापित नामका रूपमा परिचित छन्। उनका गीतहरू नेपाल, भारतसहित विश्वभर रहेका भोजपुरी भाषी समुदायमा अत्यन्त लोकप्रिय छन्। उनको उपस्थितिले महोत्सवप्रति दर्शक तथा संगीतप्रेमीहरूबीच थप उत्साह सिर्जना भएको छ।
उत्कर्ष नेपालद्वारा आयोजना हुन लागेको मधेश साहित्य महोत्सव २०२६ माघ १५, १६ र १७ गते (जनवरी २९–३१, २०२६) वीरगंजस्थित मधेश विश्वविद्यालय परिसरमा आयोजना हुँदैछ। महोत्सवको सांगीतिक सन्ध्यामा कल्पना पटवारीको प्रस्तुति मुख्य आकर्षणमध्ये एक हुने आयोजकको भनाइ छ।
आयोजकका अनुसार उनको प्रस्तुतिले मधेशको लोक–संस्कृति, संगीत र सामूहिक उत्सवको भावनालाई थप मजबुत बनाउने अपेक्षा गरिएको छ। साहित्य, कला, संस्कृति र संगीतको संगम रहने महोत्सवलाई यस वर्ष अझ ठूलो, समावेशी र जनमुखी बनाउने तयारी गरिएको आयोजक संस्थाका जय साहले जानकारी दिए।
