वीरगंज । बाराको परवानीपुर गाउँपालिकाकाे हिउँदे गाउँसभाको १७औँ अधिवेशन सोमबार गाउँपालिकाको सभाहलमा सम्पन्न गरेको छ। चालु आर्थिक वर्ष २०८२/०८३ को हिउँदे अधिवेशनका रूपमा सम्पन्न सभामा हालसम्मको प्रगति विवरण र आगामी कार्ययोजनाबारे छलफल गरिएको थियो।
परवानीपुर गाउँपालिका अध्यक्ष रामक्षत्री प्रसाद कुर्मीको अध्यक्षतामा सम्पन्न गाउँसभामा आर्थिक वर्ष २०८२/०८३ को साउनयतादेखि हालसम्म कार्यान्वयन भएका योजना तथा कार्यक्रमको प्रगति प्रतिवेदन प्रस्तुत गरिएको थियो। साथै चालु आर्थिक वर्षमा स्वीकृत योजना तथा कार्यक्रमको संशोधनसमेत सभाले पारित गरेको छ।
सभामा जनप्रतिनिधिहरूले उठाएका विभिन्न गुनासो र जिज्ञासाको जवाफ दिँदै अध्यक्ष कुर्मीले वडा नं. १ देखि ५ सम्म भौतिक पूर्वाधार निर्माणसँगै स्वास्थ्य, शिक्षा, कृषि र दलित लक्षित कार्यक्रमहरूमा उल्लेखनीय काम भएको बताउनुभयो। उहाँले समृद्ध परवानीपुर गाउँपालिका निर्माणका लागि वडाध्यक्ष, वडासदस्यलगायत सबै जनप्रतिनिधिको भूमिकालाई महत्वपूर्ण रहेको उल्लेख गर्नुभयो।
निर्वाचित भएदेखि विकासका कार्यमा सबैको साथ सहयोग पाएको र आगामी दिनमा अझ प्रभावकारी कामका लागि निरन्तर सहयोगको अपेक्षा रहेको उहाँको भनाइ थियो।
गाउँपालिकाका प्रमुख प्रशासकीय अधिकृत मुन्ना साह रौनियारले स्वागत मन्तव्य व्यक्त गर्दै चालु आर्थिक वर्षमा सम्पन्न योजना तथा कार्यक्रमको विस्तृत प्रगति प्रतिवेदन प्रस्तुत गर्नुभएको थियो। सभामा गाउँपालिका भित्रका सम्पूर्ण जनप्रतिनिधि, कर्मचारी, पत्रकार तथा सुरक्षाकर्मीको उपस्थिति रहेको थियो।
यसैबीच, गाउँसभाको अवसरमा आर्थिक वर्ष २०८१/०८२ मा सबैभन्दा ठूलो करदाता बनेका ओसिबी फुड्स एण्ड फिड्स प्रा.लि.का सञ्चालक सुरेश रुंगटालाई ९ लाख ६० हजार रुपैयाँ कर बुझाएको योगदानको कदरस्वरूप दोसल्ला ओढाई सम्मानपत्रसहित सम्मान गरिएको छ। त्यस्तै, जय श्री हेल्थ केयर प्रा.लि.लाई ६ लाख रुपैयाँ कर समयमै बुझाएकोमा सम्मान गरिएको थियो।
त्यसैगरी, आर्थिक वर्ष २०८१/०८२ मा वडा नं. ५ बहुअरी कार्यालयले उद्योगहरूबाट सहजीकरण गरी १४ लाख १० हजार रुपैयाँ कर संकलनमा महत्वपूर्ण भूमिका निर्वाह गरेको भन्दै वडा नं. ५ का वडाध्यक्ष रामेश्वर साह कलवारलाई समेत परवानीपुर गाउँपालिकाको तर्फबाट दोसल्ला ओढाई सम्मान गरिएको छ।
